Kalinlinima 35
35
Bɛ ti Lɛvinim’ tinsi
1Ka Yawɛ daa yɛli Musa Mɔab bɔpiɛligu ni Jɔɔdɛn Mɔɣili duli zaŋ lab’ Jɛriko polo: 2Yɛlim’ Izraɛlnima ni bɛ piim’ tinsi bɛ ni deei tiŋgban’ shɛŋa la ni n-ti Lɛvinim’ ka bɛ be di ni, ka ti ba biŋkɔbiri mɔri ŋubbu shee tiŋgbana ka di do n-gili tinsi maa. 3Bɛna n-yɛn be tinsi maa ni ka su li, ka bɛ biŋkɔbiri mɔri ŋubbu shee la nyɛ bɛ niɣi mini bɛ biŋkɔbiri zaa dini. 4Tinsi maa biŋkɔbiri mɔri ŋubbu shee din nyɛ yi ni yɛn zaŋ luɣ’ shɛŋa ti Lɛvinim’ maa yɛn zaŋla tinsi maa goma gbini n-chaŋ ti paai mita kɔbisinahi ni pihinu tariga n-gili tinsi maa. 5Buɣisimiya tinsi maa sambana polo n-zaŋ kpa wulimpuhili polo nti zali mita kɔbisiwɛi tariga, ka buɣisi kpa nudirigu polo nti zali mita kɔbisiwɛi tariga, ka buɣisi kpa wulinluhili polo nti zali mita kɔbisiwɛi tariga, ka buɣisi kpa nuzaa polo nti zali mita kɔbisinahi ni pihinu tariga, ka tinsi maa ʒe sunsuuni, ka di nyɛ bɛ tinsi maa biŋkɔbiri mɔri ŋubbu shee. 6Yi ni yɛn ti Lɛvinim’ tin’ shɛŋa maa puuni, timiya ba tins’ ayɔbu din yɛn nyɛ nir’ ni yɛn ku ninsala ka zo n-kuli di ni tiligi, ka ti ba tinsi pihinahinaayi pahi. 7Yi ni yɛn ti Lɛvinim’ tin’ shɛŋa zaa kalinli nyɛla tinsi pihinuayika ni bɛ biŋkɔbiri mɔri ŋubbu shee. 8#Jɔsh 21.1-42 Yi ni yɛn yihi tinsi Izraɛlnim’ ni su tin’ shɛŋa maa ni ti ba shɛm m-bɔŋɔ: Yihimiya tinsi pam zuliya shɛb’ bɛn galisi sani, ka yihi tinsi biɛla zuliya shɛb’ bɛn bi galisi mi sani. Zuliya kam ni deei tiŋgban’ shɛŋa galisim ni nyɛ shɛm ka yi yɛn doli pii tinsi maa ti Lɛvinim’ maa.
Tiliginsim tinsi
(Zaligu 19.1-13; Jɔshua 20.1-9)
9Ka Yawɛ daa yɛli Musa: 10Yɛlim’ Izraɛlnima, “Yi yi gbaai Jɔɔdɛn Mɔɣili du m-paai Keenan tiŋgbɔŋ ni, 11yin piimiya tin’ shɛŋa ka di nyɛ tiliginsim tinsi zali. Ka nir’ yi ku ninsal’ sarati kubu, o ni tooi zo n-kuli nimaani. 12Tinsi maa yɛn nyɛla nir’ ni yɛn zo n-kuli shɛli n-yi ŋun yɛn bɔhi biɛri nuu ni, ka lala chɛ ka ninvuɣ’ so ŋun ku ninsala ku kpi hal ti zani salo ni ka bɛ kar’ o saria. 13Tins’ ayɔbu ka yi yɛn yihi zali ka di nyɛ yi tiliginsim tinsi maa. 14Yihimiya tins’ ata zali Jɔɔdɛn Mɔɣili duli, ka yihi tins’ ata zali Keenan tiŋgbɔŋ ni, ka di nyɛ tiliginsim tinsi. 15Tins’ ayɔbu maa yɛn nyɛla Izraɛlnim’ mini saamba bɛn ʒi bɛ sani ni saan’ shɛb’ bɛn gariti tiliginsim tinsi, ka ŋunkam ku ninsala sarati kubu ni tooi zo n-kuli nimaani.
16“Amaa nir’ yi zaŋ kurigu ŋme so ka o kpi, o nyɛla ninvuɣ’ kura, bɛn’ kum’ o. 17Ka nir’ yi zaŋ kuɣili din be o nuu ni ka nyɛ din ni ku nir’ lab’ so ka o kpi, o nyɛla ninvuɣ’ kura, bɛn’ kum’ o. 18Ka nir’ yi zaŋ kpaa din be o nuu ni ka nyɛ din ni ku nir’ ŋme so ka o kpi, o nyɛla ninvuɣ’ kura; bɛn’ kum’ o. 19Ka ninvuɣ’ so ŋun yɛn bɔhi ninvuɣ’ kura maa biɛri yi ti nya o, ŋun’ kum’ o.
20“Ka so yi je o kpee ka daag’ o luhi bee n-zaŋ bini lab’ o bee n-sɔɣi dɔni gu o ku o 21bee n-zaŋ o nuu ŋme o dim’ ku’ o, dindina ŋun ŋme o maa nyɛla ninvuɣ’ kura, ka ŋun yɛn bɔhi biɛri maa yi nya ninvuɣ’ kura maa, ŋun’ kum’ o.
22“Amaa nir’ yi daag’ o kpee luhi, ka di pala o dima n-nyɛ o bee n-zaŋ binshɛli lab’ o kpee ka di pala o dɔnimi gu o 23bee so yi gbib’ kuɣili din ni tooi ku nira, ka di faai lu o kpee zuɣu ku o, ka di mi pala o dima n-nyɛ o, ka o mi di bi pun lo ni o ti o daŋa, 24dindina niriba bɛn’ zaŋm’ zaligunim’ ni wuhi shɛm kpe ninvuɣ’ kura maa mini ŋun yɛn bɔhi ninvuɣ’ kubo biɛri maa sunsuuni m-mal li. 25Ka niriba maa ni fa ninvuɣ’ kura maa ŋun yɛn bɔhi biɛri maa nuu ni bahi, ka zaŋ o labisi o ni daa pun be tiliginsim tin’ shɛli’ ni maa, ka o ti be nimaani hal ka bɛ ni daa booi kpam din be kasi bahi maligumaaniba zuɣulaan’ so zuɣu ni ti kpi. 26Amaa ninvuɣ’ kura maa yi ti chaŋ yaɣi o ni zo n-kuli tiliginsim tin’ shɛli ni maa tiŋgbani tariga, 27ka ninvuɣ’ so ŋun yɛn bɔhi ninvuɣ’ kura maa biɛri maa ku o, ŋun bɔh’ o biɛri maa ku mali ninvuɣ’ kubo taali. 28#Zal 19.2-4; Jɔsh 20.1-9 Dama di simdi ni ninvuɣ’ kura maa kul kpalim be tiliginsim tiŋ’ maa ni hal ka maligumaaniba zuɣulan’ maa ti kpi, amaa maligumaaniba zuɣulan’ maa kum nyaaŋa, ninvuɣ’ kura maa ni tooi lab’ omaŋmaŋ’ ya. 29Dimbɔŋɔnima n-yɛn nyɛ yi zaligunima yi ni yɛn be luɣ’ shɛlikam yi ʒiɛmani kam ni.
30 #
Zal 17.6; 19.15 “Nir’ yi ku ninsala, ka ninvuɣ’ bɔbili di li shɛhira, bɛn’ kum ninvuɣ’ kura maa, amaa di bi tuhi ni bɛ ku so ninvuɣ’ yino shɛhira dibu zuɣu. 31Amaa miriya ka yi deei binshɛli zali ninvuɣ’ kura ŋun simdi kubu zaani. Ninvuɣ’ kura simdi kubu. 32Yi mi miriya ka yi deei binshɛli ka chɛ ka ninvuɣ’ so ŋun zo nti be tiliginsim tiŋ’ ni lab’ ti be o ya ka maligumaaniba zuɣulan’ na bi kpi. 33Miriya ka yi saɣim yi ni be tiŋgbɔn shɛl’ ni maa, dama ninvuɣ’ kubo nyɛla din saɣindi tiŋgbani. Binshɛli kani ka yi ni tooi zaŋ mali tiŋgbani maa naɣila ninvuɣ’ so ŋun ku nir’ maa ʒim. 34Miriya ka yi ta yi ni be tiŋgbɔn shɛl’ ni maa daɣiri. N gba bela di ni, dama man’ Yawɛ bela Izraɛlnim’ sunsuuni.”
Red Letter Dagbani Bible © Bible Society of Ghana, 2011