Uro 4

A Aboraham Yel-erre Naŋ E Wuluu

1Te na yeli ka boŋ tɔnɔ la ka a te eŋgannoŋ poɔ sããkoma Aboraham pãã da nyɛ? 2Ka Aboraham da leɛ nemmeŋɛ toma zuiŋ, o taa la bonkaŋ o naŋ na ŋmeɛrɛ ne nyaa a wullo ne o meŋɛ, kyɛ Naaŋmen zie naane ka o na wullo a o meŋɛ. 3Boŋ ka a gansoŋ yeli? “Aboraham da sage de la Naaŋmen yɛlɛ, a da leɛ nemmeŋɛ a lɛ zuiŋ.” 4Neɛ naŋ toŋ toma, ba koŋ baŋ yeli ka a o san-yɔɔ waa la kyɔɔtaa, bonso, a waa la bon a naŋ seŋ ka ba ko o. 5Kyɛ soba na naŋ ba e yelzaa kyɛ dɛle a neɛ na naŋ maŋ e ka yelbe-erebɛ leɛ nemmenne, a yeldeebo ŋa tɔ la ka ba na de ka o waa mennoŋ. 6A lɛ meŋ ka Davil da yeli kyaare ne maaloo na banaŋ Naaŋmen naŋ tere mennoŋ a yi ba toma puoriŋ:

7“Banaŋ yelbebe suuri ba naŋ di ko ba,

ane banaŋ yelbebe ba naŋ pɔge nyɛ la maaloo;

8soba na a Daana naŋ ba de o yelbebe saanaa tuo o nyɛ la maaloo.”

9A maaloo ŋa yɛlɛ ba naŋ pãã yeli mɔɔ e la a banaŋ ba naŋ iri ba dɛgre yoŋ soobo, bee a e la a banaŋ meŋ dɛgre naŋ ba iri soobo? Te maŋ yeli la, “Yeldeebo zuiŋ la ka a Aboraham da nyɛ mennoŋ.” 10Wola pãã la ka ba da ko o a mennoŋ? O da nyɛ la a mennoŋ kyɛ pãã iri a o dɛgre, bee a o dɛgre iruu puoriŋ la ka o da nyɛ a mennoŋ? A da ba e ka o naŋ da wa iri a o dɛgre puoriŋ la, kyɛ o naŋ da naŋ ba iri a o dɛgre saŋ la ka o da nyɛ a mennoŋ. 11A Aboraham dɛgre iruu da e la yelwulaa naŋ kpulli a o mennoŋ na o naŋ da nyɛ a o yeldeebo zuiŋ kyɛ ka o da naŋ ba iri a o dɛgre sɛre. A yeli ŋa da eɛɛ la ka ka a Aboraham na waa a banaŋ zaa naŋ sage de kyɛ ka ba ba iri ba dɛgre, a banaŋ ba naŋ ko mennoŋ sããkoma. 12A lɛ ne o zu ka a Aboraham da waa a banaŋ ba naŋ da iri ba dɛgre sããkoma. Ba da ba e noba naŋ iri ba dɛgre yoŋ kyɛ ba da waa la noba naŋ da tu a te sããkoma Aboraham gbɛbogri a kyaare ne a yeldeebo o naŋ da taa kyɛ wa iri a o dɛgre.

Yeldeebo Zie La Ka Naaŋmen Nɔ-eŋnaa Maŋ Tu Nyɛ Eebo

13A noɔre ba naŋ da eŋ ko a Aboraham ane o biiri ka a andonɛɛ na e la ba gbandiruŋ,#4:13 Gbandiruŋ: A Dagaaba mine maŋ yeli ka ‘Kyɛndi.’ da ba tu a bege zie wa o zie bee o biiri zie, kyɛ a da tu la mennoŋ yeldeebo zie. 14Ka a banaŋ naŋ tuuro a bege la na e a gbandiruŋ biiri, ka lɛ a yeldeebo waa la weɛlɛ ka a nɔ-eŋnaa meŋ waa zaglaa. 15Bonso, a bege wa ne la supuriyaaraa, kyɛ benee a bege naŋ ba kye, a bege sããmo meŋ ba kyebe.

16A ŋaa zuiŋ, a nɔ-eŋnaa are la yeldeebo eŋɛ, a dɔgle garaaseɛ zu, a waa bon naŋ wuli ka a Aboraham biiri zaa nyɛ la kyɔɔtaa ka bonnoo ba kyebe. Kyɛ a ba e ka a banaŋ yoŋ naŋ tuuro a bege la, kyɛ a waa la banaŋ meŋ naŋ taa yeldeebo aŋa a Aboraham soobo (bonso, o waa la te zaa saa, 17aŋa ba naŋ da sɛge, “N eɛɛ la ka fo leɛ nemboore yaga saa”); a Naaŋmen na a Aboraham naŋ da sage de, Ona la maŋ korɔ a kuuni nyɔvore kyɛ maŋ e ka boma naŋ daŋ ba kyebe wa bebe. 18A Aboraham da de la o teɛretɔroo#4:18 Teɛretɔroo: A Dagaaba mine maŋ yeli ka ‘Kyelloo.’ eŋ benee teɛretɔroo naŋ ba kye. O da sage deɛ la ka o na leɛ la, “a nemboore yaga saa,” a kyaare ne lɛ ba naŋ da yeli, “A fo bale na waa la yaga yaga lɛ.” 19A Aboraham yeldeebo da naŋ are la kpeɛŋaa aneazaa ka o da nyɛ la o meŋɛ ka o korɔ te seŋ kũũ (bonso, o da kore te tara ŋa yuomo kɔɔ), bee o naŋ da nyɛ ka Saara e la pɔg-ɔre. 20Yeli zaa da ba kyebe a e ka o bonnɔ ne a noɔre Naaŋmen naŋ da eŋ ko o, kyɛ a o yeldeebo da are la kpeɛŋaa, ka o danna Naaŋmen. 21O da sereŋ baŋ ka Naaŋmen na toɔ̃ e la bonna O naŋ da eŋ noɔre ka O na e la. 22A lɛnso ka ba da yeli kyaare ne Aboraham ka a o yeldeebo zuiŋ, “Naaŋmen da de o la ka o e nemmeŋɛ.” 23Pampana ŋa a yelbie ama, “Ba da de o la ka o e” da ba sɛge a Aboraham yoŋ zuiŋ, 24kyɛ ba da sɛge a la te meŋ zuiŋ. Ba na de la te banaŋ naŋ sage de a soba na naŋ da e ka a Yeezu te Daana leɛ-iri a kuuni poɔ ka te e nemmenne. 25Ona la ka ba ko a te yelbebe zuiŋ kyɛ ka ba e ka O leɛ-iri te sonnoŋ zuiŋ.

Currently Selected:

Uro 4: DNTTP

Highlight

Copy