Fiɛlɔ 1
1
Wami he be se nami
1David bi, fiɛlɔ nguaa a nɛ ye matsɛ ngɛ Yerusalem munyuhi ji nɛ ɔmɛ nɛ.
2Ye juɛmi deɔ mi ke, wami nɛ ɔ, se nami ko be he; wami he be se nami. Lɛ tsuo peeɔ yaka! 3Dengme tsuo nɛ nɔmlɔ adesa gboɔ ngɛ je nɛ ɔ mi ɔ, mɛni se e naa? 4Yi nɔhi baa, nɛ a beɔ kɛ yaa. Se je ɔ lɛɛ, bɔ nɛ e ngɛ ɔ, jã kɛ̃ e ngɛ; jã kɛ̃ lɛ e maa hi kɛ maa ya neneene. 5Pu teɔ si nɛ e nɔɔ si, nɛ e he sɔɔ kɛ yaa he nɛ e te si kɛ je ɔ ekohu. 6Kɔɔhiɔ fiaa kɛ yaa leneyi je, nɛ e lɔgɔɔ si kɛ yaa omleyi je. Kikɛ nɛ ɔ kɔɔhiɔ hii si bɔlee hluu kɛ ya suu be nɛ e kpaleɔ kɛ baa he nɛ e fia kɛ je ɔ ekohu. 7Pahi tsuo bee kɛ ya sɛɛ wo mi, se wo hyi we gblegbleegble. Pa amɛ kpaleɔ a se kɛ yaa he nɛ a je ɔ, nɛ a bee kɛ yaa wo ɔ mi ekohu. 8Nɔ́ tsuaa nɔ́ ngɛ je nɛ ɔ mi ɔ peeɔ pɔtɔ kɛ yaka nɛ hi kalemi; nɔ́ hyɛmi kɛ munyu tumi gbi nɔ nya. 9Nɔ́ he ko be je ɔ mi. Nɔ́ nɛ ba hyɛ ɔ, lɔ ɔ kɛ̃ maa ba ekohu. Nɔ́ nɛ a pee hyɛ ɔ, lɔ ɔ nɔuu a maa pee ekohu. 10Anɛ nɔ́ ko ngɛ nɛ a ma tsɛ lɛ nɔ́ he lo? Dɛbi! Jamɛ a nɔ́ ɔ ngɛ kɛ je blema, loko a fɔ wɔ tete po. 11Níhi nɛ be ɔ, nɔ ko nɔ ko kaii we hu. Jã kɛ̃, níhi nɛ maa ba kɛ je be nɛ ɔ mi kɛ yaa a, yi nɔhi nɛ maa ba ngɛ se ɔ, mɛ hu a be kaie.
Fiɛlɔ nguaa a kpa je mi níhi si
12Imi fiɛlɔ ɔ, i hi Yerusalem kɛ ye matsɛ ngɛ Israel ma a nɔ. 13I bɔ mɔde kaa níhi tsuo nɛ a peeɔ ngɛ je nɛ ɔ mi ɔ, ma ngɔ ye nile ɔ kɛ hla mi fitsofitso.
Ní tsumi nɛ Mawu ngɔ ha nɔmlɔ adesa ke e tsu ngɛ je nɛ ɔ mi ɔ, haomi sɔuu; pi ní tsumi nɛ ngɔɔ. 14Níhi tsuo nɛ a peeɔ ngɛ je nɛ ɔ mi ɔ, i na; nɛ i ngɛ dee ke lɛ tsuo yaka. E ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ. 15Nɔ́ nɛ kpɛ̃ ɔ, e hí dami; nɔ́ nɛ bé ɔ, e hí kanemi.
16 #
Mats I, 4.29-31
I de ngɛ ye yi mi ke, “I pee nɔmlɔ nguaa. Nihi tsuo nɛ ye Yerusalem ma a nɔ kɛ sɛ ye hlami ɔ, i le ní kulaa pe mɛ. Ee, nile ɔ, i kpa lɛ si saminya.” 17I bɔ mɔde kaa ma hla slɔɔto nɛ ngɛ nile kɛ godo, aloo nile kɛ kuasia jemi a kpɛti. Se i na kaa nɔ́ nɛ ɔ hu ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ. 18Ní lemi fuu ɔ, haomi sɔuu lɛ ngɛ mi. Ke nɔ ko le ní babauu ɔ, jã kɛ̃ lɛ e haomi hu hiɛ babauu.
Currently Selected:
Fiɛlɔ 1: Dangme
Highlight
Copy
Compare
Share
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
