Romnima 14

Miri ka a ti a kpee zalige

1Deemiya ninvuɣ’ so ŋun yɛda bi kpɛm’ Naawuni dolibu ni, amaa ka di niŋy’ o naŋgbankpeeni o ni chihiri shɛli zuɣu. 2Ninvuɣ’ so beni n-diri binshɛɣukam, ka ninvuɣ’ so ŋun yɛda bi kpɛm’ mi kul dirila bindir’ gahinda. 3Ka ŋun diri binshɛɣukam miri ka o ʒiɛm ŋun gbaar’ omaŋa ni di dibu, ka ŋun gbaar’ omaŋ’ maa mi miri ka o ti ŋun diri shɛlikam zalige; dama Naawuni deei dilana gba. 4Ka ŋuni n-lee nyɛ a ka a tiri ninvuɣ’ so dabili zalige? O zanibu bee o lubu nyɛla o duuma yɛla. Ka o shiri ni zani, dama ti Duuma Naawuni ni tooi chɛ ka o zani.

5Ninvuɣ’ so beni n-tɛhi ni dabisi’ shɛli so di kpee, ka so mi beni n-tɛhi ni dabisa zaa nyɛla yim. Chɛliya ka sokam doli o ni tɛhi shɛm omaŋmaŋ’ suhu ni. 6#Kol 2.16 Ŋun gbib’ dabisi’ shɛli, o gbib’ li mi n-tiri ti Duuma jilima. Ka ŋun diri binshɛɣukam, o diri li mi n-tiri ti Duuma jilima, o ni paɣiri Naawuni di zuɣu la zuɣu; ka ŋun gbaar’ omaŋa ni binshɛɣukam dibu, o niŋdi lala n-tirila ti Duuma jilima ka paɣiri Naawuni di zuɣu. 7Ti ni so bi be omaŋmaŋ’ zuɣu, ka ti ni so mi bi kpiri omaŋmaŋ’ zuɣu. 8Ti yi be, ti Duuma zuɣu ka ti be; ka ti yi kpi, ti Duuma zuɣu ka ti kpi; dinzuɣu ti yi bemi bee ti yi kpimi, ti Duuma n-su ti. 9Dama daliri din chɛ ka Masia daa kpi ka lan neei kum ni nyɛla ni di chɛ ka o leei bɛn kpi mini bɛn ne Duuma. 10#2 Kɔr 5.10 Ka bɔzuɣu ka a tir’ a kpee zalige bee bɔzuɣu ka a ʒiɛmd’ a kpee? Dama ti zaa ni ti zani Naawuni tooni ka o kari ti saria 11#Aiz 45.23 kaman di ni sab’ shɛm la:

Ti Duuma yɛliya, “N ni be ŋɔ zuɣu,

sokam ni ti gbani n tooni,

ka sokam ti yaag’ o noli

m-paɣi man’ Naawuni.”

12Dinzuɣu ti zaa ni ti kahigi ti tuma ni nyɛ shɛm wuhi Naawuni.

Di tum din ni chɛ ka a kpee lu

13Dinzuɣu di chɛliya ka ti lan tiri ti tab’ zalige, yi mi di chɛliya ka ti tum din ni gu ti kpee soli bee n-chɛ ka o tuui lu. 14N Duuma Yisa zuɣu, m mi ka biɛhiŋ kani ni binshɛɣ’ kani m-mali daɣiri dimaŋmaŋ’ puuni, amaa so yi tɛhi ni binshɛli mali daɣiri, o sani di shiri mali daɣiri. 15Ka a ni diri binshɛli zuɣu yi chɛ ka a kpee suhu miligi, dindina a bi doli yurilim soli. Di chɛ ka a ni diri binshɛli zuɣu chɛ ka Yisa Masia ni kpi a kpe’ so zuɣu bahi yoli. 16Dinzuɣu di chɛ ka din nyɛ zaɣ’ suŋ a sani leei niriba ni galindi shɛli. 17Dama Naawuni nam pala bindira mini binnyura yɛla, amaa di nyɛla wuntia mini suhudoo ni suhupiɛlli yɛla Naawuni Shia Kasi zuɣu. 18Ka Naawuni nini ni tiɣi ŋun jɛmdi Masia lala, ka ninsalinim’ gba ni di o shɛhira suŋ.

19Dinzuɣu chɛliya ka ti doli din ni chɛ ka naŋgban’ yini be ti sunsuuni mini din ni kpaŋsi tab’ suhuri. 20Di zaŋya bindira dibu yɛla saɣim Naawuni tuma. Binshɛli kani n-chihiri dibu, amaa di nyɛla taali ni so chɛ ka o ni diri binshɛli zuɣu chɛ ka o tab’ lu. 21Di bi tuhi ni nir’ ŋubi nimdi bee n-nyu dam bee n-niŋ binshɛli din ni chɛ ka o kpee tuui lu. 22Chɛ ka a ni niŋ yɛda shɛm a suhu ni be a mini Naawuni sunsuuni. Ninvuɣ’ so ŋun tɛha bi chihir’ o suhu o ni niŋdi shɛli zuɣu mali suhupiɛlli. 23Amaa ŋunkam mali biɛhiŋ zaŋ chaŋ o ni diri shɛli polo ka diri li mali taali o ni niŋdi shɛli maa ni bi yi yɛda niŋbu ni na zuɣu, dama binshɛɣukam din bi yi yɛda niŋbu ni na nyɛla alahichi.

Currently Selected:

Romnima 14: DBwDB

Highlight

Copy