Kahigibu 19

1Dimbɔŋɔ nyaaŋa ka n daa wum kukol’ shɛli damli kaman salo pam kukoya la ka di yi alizanda ni na yɛra, “Haliluya! Ti Duuma Naawuni n-su tiliginsim mini yiko, ka simdi tibigibu! 2#Zal 32.43; 2 Nan 9.7 O saria dibu dolila yɛlimaŋli soli ni din tuhi. O kari pagɔr’ biɛɣu ŋun zaŋ o zina niŋbu n-saɣim dunia la saria, ka bɔh’ o biɛri ti o ni daa yihi ŋun’ Naawuni dab’ shɛb’ ʒim la.” 3#Aiz 34.10 Ka bɛ daa lan kuhi yɛli, “Haliluya! Tin’ titali maa buɣim dibu nyɔhi kul ni tuɣiri hal ni saha din ka bahigu!” 4Ka kpamba pisinaanahi la mini binnɛma anahi la gbani n-jɛmdi Naawuni ŋun ʒi nam ʒiishee la ka yɛra, “Ami! Haliluya!”

Naawuni Piɛbila amiliya lɔbu chuɣu puhibu

5 # Yila 115.13 Ka kukol’ shɛli daa yi nam ʒiishee maa gbin’ na yɛra, “Yinim’ bɛn zaa nyɛ wɔɣira mini tarimba, ka nyɛ Naawuni daba bɛn zɔr’ o ŋɔ paɣimiya Naawuni!” 6#Ɛzɛk 1.24; Yila 93.1; 97.1; 99.1 Di saha ka n daa wum kukol’ shɛli damli kaman salo pam kukoya la, ka di vuri kaman kokpɛɣu ni saa tahibu la yɛra, “Haliluya! Ti Duuma Naawuni, Zallakudura Naa n-su nam! 7Chɛliya ka ti suhuri piɛla, ka ti duh’ o ka tibig’ o, dama Piɛbil’ la amiliya lɔbu saha paaya, ka o daamiliya paɣ’ maa pun mali shili. 8Ka Naawuni ti o binyɛr’ piɛlli din nyɛlisiri ka be nyam ni o ye. Binyɛr’ piɛlli maa nyɛla wuntizɔriba wuntia tuma.”

9 # Mat 22.2-3 Ka malaika maa yɛli ma, “Sabimi dimbɔŋɔ sɔŋ: Ninvuɣ’ shɛb’ bɛ ni boli ni bɛ ka Piɛbil’ maa amiliya lɔbu chuɣu bindirigu dibu ni na mal’ alibarika!” Ka lan yɛli ma, “Dimbɔŋɔnim’ shiri nyɛla Naawuni yɛligu maŋli.”

10Di saha ka n gban’ o tooni ni n jɛm o, ka o yɛli ma, “Di niŋ lala! N nyɛla a dab’ kpee ni a mabihi bɛn gbibi Yisa shɛhira la ni yino. Jɛmmila Naawuni!”

Dama bɛn gbibi Yisa shɛhira nina neerimi kaman anabinim’ nina ni neeri shɛm.

Ŋun bari wɔr’ piɛlli

11 # Ɛzɛk 1.1; Yila 96.13; Aiz 11.4 Di saha ka n daa nya ka zuɣusaa bɔɣi, ka n nya wɔr’ piɛli. Ŋun daa ʒi o zuɣu yuli daa boonila Ʒiɛyim mini Yɛlimaŋli. Ka o daa mali wuntitali n-kariti saria ka tuhiri tɔbu. 12#Dan 10.6 O nina daa ŋmanila buɣim zilinli, ka nam zuɣupila pam pil’ o zuɣu ni; ka yu shɛli sabi tab’ o, ka so ʒi li pah’ o zuɣu. 13Ka o ye binyɛr’ shɛl’ din ŋam ʒim, ka o yuli daa booni Naawuni Yɛligu. 14Ka alizanda ni tɔbbihi ye binyɛr’ piɛla din piɛli ka be kasikasi m-bari wɔr’ piɛla dol’ o. 15#Yila 2.9; Aiz 63.3; Joɛl 3.13; Kah 14.20 Ka takɔb’ dirili yir’ o nol’ ni na, ka o zaŋ li n-zabi nyaŋ zuliya kam, ka zaŋ kurigu jaaŋgbee n-su ba; ka siɣi Naawuni Zallakudura Naa suhuyiɣisili wain tɔɣiri adaka puuni nɔri ginda. 16Ka yu’ shɛli sabi pa o binyɛrigu min’ o gbalipini zuɣu. Di ni daa sab’ shɛm m-bɔŋɔ: “Nanim’ zaa Naa ni duumanim’ zaa Duuma.”

17Di saha ka n daa nya malaika so ka o ʒe wuntaŋa n-kuhiri pampam booni noonsi bɛn yiɣiri zuɣusaa ha yɛra: “Laɣimmiya na nti di Naawuni ni tin ya bindir’ shɛli ŋɔ! 18#Ɛzɛk 39.17-20 Kamiyana nti dinya nanim’ mini sapashinnim’ ni kpiɔŋlaannim’ ni yuri mini bɛn bari ba zaŋ tabili daadam kam bɛn nyɛ bilichinnim’ mini daba ni wɔɣira mini tarimba nimdi!”

19Ka n daa nya ka biŋkɔbigu la mini dunia nanima ni bɛ tɔbbihi laɣim lo tɔbu ni bɛ tuhi ŋun ʒi wɔhu zuɣu maa min’ o tɔbbihi. 20#Kah 13.1-18 Ka bɛ daa gbaai biŋkɔbigu maa min’ anabi ʒirilaan’ so ŋun daa be o sani n-wuhiri shihira n-yɔhindi ninvuɣ’ shɛb’ bɛn daa mali ŋun’ biŋkɔbigu maa dalinli mini bɛn jɛmd’ o binnan’ la. Ka bɛ daa zaŋ biŋkɔbigu maa min’ o daanabi maa zaɣ’ nɛma m-bahi buɣim teeku din buɣim nyɛ chilibi buɣim n-diri la ni. 21Ka ŋun daa ʒi wɔhu zuɣu maa zaŋ takɔbi din yir’ o nol’ ni na ku bɛn kpalim, ka noonsi zaa daa di nimdi tiɣi.

Currently Selected:

Kahigibu 19: DBwDB

Highlight

Copy

Compare