Uro 13

Te Feroo Toma A Teŋɛzu Wederebɛ Zie

1Yɛ vɛŋ ka neɛzaa maŋ sigre o meŋɛ korɔ a teŋɛzu wederebɛ; bonso, wederɛ zaa ba kyebe ka Naaŋmen zie naane ka o yi. A wederebɛ banaŋ naŋ bebe waa la noba Naaŋmen naŋ biŋ. 2Azuiŋ, soba na zaa naŋ zagra a wederebɛ noɔre, zagra la bonna Naaŋmen naŋ biŋ, kyɛ banaŋ naŋ zagra a ba nɔɛ na le la sɛrɛɛdiibu poɔ. 3Bonso, banaŋ naŋ erɛ soŋ ba zoro namine, kyɛ banaŋ naŋ erɛ faa la na zoro ba. Fo boɔrɔ la ka fo ta zoro wederebɛ be? Ka lɛ erɛ yɛlɛ naŋ e soŋ, kyɛ ba na puu fo la; 4bonso, a wederebɛ waa la Naaŋmen tontonema naŋ bebe fo maaloo zuiŋ. Kyɛ ka fõõ wa erɛ yɛlɛ naŋ e faa, fo na zoro la dabeɛ̃, bonso, a kpeɛ̃õ a wederebɛ naŋ taa ba e weɛlɛ! Ba waa la Naaŋmen tontonema ka ba korɔ yelfa-erebɛ dɔgroŋ. 5Azuiŋ, a ferɛɛ la ka neɛzaa sagra noɔre, ka a ta e a Naaŋmen supuriyaaraa yoŋ zuiŋ, kyɛ a fo teɛroŋ meŋ zuiŋ. 6A lɛ meŋ zuiŋ la ka yɛ maŋ yɔɔrɔ a zuyɔɔ meŋ; bonso, a wederebɛ waa la Naaŋmen tontonema naŋ kaara a yɛlɛ ŋa ne a zu. 7Yɛ yɔɔ bonna zaa naŋ seŋ ka yɛ yɔɔ ko ba. Yɛ yɔɔ a yɛ zuyɔɔ ko banaŋ zaa naŋ seŋ ka ba de a yɛ zuyɔɔ, a yɔɔrɔ a teŋɛ maaloo zuyɔɔ korɔ banaŋ a naŋ seŋ ka yɛ yɔɔ ko ba. Yɛ korɔ gyeremɛ banaŋ naŋ seŋ ka ba nyɛ gyeremɛ, kyɛ eŋnɛ banaŋ naŋ seŋ ka yɛ eŋnɛ ba.

Yɛ Nɔnɔ Taa

8Yɛ ta di neɛzaa sane, ka nɔmmo yɛ naŋ na nɔŋ taa naane; bonso, soba na naŋ nɔŋ o tɔsoba tu seŋ la lɛ a bege naŋ wuli. 9A Naaŋmen nɔɛ ama, “Ta toŋ moɔrɔ toma; Ta ko neɛ; Ta zuuro; Ta zɛnzɛnɛ ne fo tɔ bon”; a nɔɛ ama ane a nɔɛ na zaa naŋ kyɛre laŋ la taa a kpulli a yeluu ŋa poɔ, “Nɔŋ fo tɔsoba aŋa fo meŋɛ.” 10Nɔmmo soba ba erɛ faa korɔ o tɔsoba; azuiŋ, ka fõõ wa nɔnɔ fo taaba wuli ka fo tu la a bege ka a ta.

Yelnimizeɛ N Naŋ Sɔrɔ

11A yi a yeli ŋa puoriŋ, yɛ baŋ la bonna saŋ naŋ la ŋaa, ka a saŋ taɛ la ka yɛ iri yɛ goɔŋ poɔ. Bonso, a faabo peɛle te la pampana ŋa a gaŋ saŋ na te naŋ da wa leɛ yelderebɛ. 12A zie sɔgɛɛ la gaa tɔɔre yaga, ka zinyaane peɛle. Yɛ vɛŋ ka te pãã lɔɔ a ligruŋ toma bare, kyɛ de a veɛloŋ zɔɔre boma su. 13Yɛ vɛŋ ka te taa gyeremɛ aŋa noba naŋ be veɛloŋ poɔ, kyɛ bare yeldɛgɛ ane daanyukuoli, a bare vɔlfaare ane nenfa-yɛlɛ, a bare zɔɔre ane nyuuri. 14Kyɛ yɛ de a Daana Yeezu Kirista ka O waa yɛ zɔɔzɔɔ-bon, a ta bare vuo fẽẽ zaa ko a eŋɛ vɔlfaare ka a nyɛ a boɔbo.

Currently Selected:

Uro 13: DNTTP

Highlight

Copy