Kalinlinima 31
31
Izraɛlnim’ tuhi Midiannima
1Ka Yawɛ daa yɛli Musa,
2“Bɔhimi Midiannim’ biɛri ti Izraɛlnima. Di nyaaŋa n ni deeg’ a nyɛvili.”
3Dinzuɣu ka Musa daa yɛli Izraɛlnima, “Chɛliya ka yi ni shɛb’ lo kpara n-chaŋ ti tuhi Midiannima m-bɔhi ba biɛri ti Yawɛ. 4Piimiya ninvuɣ’ tuhilituhili Izraɛl zuliya kam ni n-chɛ ka bɛ chaŋ tɔb’ maa ni.”
5Ka bɛ daa pii ninvuɣ’ tuhilituhili Izraɛl zuliya kam ni, ka bɛ kalinli yiɣisi tɔbbihi tuhi’ pinaayi n-lo kpara ni bɛ chaŋ tɔb’ maa ni. 6Ka Musa daa chɛ ka bɛ ninvuɣ’ tuhilituhili bɛn yi Izraɛl zuliya kam ni na maa mini maligumaana Ɛliɛza bia Finɛhas ŋun daa gbibi Naawuni jɛmbu shee lahi mini kikahi din ni piɛbi boli niriba o nuu ni la chaŋ tɔb’ maa ni. 7Ka bɛ daa tuhi Midiannim’ maa kaman Yawɛ ni daa zali Musa shɛm n-ku dɔbba zaa. 8Bɛ daa ku Ɛvi mini Rɛkɛm ni Zur ni Hur ni Rɛba bɛn daa nyɛ Midian nanim’ la m-pahi bɛ ni daa ku bɛ ninvuɣ’ shɛb’ zaa zuɣu. Bɛ daa zaŋ takɔbi ku Bɛɔr bia Balaam gba.
9Ka Izraɛlnim’ daa gbahi Midian paɣiba mini bɛ bihi, ka gbahi bɛ niɣi mini bɛ biŋkɔbbaligu zaa, ka di bɛ nɛma zaa chaŋ. 10Bɛ daa nyo bɛ fɔntin’ shɛŋa ni bɛ ni daa be mini bɛ sansana zaa buɣim. 11Amaa bɛ daa zaŋ bɛ ni di neen’ shɛŋa zaa m-pahi ninsalinim’ mini biŋkɔbiri. 12Di saha ka bɛ daa zaŋ niriba maa mini bɛ ni daa di neen’ shɛŋa na maa nti ti Musa mini maligumaana Ɛliɛza ni Izraɛlnima sansani din daa be Mɔab bɔpiɛligu din daa miri Jɔɔdɛn Mɔɣili duli Jɛriko polo la.
13Ka Musa mini maligumaana Ɛliɛza ni Izraɛl kpamba zaa daa yi bɛ sansani maa ni na chaŋ ti tuhi ba soli. 14Ka Musa suhu daa yiɣisi bahi sapashin’ kpamba bɛn daa yi tɔb’ maa ni na ka nyɛ bɛn su tɔbbihi tuhilituhili mini bɛn su tɔbbihi kɔbigakɔbiga fukumsi la zuɣu. 15Musa daa bɔhi ba mi, “Yi chɛla paɣiba ŋɔ zaa ka bi ku ba? 16#Kal 25.1-9 Nyamiya, Balaam ni daa wuhi yikombiɛlim so’ shɛl’ la ni, bɛmbɔŋɔ n-daa chɛ ka Izraɛlnim’ tum din bie zaŋ chaŋ Yawɛ sani Pɛɔr yɛla la ni, ka alɔbo daa lu Yawɛ niriba zuɣu la. 17Dinzuɣu pumpɔŋɔ kumiya bidibbihi mini paɣ’ shɛb’ bɛn pun baŋ dɔbba la zaa. 18Amaa paɣisar’ shɛb’ bɛn na bi baŋ dɔbba la, chɛliya bɛna n-zaŋ ba niŋ yi paɣiba. 19Ŋunkam ku nira mini ŋunkam shihi kpima, benya sambani ŋɔ ni daba ayopɔin. Yi mini yi ni gbahi ninvuɣ’ shɛb’ na maa zaa malimiya yimaŋa n-niŋ kasi daba ata dali mini daba ayopɔin dali. 20Malimiya yi binyɛra zaa mini yi binshɛŋa din nyɛ biŋkɔbiri gbana ni buhi kɔbiri binyara zaa ni dari binyara zaa ka di niŋ kasi.”
21Ka maligumaana Ɛliɛza daa yɛli tɔbbihi bɛn yi tɔb’ maa na, “Yawɛ ni zaŋ zaligu shɛŋa ti Musa m-bɔŋɔ: 22Zaŋmiya salima mini anzinfa ni daanya ni kuriti ni dalima ni kurizim, 23buɣim ni ku di binshɛɣukam zaa niŋ buɣim ni m-mal’ li ka di niŋ kasi. Amaa faashee ka yi bahi zaŋ kom din maani binyara ka di be kasi paɣi li. Ka binshɛŋa din mi ku tooi kpe buɣim ni, yin’ zaŋmiya kom paɣi li. 24Paɣimiya yi situra daba ayopɔin dali din ni chɛ ka yi be kasi. Di nyaaŋa ka yi naanyi kpe sansani ŋɔ ni na.”
25Ka Yawɛ daa yɛli Musa, 26“A mini maligumaana Ɛliɛza ni Izraɛl daŋ kam dunoli dɔɣirikpamba niŋmi bɛ ni di neen’ shɛŋa din nyɛ ninsalinim’ mini biŋkɔbiri maa na laasabu. 27Pirigimiya bɛ ni di neen shɛŋa na maa ʒiibuyi n-zaŋ yim ti tɔbbihi bɛn chaŋ tɔbu ni maa, ka zaŋ yim la mi ti Izraɛlnim’ zaa. 28Yihimiya tɔbbihi maa tarili ni bin’ yini bini kɔbisinu kam puuni ti Yawɛ zaka. Di yi nyɛ ninsalinim’ bee niɣi bee bunsi bee piɛri bee buhi. 29Yihimiya li bɛ tarili maa ni n-zaŋ ti maligumaana Ɛliɛza ka o zaŋ mali sara ti Yawɛ. 30Amaa Izraɛlnim’ tarili la ni, yihimiya bin’ yini bini pihinu kam puuni, di yi nyɛla ninsalinim’ bee niɣi bee bunsi bee piɛri bee buhi bee biŋkɔbiri balibu kam bɛn pahi n-zaŋ ba ti Lɛvinim’ bɛn su Yawɛ biɛhigu shee tuma fukumsi la.” 31Ka Musa mini maligumaana Ɛliɛza daa niŋ kaman Yawɛ ni daa zali Musa shɛm maa.
32Bɛ ni daa di neen’ shɛŋa na maa puuni binshɛŋa din daa kpalim ka tɔbbihi maa zaŋ li kalinli daa nyɛla piɛri tuhi’ kɔbisiyɔbu ni tuhi’ pisopɔinnaanu 33mini niɣi tuhi’ pisopɔinnaayi 34ni bunsi tuhi’ pihiyɔbu ni yini 35ni ninvuɣ’ tuhi’ pihitanaayi bɛn daa nyɛ paɣ’ shɛb’ bɛn na bi baŋ dɔbba la. 36Ka pirigili shɛli din daa nyɛ tɔbbihi bɛn chaŋ tɔb’ maa ni tarili la piɛri mini buhi kalinli daa nyɛla tuhi’ kɔbisita ni tuhi’ pihitanaayopɔin ni kɔbisinu. 37Ka Yawɛ zaka piɛri mini buhi kalinli daa nyɛla kɔbisiyɔbu ni pisopɔinnaanu. 38Niɣi daa nyɛla naɣ’ tuhi’ pihitanaayɔbu. Ka Yawɛ zaka niɣi kalinli daa nyɛ naɣ’ pisopɔinnaayi. 39Ka bunsi daa nyɛ tuhi’ pihita ni kɔbisinu. Ka Yawɛ zaka bunsi kalinli daa nyɛ bunsi pihiyɔbu. 40Ka ninsalinim’ daa nyɛ tuhi’ pinaayɔbu. Ka Yawɛ zaka niriba kalinli daa nyɛ ninvuɣ’ pihitanaayi. 41Ka Musa daa zaŋ Yawɛ zaka ni nyɛ shɛli maa ti maligumaana Ɛliɛza kaman Yawɛ ni daa zali ŋun Musa shɛm.
42Musa daa woligi pirigili shɛli din nyɛ Izraɛlnim’ tarili ka chɛ tɔbbihi la dini. 43Pirigili din daa nyɛ Izraɛlnim’ tarili maa piɛri mini buhi kalinli daa nyɛla tuhi’ kɔbisita ni tuhi’ pihitanaayopɔin ni kɔbisinu 44mini naɣ’ tuhi’ pihitanaayɔbu 45ni bunsi tuhi’ pihita ni kɔbisinu 46ni ninsalinim’ tuhi’ pinaayɔbu. 47Pirigili din daa nyɛ Izraɛlnim’ tarili maa ni, Musa daa yihila ninsalinim’ ninvuɣ’ yino ninvuɣ’ pihinu kam puuni, ka yihi biŋkɔbiri pihinu kam puuni biŋkɔb’ yino n-zaŋ ba ti Lɛvinim’ bɛn daa su Yawɛ biɛhigu shee tuma la kaman Yawɛ ni daa zali Musa shɛm.
48Di nyaaŋa ka sapashin’ kpamba mini sapashim’ bihi bɛn daa su tɔbbihi tuhilituhili ni tɔbbihi kɔbigakɔbiga fukumsi daa ka Musa sanna 49nti yɛl’ o, “Tinim’ bɛn nyɛ a daba ŋɔ kali ti ni su tɔbbi’ shɛb’ fukumsi n-nya ka ti zaa beni. 50Ka ti zaŋ ti zaa yinoyino ni nya salima binshɛŋa din nyɛ nuhi ni bansi ni zoligɔnim’ ni nintuhi din dihiri gbana zuɣu ni tibikpara ni yɛri na ni ti ti mali sara ti daalahichi zuɣu Yawɛ sani.” 51Ka Musa mini maligumaana Ɛliɛza daa deei bɛ ni daa zaŋ salima mali binshɛŋa maa zaa. 52Bɛ ni daa deei salima binshɛŋa sapashin’ kpamba mini sapashin’ bihi shɛb’ bɛn su tɔbbihi tuhilituhili mini tɔbbihi kɔbigakɔbiga sani maa tibisim daa miri kilɔgiram kɔbisiyi. 53(Tɔbbihi maa zaa daa zaŋla bɛ ni di neen’ shɛŋa maa.) 54Ka Musa mini maligumaana Ɛliɛza daa deei salima maa sapashin’ kpamba bɛn daa su tɔbbihi tuhilituhili mini tɔbbihi kɔbigakɔbiga fukumsi la sani n-zaŋ li tahi ti niŋ Naawuni min’ o niriba laɣiŋgu suɣili la puuni ni di nyɛ din ni chɛ ka Yawɛ teeri Izraɛlnim’ yɛla.
Red Letter Dagbani Bible © Bible Society of Ghana, 2011