Uro 14

Ta Di Fo Tɔsoba Sɛrɛɛ

1Yɛ tuori de banaŋ naŋ ba taa faŋ ba yeldeebo poɔ, kyɛ ka a ta waa ka yɛ boɔrɔ la ka yɛ ŋmɛ nɔkpeɛne ne ba kyaare ne lɛ ba naŋ teɛrɛ. 2A noba mine naŋ taa faŋ ba yeldeebo poɔ sagɛɛ la ka ba na baŋ di la bonzaa, kyɛ ka banaŋ naŋ ba taa faŋ ba yeldeebo poɔ dire zɛvaare yoŋ. 3A banaŋ naŋ dire ta maŋ taa kaabanyɛ kyaare ne a banaŋ naŋ ba dire, ka banaŋ naŋ ba dire ta di banaŋ naŋ dire sɛrɛɛ, bonso, Naaŋmen tuori de ba la. 4Fõõ la aŋ a na di fo tɔsoba kaŋ tontonɔ sɛrɛɛ? A ba meŋɛ daana yoŋ la na baŋ yeli ka ba ba taa saanaa bee ba taa la saanaa. Ba deme na bebe la bonso, a Daana taa la kpeɛ̃õ a na e ka ba are.

5A noba mine maŋ de la a bebiri kaŋ ka o seɛ kaŋ, kyɛ ka ba mine de a bebie zaa ka a waa yeni. Yɛ kanzaa ta vɛŋ ka bonnoo be o teɛroŋ poɔ. 6A banaŋ naŋ maŋ taa a bebiri kaŋ yɛlɛ, maŋ erɛ la lɛ a Daana emmo zuiŋ. A lɛ meŋ la ka banaŋ naŋ maŋ dire bonzaa, maŋ dire a Daana emmo zuiŋ, ba naŋ maŋ puori Naaŋmen bareka kyɛ di zuiŋ. Lɛ la ka banaŋ naŋ ba maŋ dire a boma zaa, ba maŋ di a Daana emmo zuiŋ, kyɛ maŋ puoro Naaŋmen bareka.

7Te ba so temenne nyɔvoɛ, te ba kpi ko temenne meŋ. 8Ka tenee voorɔ, te voorɔ la a Daana eŋɛ, ka tenee kpi te kpi la a Daana eŋɛ. Azuiŋ ka te pãã voorɔ la bee ka te kpie la, a Daana la so te. 9Bonso, a ŋaa zuiŋ la ka a Kirista da kpi kyɛ leɛ-iri voorɔ, ka ka O na e a kuuni ane a voba Daana.

10Bonso ka fo dire fo yɔɔ bee fo yɔɔpuulee sɛrɛɛ? Bee fõõ, bonso ka fo taa kaabanyɛ ne fo yɔɔ bee fo yɔɔpuulee? Bonso, te zaa na are la a Naaŋmen sɛredi-kogi niŋesogɔ. 11Bonso, ba sɛgɛɛ la:

“A Daana yelee la, N naŋ voorɔ zuiŋ, dumo zaa na gbi la N niŋesogɔ,

kyɛ ka zele zaa na danna Naaŋmen.”

12A lɛ zuiŋ, te kanzaa na manne la o meŋɛ yɛlɛ ko Naaŋmen.

Ta Wa Erɛ Ka Fo Tɔsoba Ŋmeɛrɛ Gbɛre Lere

13A lɛ zuiŋ yɛ vɛŋ ka te ta la dire taa sɛrɛɛ, kyɛ yɛ leɛ yɛ eebo a daŋ ta la de gbɛŋmɛ-le bon biŋ yɛ taaba sobie zu bee a pigi ba sobie. 14N baŋɛɛ la kyɛ sage de ka a Daana Yeezu meŋ are ko ma la ka bonzaa ba e dɛgre o meŋɛŋ; kyɛ o maŋ e la bondɛgre a ko banaŋ naŋ teɛrɛ ka o e la bondɛgre. 15Ka bon fo naŋ dire wa vɛŋ ka fo yɔɔ bee fo yɔɔpuulee poɔ wa sãã, ka lɛ, fo ba la kyɛnɛ nɔmmo poɔ. Ta vɛŋ ka bon fo naŋ dire e ka neɛ na zuiŋ a Kirista naŋ da kpi, wɛ. 16A lɛ zuiŋ, ta vɛŋ ka ba yeli fo yelsonne yɛlɛ aŋa a naŋ waa yelfaare. 17Bonso, a Naaŋmen naaloŋ ba e bondirii ane bonnyuuri yɛlɛ, kyɛ o waa la mennoŋ, emmaaroŋ ane popeɛloŋ yɛlɛ a Vooroŋ Soŋ poɔ. 18Naaŋmen poɔ maŋ pɛle ne la soba na naŋ tonɔ korɔ a Kirista, kyɛ ka nensaalba meŋ de o yɛlɛ. 19Yɛ pãã vɛŋ ka te boɔrɔ yɛlɛ naŋ waana ne emmaaroŋ ane te zaa baabo. 20Yɛ ta kaa bondirii yɛlɛ a sãã a Naaŋmen toma bare. Bonzaa sereŋ soma la, kyɛ a ba veɛlɛ ka fo e ka fo taaba kpɛ sããmo poɔ ne bonna fo naŋ dire. 21A soma la ka fo ta ɔɔ nɛne bee a nyu tewɔmɔ dãã bee a e yelzaa naŋ na vɛŋ ka fo yɔɔ ŋmɛ gbɛre. 22A yeldeebo fo naŋ taa, taa o ne fo poɔ zaa Naaŋmen niŋesogɔ. Banaŋ zaa naŋ ba taa yeli na yeli kyaare ne bamenne ka ba sããɛ la ne bon ba naŋ sage de zuiŋ, nyɛ la maaloo. 23Kyɛ banaŋ naŋ taa bonnoo bondiraa eŋɛ kyɛ di sããɛ la, ba naŋ ba e a lɛ ne yeldeebo zuiŋ. Bonso, yelzaa naŋ ba yi yeldeebo poɔ e la yelbieri.

Currently Selected:

Uro 14: DNTTP

Highlight

Copy