Kalinlinima 36
36
Paɣ’ shɛb’ bɛn kuli dɔbba tarili yɛla
1Ka Makiri bia Giliad ŋun daa nyɛ Yisifu bia Manaasa yaaŋa la daŋ puuni dunoya dɔɣirikpamba daa ka Musa mini Izraɛlnim’ dunoya dɔɣirikpamba sanna 2#Kal 27.7 nti yɛli ba, “Yawɛ daa yɛli nyini n dan’ Musa ni a pihim’ kuɣa sɔŋ lihi nya ka piri tiŋgbɔŋ ŋɔ tari Izraɛlnima. Yawɛ daa lan yɛli nyini n dana ni a zaŋm’ ti mabia Zɛlɔfɛhad tarili ti o bipuɣinsi. 3Amaa bɛ yi kuli Izraɛl zuliya daŋ shɛli puuni niriba, dindina ti yaannim’ tarili ni ka bɛ tarili ni yina, ka bɛ zaŋ li pahi bɛ ni kuli daŋ shɛli puuni dɔbba maa tarili ni; di saha ka di yi ti tarili ni. 4Ka yuun’ shɛli Izraɛlnim’ ni labisiri nɛma tiri tab’ la#36.4 NƐMA LABISI TI YUUNI: Di daa yi ti niŋ yuun’ pihinu, Izraɛlnim’ daa yi bahirila bɛ maŋmaŋ’ zuliya bɛn be bɛ sani tumdi bɛ tuma kaman daba sama zuɣu la. Ka bɛ daa yi kɔhi tiŋgbani palo gba bɛ labisiri li mi ti dilana bee o zuliya. saha yi ti paai, bɛn’ zaŋm’ bɛ tarili maa pahi bɛ ni kuli daŋ shɛli puuni dɔbba maa tarili ni, ka bɛ tarili maa ku lan be ti yaannim’ tarili ni.”
5Dinzuɣu ka Musa daa zaŋ zaligu din yi Yawɛ sanna zali Izraɛlnima. O daa yɛli ba, “Yisifu zuliya niriba maa ni yɛli shɛm maa nyɛla yɛlimaŋli. 6Yawɛ ni yɛli shɛm zaŋ chaŋ Zɛlɔfɛhad bipuɣinsi maa polo n-nyɛ ni bɛ kulim’ bɛ suhuri ni yu’ dɔbba shɛba, amaa ni bɛ lee kulimila bɛmaŋmaŋ’ daŋ puuni dɔbba. 7Di bi simdi ni di zaŋ Izraɛl zuliya shɛli fali tarili ni nyɛ shɛli n-tom ti Izraɛl zuliya daŋ shɛli nima; dama di simdi ni Izraɛlnim’ zaa kul gbibila bɛ yaannim’ daŋ fali tarili ni nyɛ shɛli. 8Ka bipuɣiŋga kam ŋun mali tarili Izraɛlnim’ daŋ shɛli puuni, di simdi ni o kulila o yaannim’ daŋ ni doo, ka lala chɛ ka Izraɛl nir’ kam kul su o yaannim’ fali tarili ni nyɛ shɛli. 9Miriya ka yi zaŋ daŋ shɛli niriba fali tarili n-tom ti daŋ shɛli niriba; dama di simdi ni Izraɛlnim’ daŋ kam niriba vili gbibila bɛmaŋmaŋ’ fali tarili.”
10Ka Zɛlɔfɛhad bipuɣinsi maa daa shiri niŋ kaman Yawɛ ni daa zali Musa shɛm maa. 11Mahila mini Tiriza ni Hɔgila ni Milika ni Nɔa bɛn daa nyɛ Zɛlɔfɛhad bipuɣinsi maa daa kulila bɛ ba tizɔbihi bidibisi. 12Bɛ daa kulila Yisifu bia Manaasa zuliya daŋ ni dɔbba, ka bɛ fali tarili daa kpalim bɛ yaannim’ daŋ puuni.
13Zaligunim’ ŋɔ ka Yawɛ daa chɛ ka Musa zali Izraɛlnima Mɔab bɔpiɛligu ni Jɔɔdɛn Mɔɣili duli zaŋ labi Jɛriko polo la.
Red Letter Dagbani Bible © Bible Society of Ghana, 2011