Ŋaha 16
16
1Suhu ni nia lɔbu nyɛla daadamnim’ dini, amaa zilinli ni yɛn garigi shɛm yirila Yawɛ sanna.
2Ninsal’ soya zaa ni tooi nyɛla din viɛl’ o sani, amaa Yawɛ n-nyɛ ŋun zahindi ninsal’ suhu.
3Zaŋm’ a tuma niŋ Yawɛ nuu ni, ka a ni lo nia shɛŋa niŋ pali.
4Yawɛ nam binshɛlikam la ni di daliri, hal ninvuɣ’ biɛri benila bɛ wahala nyabu dali zuɣu.
5Karimbaani niŋbu kam nyɛla din chihiri Yawɛ sani. Baŋmiya ni bɛ ku yi tibidarigibo ni.
6Noli deebu mini ʒiɛyimtali zuɣu ni chɛ ka nir’ daalahichi kpihim, ka Yawɛ jɛmbu ni chɛ ka nir’ yi zaɣ’ biɛɣu ni.
7Niriba soya yi tiɣi Yawɛ nini, hal o ni chɛ ka bɛ mini bɛ dimnim’ be ni suhudoo.
8Nir’ yi mali biɛla ka wuntitali be di ni, di so ni nir’ mali pam ka di bi doli yɛlimaŋli soli.
9Ninsal’ tɛha n-wuhir’ o soli, amaa Yawɛ n-wuhir’ o o ni yɛn chani shɛm.
10Anabitali yɛtɔɣa nyɛla din be naa noli ni, ka o ka alahichi saria karibu ni.
11Sania din nyɛ yɛlimaŋli mini binyara zahimbu din nyɛ yɛlimaŋli nyɛla Yawɛ dini. Bintibisa zaa din be kpalaŋ’ puuni nyɛla o tuma.
12Di nyɛla din chihiri ni nanim’ tum zaɣ’ biɛɣu, dama wuntitali soli ka bɛ doli zali nam.
13Wuntizɔra yɛtɔɣa nyɛla naa ni yu shɛli, ka o yuri ninvuɣ’ shɛb’ bɛn yɛri yɛlimaŋli.
14Naa suhuyiɣisili nyɛla kum tumo, ka ŋun mali yɛm ni maai li.
15Naa suhu yi ti piɛla, alaafee benimi. Ka o nirilim ŋmanila sagbana din tahiri siɣili saa na.
16Nir’ yi nya yɛm, di so salima, ka nir’ yi pii tɛhi’ zilima, di so anzinfa.
17Wuntizɔriba solɔɣu nyɛla din lɔɣiri zaɣ’ biɛɣu. Ka ninvuɣ’ shɛb’ bɛn gbibi bɛmaŋ’ bɛ soli ni nyɛla bɛn tiligiri bɛ nyɛviya.
18Karimbaani tahirila saɣiŋgu na, ka maŋduhibu mi tahiri lubu na.
19A yi nyɛ tarima m-be nandaamba sani, di so ni a mini karimbaannim’ pirigiri bɛ ni ŋmɛri diri neen’ shɛŋa.
20Bɛn gbilisi tibili wum yɛlli ni tɔŋ. Ka bɛn niŋ Yawɛ naani ni mali suhupiɛlli.
21Ninvuɣ’ so ŋun mali yɛm nyɛla ŋun mi yɛla woligibu, yɛtɔɣa viɛla mi kpaŋsiri balima.
22Yɛm nyɛla nyɛvili kɔbilinina ninvuɣ’ so ŋun mal’ li sani, amaa jɛrilim nyɛla din darigiri jɛra tibili.
23Yɛnnim’ chɛ ka bɛ yɛtɔɣa viɛla; ka bɛ zaŋdi balima yɛtɔɣa niŋdi bɛ noya ni pahira.
24Yɛtɔɣ’ viɛla ŋmanila shigbaŋ, di nyaɣisi niriba sani ka nyɛ din tiri niŋgbuŋ alaafee.
25 #
Ŋaha 14.12
Shɛlini so’ shɛli ni tooi beni ŋmani din viɛla, amaa ka di bahigu ti nyɛ kum soli.
26Tumtumdiba ni bɔri bindirigu zuɣu n-chɛ ka bɛ tumdi tuma, ka kum nyɛ din kpaŋsiri ba ka bɛ tumda.
27Ninvuɣ’ yoya nia nyɛla nia biɛri, ka bɛ yɛtɔɣa ŋmanila buɣim nyoori niriba.
28Ninvuɣ’ biɛɣu kul bɔrila zabili, ka tikuba mi woligir’ nir’ min’ o zɔsimo.
29Gadamanim’ yɔhindi bɛ ʒiʒiinitaba n-zaŋdi ba doli so’ shɛli din bi viɛla.
30Ŋunkam kahindi nini nyɛla ŋun lo zaɣ’ biɛɣu, ka ŋun dimd’ o naŋgbampiba nyɛ tuumbiɛtumda.
31Zab’ piɛla nyɛla jilima nam zuɣupiligu, Wuntizɔbo biɛhigu puuni ka di yirina.
32Ŋun suhu bi yiɣisiri yomyom so ŋun mali kpiɔŋ. Ka nir’ yi ni tooi gbaag’ omaŋ o suhuyiɣisili saha, di so ŋun ŋme n-deei tin’ muni.
33Ninsalinim’ pihiri kuɣa sɔŋda ni bɛ baŋ din beni, amaa Yawɛ kɔŋko n-zaan’ o ni bɔri shɛli.
Red Letter Dagbani Bible © Bible Society of Ghana, 2011