Kalinlinima 26
26
Niriba kalibu din pahi buyi
1Alɔbo maa lubu nyaaŋa ka Yawɛ daa yɛli Musa mini maligumaana Aduna bia Ɛliɛza, 2“Kalimiya Izraɛlnim’ zaa ninvuɣ’ shɛb’ bɛn yuma nyɛ yuun’ pisi zaŋ chana kaman bɛ daŋ ni nyɛ shɛm, ka bɛ zaa nyɛ bɛn be Izraɛl tiŋgbɔŋ ni ka ni tooi chaŋ ti tuhi tɔbu.” 3Ka Musa mini maligumaana Ɛliɛza daa yɛli niriba maa Mɔab bɔpiɛligu din daa miri Jɔɔdɛn Mɔɣili, ka be Jɛriko tooni polo la, 4“Kalimiya Izraɛlnim’ ninvuɣ’ shɛb’ bɛn nyɛ yuun’ pisi zaŋ chana kaman Yawɛ ni zali Musa shɛm.”
Izraɛlnim’ bɛn daa yi Ijipti na n-nyɛ: 5-6Rubin ŋun daa nyɛ Yaakubu bituuli la zuliya n-daa nyɛ: Hanok mini Pallu ni Hɛzirɔn ni Karimi. Hanok daŋ niriba n-daa nyɛ Hanoknima; ka Pallu daŋ niriba daa nyɛ Pallunima; ka Hɛzirɔn daŋ niriba daa nyɛ Hɛzirɔnnima, ka Karimi mi daŋ niriba daa nyɛ Kariminima. 7Rubin zuliya m-bala; bɛ ni daa sab’ shɛb’ yuya kalinli daa nyɛla ninvuɣ’ tuhi’ pihinahinaata ni kɔbisiyopɔin ni pihita. 8Pallu zuliya n-daa nyɛ Ɛliab. 9Ka Ɛliab mi zuliya daa nyɛ Nɛmuɛl mini Datan ni Abiram. Datan mini Abiram daa nyɛla niriba ni daa pii shɛba. Bɛna n-daa pahi Kɔra min’ o nyaaŋa zuɣu n-taai duŋ niŋ Yawɛ, ka yɛli Musa mini Aduna finafina, 10ka tiŋgbani daa bɔɣi, ka bɛ mini Kɔra zaa lu di ni ka buɣim di bɛ ninvuɣ’ kɔbisiyi ni pihinu ka bɛ kpi, ka tiŋgbani maa mum ba niŋ; ka di leei saɣisigu yɛlli ʒiɛya la. 11Amaa Kɔra zuliya bɛn daa bi kpi.
12Simiɔn bidibisi ni bɛ zuliya niriba ni daa nyɛ shɛm m-bɔŋɔ: Nɛmuɛl daŋ niriba n-daa nyɛ Nɛmuɛlnima; ka Jamin daŋ niriba nyɛ Jaminnima; ka Jachin daŋ niriba mi nyɛ Jachinnima. 13Zɛra daŋ niriba n-daa nyɛ Zɛranima; ka Shaul mi daŋ niriba nyɛ Shaulnima. 14Simiɔn zuliya niriba maa kalinli daa nyɛla ninvuɣ’ tuhi’ pisinaayi ni kɔbisiyi.
15Gaad zuliya mini bɛ zuliya niriba ni daa nyɛ shɛm m-bɔŋɔ: Zɛfɔn daŋ niriba n-daa nyɛ Zɛfɔnnima; ka Hagi daŋ niriba nyɛ Haginima; ka Shuni daŋ niriba nyɛ Shuninima. 16Ka Ozini daŋ niriba nyɛ Ozininima; ka Ɛri daŋ niriba nyɛ Ɛrinima; 17ka Arɔd daŋ niriba nyɛ Arɔdnima; ka Arɛli mi daŋ niriba nyɛ Arɛlinima. 18Gaad zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihinahi ni kɔbisinu.
19Juda bidibisi daa nyɛla Ɛr mini Onan, bɛ zaa daa kpila Keenan tiŋgbɔŋ ni. 20Juda zuliya maa mini bɛ daŋ niriba ni daa nyɛ shɛm m-bɔŋɔ: Shɛla daŋ niriba n-daa nyɛ Shɛlanima; ka Pɛrɛz daŋ niriba nyɛ Pɛrɛzinima; ka Zɛra mi daŋ niriba nyɛ Zɛranima. 21Pɛrɛz zuliya mini bɛ daŋ niriba ni daa nyɛ shɛm m-bɔŋɔ: Hɛzirɔn daŋ niriba n-daa nyɛ Hɛzirɔnnima; ka Hamul daŋ niriba nyɛ Hamulnima. 22Juda zuliya niriba maa kalinli daa nyɛla ninvuɣ’ tuhi’ pisopɔinnaayɔbu ni kɔbisinu.
23Isaka zuliya mini bɛ daŋ niriba ni daa nyɛ shɛm m-bɔŋɔ: Tola daŋ niriba n-daa nyɛ Tolanima; ka Puva daŋ niriba nyɛ Puvanima. 24Jashub daŋ niriba n-daa nyɛ Jashubnima; ka Shimrɔn daŋ niriba nyɛ Shimirɔnnima. 25Isaka zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihiyɔbunaanahi ni kɔbisita.
26Zɛbulɔn zuliya mini bɛ daŋ niriba ni daa nyɛ shɛm m-bɔŋɔ: Sɛrɛd daŋ niriba n-daa nyɛ Sɛrɛdnima; ka Ɛlɔn daŋ niriba nyɛ Ɛlɔnnima; ka Jaaliil daŋ niriba nyɛ Jaaliilnima. 27Zɛbulɔn zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihiyɔbu ni kɔbisinu.
28Yisifu bidibisi mini bɛ daŋ niriba n-daa nyɛ: Manaasa mini Ifriim. 29Manaasa zuliya ni daa nyɛ shɛm m-bɔŋɔ: Makiri daŋ niriba n-daa nyɛ Makirinima. Makiri bia n-daa nyɛ Giliad; ka Giliad daŋ niriba nyɛ Giliadnima. 30Giliad zuliya ni daa nyɛ shɛm m-bɔŋɔ: Iiza daŋ niriba n-daa nyɛ Iizanima, ka Hɛlɛki daŋ niriba nyɛ Hɛlɛkinima, 31ka Asiriɛl daŋ niriba nyɛ Asiriɛlnima, ka Shɛkɛm daŋ niriba nyɛ Shɛkɛmnima, 32ka Shɛmida daŋ niriba nyɛ Shɛmidanima, ka Hɛfa daŋ niriba nyɛ Hɛfanima. 33Amaa Hɛfa bia Zɛlɔfɛhad ŋun’ daa bi dɔɣi bidibisi. Bipuɣinsi kɔŋko ka o daa dɔɣi. Bipuɣinsi maa yuya n-daa booni, Mahila ni Nɔa ni Hɔgila ni Milika ni Tiriza. 34Manaasa zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihinunaayi ni kɔbisiyopɔin.
35Ifriim zuliya mini bɛ daŋ niriba ni daa nyɛ shɛm m-bɔŋɔ: Shutɛla daŋ niriba n-daa nyɛ Shutɛlanima; ka Bɛcha daŋ niriba nyɛ Bɛchanima; ka Tahan mi daŋ niriba nyɛ Tahannima. 36Shutɛla zuliya ni daa nyɛ shɛm m-bɔŋɔ: Ɛran daŋ niriba n-daa nyɛ Ɛrannima. 37Ifriim zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihitanaayi ni kɔbisinu. Yisifu zuliya mini bɛ daŋ niriba m-bala. 38Bɛnjamin zuliya mini bɛ daŋ niriba ni daa nyɛ shɛm m-bɔŋɔ: Bɛla daŋ niriba n-daa nyɛ Bɛlanima; ka Ashibɛl daŋ niriba nyɛ Ashibɛlnima; ka Ahiram daŋ niriba nyɛ Ahiramnima; 39ka Shɛfufam daŋ niriba nyɛ Shufamnima; ka Hufam daŋ niriba nyɛ Hufamnima. 40Bɛla bidibisi n-daa nyɛ Arid mini Naaman, ka Arid daŋ niriba nyɛ Aridnima; ka Naaman daŋ niriba nyɛ Naamannima. 41Bɛnjamin zuliya mini bɛ daŋ niriba m-bala. Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihinahinaanu ni kɔbisiyɔbu.
42Dan zuliya mini bɛ daŋ niriba ni daa nyɛ shɛm m-bɔŋɔ: Shuham daŋ niriba n-daa nyɛ Shuhamnima. Dan zuliya niriba m-bala. 43Bɛ ni daa sab’ Shuham zuliya niriba maa ninvuɣ’ shɛb’ zaa yuya kalinli daa nyɛla ninvuɣ’ tuhi’ pihiyɔbunaanahi ni kɔbisinahi.
44Asha zuliya mini bɛ daŋ niriba ni daa nyɛ shɛm m-bɔŋɔ: Imna daŋ niriba n-daa nyɛ Imnanima; ka Ishivi daŋ niriba nyɛ Ishivinima; ka Bɛraya daŋ niriba nyɛ Bɛrayanima. 45Bɛraya mi zuliya ni daa nyɛ shɛm m-bɔŋɔ: Hɛbɛr daŋ niriba n-daa nyɛ Hɛbɛrnima; ka Malikiɛl daŋ niriba nyɛ Malikiɛlnima. 46Asha bipuɣiŋga yuli n-daa booni Sɛra. 47Asha zuliya niriba m-bala: Bɛ ni daa sab’ bɛ ninvuɣ’ shɛb’ yuya kalinli daa nyɛla ninvuɣ’ tuhi’ pihinunaata ni kɔbisinahi.
48Naftali zuliya mini bɛ daŋ niriba ni daa nyɛ shɛm m-bɔŋɔ: Jaziil daŋ niriba n-daa nyɛ Jaziilnima; ka Guni daŋ niriba nyɛ Guninima; 49ka Jɛza daŋ niriba nyɛ Jɛzanima; ka Shilɛm daŋ niriba nyɛ Shilɛmnima. 50Naftali zuliya niriba m-bala: Bɛ ni daa sab’ bɛ ninvuɣ’ shɛb yuya kalinli daa nyɛla ninvuɣ’ tuhi’ pihinahinaanu ni kɔbisinahi.
51 #
Kal 1.1-46
Bɛ ni daa sab’ Izraɛlnim’ maa ninvuɣ’ shɛb’ yuya kalinli daa nyɛla ninvuɣ’ tuhi’ kɔbisiyɔbu ni yini ni kɔbisiyopɔin ni pihita.
52Ka Yawɛ daa yɛli Musa, 53“Pirigim’ tiŋgbɔŋ ŋɔ tari niriba maa kaman bɛ yuya kalinli ni nyɛ shɛm. 54Bɛn daŋ niriba galisi, nyin’ pirigim’ pal’ titali ti ba, ka bɛn mi daŋ niriba pɔra, nyin’ pirigim’ palo din pɔri ti ba. Tim’ daŋ kam niriba bɛ tarili ni nyɛ shɛli kaman bɛ ni sab’ bɛ ninvuɣ’ shɛb’ yuya kalinli ni nyɛ shɛm. 55Amaa pihimiyala kuɣa sɔŋ lihi nya, ka pirigi tiŋgbɔŋ maa ti ba kaman bɛ daŋ dɔɣirikpamba yuya ni nyɛ shɛm. 56#Kal 34.13; Jɔsh 14.1-2 Bɛ pihim’ kuɣa sɔŋ lihi nya, ka pirigi tiŋgbɔŋ maa ti ninvuɣ’ shɛb’ bɛn daŋ niriba galisi mini bɛn daŋ niriba pɔra.”
57Bɛ ni daa sab’ Lɛvinim’ mini bɛ daŋ ninvuɣ’ shɛb’ yuya m-bɔŋɔ: Gɛrishɔn daŋ niriba n-daa nyɛ Gɛrishɔnnima; ka Kɔhat daŋ niriba nyɛ Kɔhatinima; ka Mɛrari daŋ niriba nyɛ Mɛrarinima. 58Lɛvi zuliya niriba m-bɔŋɔ: Libini daŋ niriba mini Hiburɔn daŋ niriba ni Mahili daŋ niriba ni Mushi daŋ niriba ni Kɔra daŋ niriba. Amiram ba n-daa nyɛ Kɔhat. 59Amiram paɣ’ yuli n-daa booni Jokɛbɛd ŋun daa nyɛ Lɛvi ni daa dɔɣi bipuɣin’ so Ijipti la. Ka Jokɛbɛd daa dɔɣi Aduna mini Musa ni bɛ tizɔpaɣ’ Miriam Amiram yiŋa. 60#Kal 3.2 Aduna bihi n-daa nyɛ Nadab mini Abihu ni Ɛliɛza ni Itama. 61#Lɛv 10.1-2; Kal 3.4 Amaa ka Nadab mini Abihu daa ti zaŋ buɣim din bi viɛla n-nyo sara maligu ti Yawɛ ka kpi. 62Ka bɛ daa kali bɛ bidibisi bɛn nyɛ goli yini bihi zaŋ tabili ninkura, ka bɛ kalinli nyɛ ninvuɣ’ tuhi’ pisinaata; dama bɛ daa bi zaŋ Lɛvinim’ pahi Izraɛlnim’ kalinli ni, bɛ ni daa bi pirigi tiŋgbɔŋ maa pal’ shɛli ti ba la zuɣu.
63Musa mini maligumaana Ɛliɛza ni daa sab’ ninvuɣ’ shɛb’ yuya saha shɛli bɛ ni daa kali Izraɛlnim’ Mɔab bɔpiɛligu ni Jɔɔdɛn Mɔɣili yaɣili Jɛriko tooni polo la m-bala. 64Amaa Musa mini maligumaana Aduna ni daa pun sab’ Izraɛlnim’ shɛb’ yuya Sinai mɔɣu ni la so daa ka bɛ ni daa sab’ shɛb’ yuya ŋɔ kalinli maa ni. 65#Kal 14.26-35 Dama Yawɛ daa pun yɛli ni bɛ ni kpi mɔɣu maa ni. Bɛ ni so daa bi kpalim, naɣila Jɛfune bia Kalɛb mini Nan bia Jɔshua kɔŋko.
Red Letter Dagbani Bible © Bible Society of Ghana, 2011