Ŋaha 17
17
1Nir’ yi ŋubiri ka’ kuma ka mali suhudoo, di so yil’ shɛli nim’ bɛn diri bindir’ nyaɣisa ka zabili be di yili maa ni.
2Dabili ŋun mali yɛm ni ti su bidɔɣiro ŋun tumdi vi tuma, ka ni ti di fali kaman daŋ ni nir’ la.
3Duɣu ka bɛ mali buɣisiri anzinfa, ka zaŋdi buɣim pam buɣisiri salima, amaa Yawɛ m-buɣisiri ninsal’ suhu.
4Tuumbiɛtumda gbilisiri tibili wumdi ninvuɣ’ biɛɣu yɛtɔɣa, ka ʒiŋmara mi gbilisiri tibili wumdi yɛtɔɣ’ biɛri.
5Bɛnkam maani nandaamba ansarisi turila ŋun nam ba. Ka bɛnkam mali suhupiɛlli bɛ tab’ daashaara zuɣu ni nya tibidarigibo.
6Yaansi nyɛla ninkura jilima zuɣupiligu; ka bihi mi jilima nyɛ bɛ laamba.
7Yɛtɔɣ’ viɛla tɔɣisibu bi mili jɛrigu, ka ʒiri gba yɛtɔɣa bi simdi nabia.
8Birapu tibu ŋmanila tim bɛn tiri li sani, bɛ yi kul chaŋ luɣilikam bɛ dirila nasara.
9Ŋunkam chɛri ŋun turi niriba taali paŋd’ o nyɛla ŋun bɔri zɔtali, amaa ŋunkam teeri zabili nyɛla ŋun saɣindi zɔtali.
10Saɣisigu kpɛri ninvuɣ’ so ŋun mali tɛhi’ zilima pam n-gari bɛ fiɛbi jɛrigu fiɛbiga bukɔbiga.
11Ninvuɣ’ biɛri kul bɔrila duŋtaabo, amaa bɛ ni tim tumo ŋun nyɛ putɔɣulana ka o lu bɛ zuɣu.
12Bɛ yi gbaai jɛŋgbin’ nyaŋ bia ka chɛ o ka o chirig’ a, di so ni a zaŋ a nyɔɣu yo jɛrigu o jɛrilim tuma saha.
13Nir’ yi zaŋ zaɣ’ biɛɣu yo zaɣ’ viɛlli samli, zaɣ’ biɛɣu ku milig’ o yiŋa.
14Zabili piligu ŋmanila bɛ ni yi cheei kom bahi la, dinzuɣu zom’ yi zabili ni ka di na bi piligi.
15Ŋunkam ti ninvuɣ’ biɛɣu yɛlimaŋli mini ŋunkam galim wuntizɔra, di zaa nyɛla din chihiri Yawɛ sani.
16Bɔzuɣu ka jɛra gbibi liɣiri ni bɛ da yɛm, ka lee nyɛ bɛn ka yɛm din ni tooi bɔhim?
17A zo nyɛla ŋun yur’ a sahakam, ka mabihi mi nyɛ bɛ ni dɔɣi shɛba ni bɛ sɔŋdi taba ashaara saha.
18Ninvuɣ’ so ŋun ka yɛm n-ni saɣi po pɔri n-zan’ o kpee nyaaŋa ni o di samli.
19Ŋunkam yuri zabili nyɛla ŋun yuri alahichi. Ŋun me dunɔbia din du pam nyɛla ŋun bɔri kɔb’ kaba.
20Ninvuɣ’ so ŋun suhu bi ʒe yim ku tɔŋ. Ka ŋunkam ŋmari ʒiri kul bela barina ni.
21Ŋun dɔɣi jɛrigu nya yɛla; jɛrigu ba ka suhupiɛlli.
22Suhupiɛlli nyɛla tila’ suŋ, amaa suhugarigu din’ nyɛla din kuuri kɔba.
23Ninvuɣ’ biɛɣu deeri birapu ashilɔni ni di chɛ ka o taɣi zaligu soya.
24Ŋun mali tɛha yuuni bɔrila yɛm, amaa jɛrigu ŋun kul lihirila dunia luɣilikam.
25Bihi bɛn nyɛ jɛra tirila bɛ banim’ suhugarigu, ka tiri bɛ ma ŋun dɔɣi ba biɛrim.
26Di bi tu ni bɛ zali ŋun ka taali samli bee ka bɛ fiɛbi kpambaliba bɛ biɛrisuŋ zuɣu.
27Ninvuɣ’ so ŋun bi tɔɣisiri yɛtɔɣa yiriŋ nyɛla ŋun mali baŋsim, ka ninvuɣ’ so ŋun mali suɣilo nyɛ ŋun mali tɛhi’ zilima.
28Hal jɛra bɛn fo n-ʒiya, bɛ ni boli ba yɛnnima, bɛ yi bi yaai bɛ noya bɛ ni kali ba pahi yɛnnima ni.
Red Letter Dagbani Bible © Bible Society of Ghana, 2011