Fiɛlɔ 2
2
1I to kaa ma fiɛ ye yi nɔ saminya, nɛ ma hyɛ kaa nɔ́ ko ngɛ bua jɔmi mi lo. Se i na kaa enɛ ɔ hu peeɔ yaka gu. 2I kpa si kaa muɔmi ɔ, godo, nɛ bua jɔmi hu se nami be he. 3Ngɛ ye ní lemi ɔ kulaa se ɔ, i pee ye yi mi kaa ma nu dã, nɛ ma fiɛ, konɛ ye nɔ gbagba nɛ te. I susu kaa nɔ́ nɛ hi, nɛ sa nɔmlɔ adesa peemi ngɛ je mi e wami be ɔ tsuo ji nɛ ɔ nɛ.
4 #
Mats I, 10.23-27; Kron II, 9.22-27 I pee ní nguanguahi. I ma tsuhi, nɛ i pee wai ngmɔhi. 5I pee ngmɔhi kɛ abɔɔhi, nɛ i du tsohi nɛ woɔ yiblii slɔɔtohi ngɛ mi. 6I gba nyu dɔhi nɛ i kɛ haa tso ɔmɛ nyu. 7#Mats I, 4.23 I he nyɔguɛhi babauu, nyumuhi kɛ yihi tsuo; nɛ a fɔ nyɔguɛhi babauu kɛ wo ye we ɔ mi. Jehanɛ se hu, i ngɛ nahi kɛ tohi babauu pe nɔ tsuaa nɔ ngɛ Yerusalem. 8#Mats I, 10.10, 14-22 I bua sika hiɔ kɛ sika tsu nya, nɛ i tsu tó ngɛ matsɛmɛ a dɛ, kɛ ye nɔ yemi he ɔmɛ. Nyumuhi kɛ yihi babauu la kɛ jɔɔ ye bua, nɛ i ngɔ yihi babauu bɔ nɛ ma nyɛ.
9 #
Kron I, 29.25
Niinɛ, i pee nɔmlɔ nguaa, nɛ i he biɛ kulaa pe nihi tsuo nɛ sɛ ye hlami ngɛ Yerusalem; ye nile ɔ hu se pui gblegbleegble. 10Nɔ́ tsuaa nɔ́ nɛ i ngɛ hlae ɔ, i naa. Nɔ́ tsuaa nɔ́ nɛ i suɔ kaa ma pee ɔ, i peeɔ; i tsi we ye nya kɛ ji bua jɔmi ko he. Ní tsumi nɛ he wa po, i naa he bua jɔmi. Niinɛ, kikɛmɛ a bua jɔmi nɛ ɔ pɛ ji ye se nami ngɛ dengme tsuo nɛ i gbo ɔ he. 11Jehanɛ, i susu ye nine nya ní tsumi ɔmɛ tsuo a he, kɛ dengme nɛ i gbo ngɛ a he ɔ, nɛ i na kaa lɛ tsuo peeɔ yaka. E ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ; se nami ko be he. 12Ke nɔ ko ngɛ matsɛ yee ɔ, nɔ́ nɛ nihi nɛ sɛ e hlami pee ɔ, lɔ ɔ lɛ hu e maa pee.
Enɛ ɔ he je ɔ, i bɔni nile, godo, kɛ kuasia jemi a he susumi saminya. 13Kɛkɛ nɛ i na kaa nile hi pe kuasia jemi kaa bɔ nɛ la hi pe diblii ɔ. 14Ní lelɔ le he nɛ e yaa; kuasia lɛɛ e li. Se kɛ̃ ɔ, amanehlu kake ɔ nɔuu lɛ baa mɛ ni enyɔ ɔmɛ tsuo a nɔ. 15I de ngɛ ye yi mi ke, “Haomi nɛ maa ba kuasia nɔ ɔ, lɔ ɔ nɔuu lɛ maa ba imi hu ye nɔ. Lɛɛ ye nile babauu ɔ, mɛni se i na ngɛ he mɔ?” I he nɔ ngɛ ye yi mi ke, “Enɛ ɔ hu ji yaka nɔ́ ko; e he be se nami.” 16Ní lelɔ ɔ, nɔ ko kaii we lɛ daa; kuasia hu, jã kɛ̃. Be bɔɔ kɛkɛ nihi a hɛ je mɛ tsuo a nɔ. Ní lelɔ gboɔ kaa bɔ nɛ kuasia gboɔ; slɔɔto be mi. 17Enɛ ɔ he je ɔ, je mi si himi ba gbe ye nya, ejakaa níhi nɛ a tsuɔ ngɛ je ɔ mi ɔ, ekoeko sɛ́ ye hɛ mi. Lɛ tsuo peeɔ yaka, kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.
18Dengme babauu nɛ i gbo ngɛ je nɛ ɔ mi ɔ, i pa sume hu; ejakaa i le kaa níhi tsuo nɛ i bua nya a, ma si kɛ ha nɔ nɛ ma ba ye ye ní ɔ. 19Nɔmlɔ nɛ ɔ ma ba pee ní lelɔ oo, e ma ba pee kuasia oo, mɛnɔ lɛ le? Se kɛ̃ ɔ, níhi tsuo nɛ i ngɔ nile kɛ gbo a he dengme ngɛ je nɛ ɔ mi ɔ, lɛ nɛ ma ba ye. Enɛ ɔ hu ji yaka nɔ́ ko. 20Lɔ ɔ he ɔ, i ba pia ye he kaa i tsu ní wawɛɛ kikɛ nɛ ɔ. 21Ejakaa be komɛ ɔ, nɔ ko maa ngɔ nile, kɛ ga kɛ tsu ní wawɛɛ nitsɛ. Kɛkɛ ɔ, e ma si ha nɔ ko nɛ gbo we nɔ́ ɔ he dengme ko kulaa nɛ e ba ye. Enɛ ɔ hu ji yaka dengme, kɛ yayami agbo. 22Haomi nɛ baa nɔmlɔ nɔ, kɛ dengme babauu nɛ e gboɔ ngɛ je nɛ ɔ mi ɔ, mɛni se lɛ e naa? 23#Hiob 5.7; 14.1 Níhi nɛ nɔmlɔ adesa tsuɔ e wami be ɔ tsuo peeɔ haomi kɛ kɔmɔ yemi sɔuu. Nyɔ mi po e juɛmi ha we lɛ he jɔmi. Enɛ ɔ hu ji yaka nɔ́ ko.
24 #
Fiɛ 3.13; 5.18; 9.7; Luk 12.19; Kor I, 15.32 Lɛɛ nɔ́ nɛ sa adesa peemi ji kaa e ye ní, nɛ e nu ní, nɛ e na bua jɔmi kɛ je e dengme gbomi ɔ mi. Se kɛ̃ ɔ, i na kaa enɛ ɔ hu je Mawu ngɔ. 25Ke pi Mawu he ɔ, mɛnɔ maa ye ní, nɛ mɛnɔ ma na bua jɔmi? 26#Hiob 32.8; Abɛ 2.6 Nihi nɛ peeɔ Mawu suɔmi nya ní ɔ, Mawu haa mɛ nile, ga, kɛ bua jɔmi. Se yayami peeli lɛɛ, e haa a tsuɔ ní, nɛ a buaa níhi a nya, konɛ e ngɔ ngɛ a dɛ kɛ ha ni nɛmɛ nɛ peeɔ lɛ, Mawu ɔ suɔmi nya ní. Enɛ ɔ hu ji yaka nɔ́ ko; e ngɛ kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.
Currently Selected:
Fiɛlɔ 2: Dangme
Highlight
Copy
Compare
Share
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
