Uro 3

1Ka a naŋ waa lɛ boŋ tɔnɔ ka a Gyuu neɛ taa? Bee boŋ tɔnɔ ka dɛgre iruu taa? 2A taa la tɔnɔ yaga yɛlɛ zaa poɔ. Bonso, a Gyuumine la ka Naaŋmen da daŋ de O yelbiri tere ka ba kaara o zu. 3Boŋ na e ka ba mine ba wa taa yelmeŋɛ? A yeldeebo ba naŋ ba taa na toɔ̃ sãã la Naaŋmen yelmennoŋ bare be? 4A koŋ baŋ waa a lɛ! Aneazaa ka neɛzaa waa la zirŋmaara, kyɛ Naaŋmen eŋ taa la yelmeŋɛ, aŋa ba naŋ da sɛge lɛ:

“Ka ka fo na nyɛ yelmennoŋ yi a fo yelbie poɔ,

ka fo deme bebe a fo sɛrɛɛdiibu poɔ.”

5Kyɛ ka te yelmeŋɛ bataabo wa vɛŋ ka Naaŋmen yelmennoŋ sãã, te na yeli ka boŋ? Ka Naaŋmen ba taa yelmeŋɛ ne O naŋ de O supuriyaaraa dɔgle te be? (N yelee yɛlɛ aŋa nensaala). 6A koŋ baŋ waa lɛ togitogi! Ka lɛ naane wola ka Naaŋmen na toɔ̃ di a andonɛɛ sɛrɛɛ? 7Kyɛ ka n zirii ŋmaabo wa vɛŋ ka Naaŋmen yelmennoŋ e ka O puubu duoro zu, bonso ka ba naŋ kyɛnɛ derɛ saanaa dɔglɔ ma aŋa yelbe-erɛ? 8Ka bonso ka te koŋ yeli (aŋa noba mine naŋ saana te yuori ka tenee la yele), “Yɛ vɛŋ ka te erɛ yelfaare ka ka yelsonne wa”? A saanaa ba naŋ de duori ba seŋ ne ba la!

Neɛzaa Ba Waa Meŋɛ

9Boŋ pãã la? Tenee mɔɔ eŋ seɛɛ la be? Ai, a ba waa lɛ togitogi zaa; bonso, te daŋ wulee la ka Gyuumine ane Giriki noba zaa be la yelbebe kpeɛ̃õ puliŋ, 10aŋa ba naŋ da sɛge lɛ:

“Neɛzaa kyebe a e nemmeŋɛ, neŋyeni gba kyebe;

11neɛzaa kyebe a taa yelbammo,

neɛzaa kyebe a boɔrɔ Naaŋmen.

12Nensaalba zaa bɔrɛɛ la, ba zaa laŋ la taa a leɛ noba naŋ ba taa tɔnɔ;

neɛzaa kyebe a zoro nembaaloŋ,

neŋyeni zaa gba kyebe.”

13“A ba kɔkɔpoore waa ŋa yaare naŋ yuo gaŋ;#3:13 Kɔkɔpoore Waa Ŋa Yaare Naŋ Yuo Gaŋ: A Gyuumine kɔkɔre poɔ, a yeluu ŋa tɛgɛ la: o soba noɔre yelyelii maŋ ko la kũũ.

ka ba bɛllɛ noba ne ba zelɛ.”

“Ba nɔɛ zɛle ne la dompane logi.”

14“Ba nɔɛ paale ne la kaa-emmo ane nɔtuo.”

15“Ba gbɛɛ maŋ e la fɔ̃ɔ̃ ka ba te kyiri zẽẽ;

16sããmo ane laadimee be la ba sobie poɔ,

17kyɛ ka ba ba baŋ a emmaaroŋ sobiri.”

18“Ba ba zoro Naaŋmen togitogi zaa.”

19Pampana ŋa te baŋ ka bonna zaa a bege naŋ yele, o yele korɔ la banaŋ naŋ da be a bege puliŋ, ka ka noɔre zaa na pɔge, kyɛ ka Naaŋmen di a andonɛɛ zaa sɛrɛɛ. 20Bonso, “nensaala zaa koŋ nyɛ mennoŋ Naaŋmen zie” a yi a tontonne a bege naŋ manne biŋ eŋɛ, bonso, a bege zie la ka yelbieri bammo maŋ yi.

Mennoŋ Naŋ Yi Yeldeebo Eŋɛ

21Kyɛ pampana ŋa, a yi a bege puoriŋ, a Naaŋmen mennoŋ yi sããɛ la, ka a bege ane a Ŋmen-yelmanneba da di a danseɛ; 22Naaŋmen wuli la O mennoŋ a ko banaŋ zaa naŋ taa yeldeebo a Yeezu Kirista eŋɛ, bonso, tɛɛtɛɛ zaa ba kyebe. 23A naŋ ta ka nensaalba zaa e la yelbieri a waa tɔɔre ne Naaŋmen veɛloŋ; 24ŋaa ba nyɛ la mennoŋ naŋ waa kyɔɔtaa yi Naaŋmen garaaseɛ poɔ. O da e la a ŋaa yi a faabo naŋ be a Kirista Yeezu eŋɛ, 25Ona la ka Naaŋmen iri tere ka ba maale ne bagre ka O zẽẽ yɔɔ yelbebe sane ko a banaŋ naŋ taa yeldeebo. A Naaŋmen da e la a lɛ ka O wuli O mennoŋ, bonso, a O Naaŋmennoŋ kannyiri zuiŋ la ka O da di suuri ko nensaalba yelbebe zaa ba naŋ da e; 26a da eɛɛ la ka a wuli a zenɛ ŋa ka Naaŋmen waa la meŋɛ, a korɔ banaŋ naŋ taa yeldeebo a Yeezu eŋɛ mennoŋ.

27A pɔloo eebo tɛgɛ pãã la boŋ? A ba taa tɛgɛ. Boŋ tɔ bege la? Toma tommo poɔ la be? Ai, a yeldeebo bege la ka te na tuuro. 28Bonso, tenee sage deɛ la ka neɛ maŋ leɛ la nemmeŋɛ yi o soba yeldeebo eŋɛ, kyɛ a ba e o soba toma zuiŋ, aŋa lɛ a bege naŋ yeli. 29Bee a Naaŋmen e la a Gyuumine yoŋ Naaŋmen? O mɔɔ ba e a Giriki noba meŋ Naaŋmen be? Serɛzaa Naaŋmen waa la a Nemboore-yobo#3:29 Nemboore-yobo: Noba na zaa naŋ da ba waa Gyuumine la a Nemboore-yobo. meŋ Naaŋmen, 30a naŋ pãã waa ka Naaŋmen e la yeni; ka Ona la na e ka banaŋ ba naŋ iri ba dɛgre e nemmenne a yi ba yeldeebo eŋɛ, kyɛ e ka a banaŋ meŋ ba naŋ ba iri ba dɛgre leɛ nemmenne a yi a yeldeebo na ne o zu. 31Te mɔɔ pãã de a bege lɔɔ bare a yeldeebo ŋa zuiŋ be? A koŋ baŋ waa lɛ togitogi! Kyɛ te na maaleŋ tuuro la a bege.

Currently Selected:

Uro 3: DNTTP

Highlight

Copy