Kahigibu 2

Jɔn sabi n-ti Ɛfɛsus Cheechi

1 “Sabimi n-ti Ɛfɛsus Cheechi malaika n-yɛl’ o ni ŋun gbibi saŋmaris’ ayopɔin o nudirigu ni m-be salima firilatamdis’ ayopɔin sunsuuni n-chani gindi la ni yɛli shɛm m-bɔŋɔ: 2M mi yi tuma ni nyɛ shɛm, ka mi yi ni nahindi shɛm yɛla mini yi daania niŋbu ni yi ni je tuumbiɛrinim’ shɛm yɛla. N lan mi yi ni kpahim ninvuɣ’ shɛb’ bɛn zaŋ bɛmaŋa m-boli Yisa tuumba, amaa ka pa o tuumba la ni yi ni nya ka bɛ nyɛla ʒirinim’ la. 3M mi ni yi niŋ ania n-saɣi nahiŋgu n yuli zuɣu, ka na bi tiri gbini. 4Amaa yɛl’ yini zuɣu ka n naɣ’ galim ya: Yi bahi yi tuuli yurilim la. 5Kpahimmiya m-baŋ yi galimi ni yi shɛl’ na, ka niŋ tuuba n-lan lab’ yi tuuli yurilim la ni yaha. Di yi pa lala n ni kana nti kpuɣi yi firilatamdigu la di zaashee. 6Amaa yi ni naɣ’ niŋdi zaɣ’ viɛl’ shɛli m-bɔŋɔ: Yi je Nikolaus nyaanzaaniba tuma kaman man’ gba ni je li shɛm.

7 # Pil 2.9; Kah 22.2; Ɛzɛk 28.13; 31.8 “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!

“Ŋun di nasara, n ni ti chɛ ka o di nyɛvili ti’ shɛli din be Naawuni yil’ la wala.

Jɔn sabi ti Smɛɛna Cheechi

8 # Aiz 44.6; 48.12; Kah 1.17; 22.13 “Sabimi n-ti Smɛɛna Cheechi malaika n-yɛl’ o ni ŋun nyɛ piligu ni bahigu ka nyɛ ŋun daa kpi ka lan nee’ la ni yɛli shɛm m-bɔŋɔ: 9M mi yi wahala dibu ni yi fara yɛla, amaa yinima n-lee nyɛ azichinima. Ka lan mi ninvuɣ’ shɛb’ bɛn tɔɣisiri yɛtɔɣ’ biɛri n-jɛndiri ya, ka yɛri ni bɛ nyɛla Yɛhudianim’ la gba yɛla. Bɛ pala Yɛhudianima, amaa bɛ nyɛla Sintani jɛmdiba. 10Di zɔriya yi ni yɛn nya nahiŋgu shɛli. Nyamiya, Sintani ni ti kpɛhi yi ni shɛb’ sarika n-zahim ya, ka yi ni nya nahiŋgu biɛɣ’ pia. Ka ŋun ʒe yim hal ti paai kum, n ni ti o nyɛvili nam zuɣupiligu.

11 # Kah 20.14; 21.8 “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!

“Ŋun di nasara ti ku lan kpi kum din pahi buyi la yaha.

Jɔn sabi n-ti Pɛɛgamum Cheechi

12 “Sabimi n-ti Pɛɛgamum Cheechi malaika n-yɛl’ o ni ŋun mali takɔb’ dirili din mali naŋgbana ayi la ni yɛli shɛm m-bɔŋɔ: 13M mi ni yi ni be luɣ’ shɛli nimaani ka Sintani nam ʒiishee be. Hal ka bɛ daa ti gbaai n shɛhiralana Antipas ŋun daa ʒe ma yim yi ni la n-ku o Sintani biɛhigu shee, amaa ka yi na kul ʒe ma yim ka bi chɛ ma dolibu. 14#Kal 22.5, 7; 31.16; Zal 23.4; Kal 25.1-3 Amaa yɛl’ shɛŋa zuɣu ka n naɣ’ galim ya: Yi ni shɛb’ dolila Balaam wuhibu. Ŋuna n-daa wuhi Balak ka o bo kuɣituurili sɔŋ Izraɛlnim’ sol’ zuɣu ni bɛ di buɣa maligu nimdi ka tum zina la. 15Ka yi ni shɛb’ mi doli Nikolaus nyaanzaaniba wuhibu din nyɛ n ni je shɛl’ la. 16Dinzuɣu niŋmiya tuuba! Di yi pa lala, di ku yuui ka n ka yi sanna nti zaŋ n nol’ ni takɔb’ la tuhi bɛn niŋdi lala maa tɔbu.

17 # Yibu 16.14-15; 16.33-34; Jɔn 6.48-50; Aiz 62.2; 65.15 “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!

“Ŋun di nasara, n ni chɛ ka o di bindir’ sɔɣira la shɛli, ka lan zaŋ kuɣ’ piɛlli ti o, ka yu’ palli sabi pa di zuɣu; ka so ku baŋ yuli maa naɣila ŋun dee’ li maa kɔŋko.”

Jɔn sabi gbaŋ ti Taiatira Cheechi

18 “Sabimi n-ti Taiatira Cheechi malaika n-yɛl’ o ni Naawuni Bia ŋun nina ŋmani buɣim zilinli ka o napɔnvari nyɛlisiri kaman daanya viɛlli la ni yɛli shɛm m-bɔŋɔ:

19 “M mi yi tuma ni nyɛ shɛm. M mi yi yurilim mini yi yɛda niŋbu ni yi ni tumdi shɛlikam n zuɣu zaŋ tabili yi daania niŋbu yɛla, ka lan mi yi pumpɔŋɔ tuma ni gari yi tuuli tuma shɛm la gba yɛla. 20#1 Nan 16.31; 2 Nan 9.22, 30 Amaa yɛl’ yini zuɣu ka n naɣ’ galim ya: Yi ni wum ti paɣ’ so ŋun bol’ omaŋa anabi ka o yuli booni Jɛzibɛl la zuɣu. O nyɛla ŋun yɔhindi n jɛmdiba n-wuhiri ba ka bɛ niŋdi zina, ka diri buɣa maligu nimdi. 21N daa ti o dahima ni o niŋ tuuba o zina niŋbu maa zuɣu, amaa ka o zaɣisi tuuba maa niŋbu. 22Nyamiya, n ni vil’ o bahi o bindoo zuɣu, ka o mini bɛnkam niŋ o zina ni nya wahala pam naɣila bɛ niŋla tuuba bɛ ni tum shɛm o sani maa zuɣu. 23#Yila 7.9; Jɛr 17.10; Yila 62.12 Di nyaaŋa n ni ku paɣ’ maa bihi, ka cheechinim’ zaa baŋ ni mani n-nyɛ ŋun vihiri baŋdi din be salinim’ suhuri ni mini bɛ tɛha ni, ka nyɛ ŋun ni ti yi zaa yinoyino yi tuma ni simdi shɛm laara.

24 “Amaa yinim’ Taiatiranim’ bɛn kpalim ka bi doli wuhibu maa, ka mi na bi bɔhim bɛ ni shɛb’ ni booni shɛli Sintani ashili yɛl’ kara tuma la, n yɛri ya mi ni n ku zaŋ ʒi’ tibisi’ shɛli n-ʒili ya. 25Dinzuɣu kul gbibiya yi ni pun mali shɛl’ la kirikiri hal ka n ti kana. 26#Yila 2.8-9 Ŋun di nasara ka tumdi n yubu hal nti paai di bahigu, n ni ti o yiko ka o su zuliya paai shɛm fukumsi. 27Ka o ni zaŋ kurigu jaaŋgbee n-su ba, ka to n-wurim ba kaman yaɣiri duɣiri ni ŋmari n-wurisiri shɛm la, ka o yiko maa ni be kaman mmaŋmaŋ’ gba ni daa deei yiko shɛli m Ba Naawuni san’ la; 28ka n ni lan ti o biɛŋmariga pahi.

29 “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!”

Currently Selected:

Kahigibu 2: DBwDB

Highlight

Copy

Compare