Kalinlinima 30
30
Pɔri zaligunima
1Di saha ka Musa daa yɛli Izraɛl zuliya kam kpamba: Yawɛ ni zali zaligu shɛli m-bɔŋɔ: 2#Zal 23.21-23; Mat 5.33 Doo yi po pɔri Yawɛ sani bee m-po pɔri lo alikauli ni o niŋ shɛli, ŋun’ miri ka o yi o yɛligu maa nyaaŋa; amaa o niŋm’ o ni yaag’ o noli yɛli shɛlikam maa zaa.
3Ka paɣa yi po pɔri Yawɛ sani ka lo alikauli ni o niŋ shɛli o paɣisarilim ni saha shɛl’ o ni be o ba yiŋa, 4ka o ba wum o ni po pɔri shɛli bee o ni lo alikauli shɛli maa ka bi yɛl’ o shɛli, dindina o pɔri maa zaa ni zani, ka o ni lo alikauli ni o niŋ shɛlikam maa ni zani. 5Amaa o ba yi bi saɣ’ o ni lo ni o niŋ shɛm maa o ni wum li saha shɛli maa, o ni po pɔ’ shɛŋa min’ o ni lo alikauli ni o niŋ shɛli maa zaa shɛli ku zani; ka Yawɛ ni chɛ o taali o ba ni bi saɣi maa zuɣu.
6Ka o ni po pɔ’ shɛŋa bee o noli ni faag’ o ka o yɛli ni o niŋ shɛli, o yi ti kuli doo, 7ka o yidana maa wum li, ka bi yɛl’ o shɛli o ni wum li saha shɛli maa, dindina o pɔri maa min’ o ni lo alikauli ni o niŋ shɛli maa zaa ni zani. 8Amaa o yidan’ maa yi bi saɣi li o ni wum li saha shɛli maa, dindina o ni ku o pɔri maa min’ o noli ni daa faag’ o ka o yɛli yɛtɔɣ’ shɛŋa ni o niŋ shɛl’ la; ka Yawɛ ni chɛ o taali.
9Amaa pakoli bee paɣ’ so ŋun yi dooyili yi po pɔri ni o niŋ shɛli, fashee ka di zani.
10Ka paɣ’ yi po pɔri ka lo alikauli ni o niŋ shɛli o yidan’ yiŋa, 11ka o yidan’ maa wum li ka bi yɛl’ o shɛli, ka mi bi galim li, dindina o pɔri maa min’ o ni lo alikauli shɛŋa zaa ni o ni niŋ shɛli maa ni zani. 12Amaa o yidan’ maa yi zaɣisi li o ni wum di yɛla saha shɛli maa, dindina yɛtɔɣ’ shɛlikam din yi o nol’ ni na zaŋ chaŋ o pɔri maa min’ o ni lo alikauli shɛŋa ni o niŋ shɛli maa zaa ku zani; o yidan’ ni zaɣisi li maa zuɣu, ka Yawɛ ni chɛ o taali. 13Ka o yi po pɔri shɛlikam ni o niŋ shɛli, o yidana mali soli ni o saɣi li bee n-zaɣisi li. 14Amaa o yidana yi wum pɔri maa yɛla ka bi yɛl’ o shɛli dabisili din paya dali, dindina di wuhiya ni o saɣ’ o ni po pɔ’ shɛŋa min’ o ni lo alikauli shɛŋa zaa ni o niŋ shɛli maa, o ni daa wum di yɛla saha shɛli ka bi yɛl’ o shɛli maa zuɣu. 15Amaa o yi wum di yɛla ka di niŋ daba yi ha, di nyaaŋa ka o ti yɛn zaɣisi li, dindina paɣ’ maa taali ni ʒi doo maa zuɣu.
16Yawɛ ni daa zali Musa zaligu shɛŋa zaŋ chaŋ doo min’ o paɣa polo ni zaŋ chaŋ doo min’ o bipuɣiŋga ŋun na be o ba yiŋa ka nyɛ paɣisarili polo m-bala.
Red Letter Dagbani Bible © Bible Society of Ghana, 2011