Lɛvinima 24
24
Firilanim’ lihibu
(Yibu 27.20-21)
1Yawɛ daa lan yɛli Musa: 2Zalim’ Izraɛlnim’ ni bɛ bom’ bɛ ni dooi olivi kpa’ shɛli din nyɛ alali na nti niŋdi firilanim’ maa puuni din ni chɛ ka firilanim’ maa diri saha shɛlikam. 3Ka Aduna ti nyɔr’ li zaani Alikauli Adaka la gbini Yawɛ tooni pateesa la nyaaŋa jɛmbu suɣili maa puuni zaawuni hal ni asiba sahakam. Di ni ti nyɛla zaligu sahakam yi ʒiɛmani kam ni. 4Di simdi ka o ti zaŋ firilanim’ maa tamtam salima firilatamdigu maa zuɣu ka di doli soli Yawɛ tooni sahakam.
Bɛ ni zaŋ bɔrɔbɔro shɛli mali sara ti Naawuni
5Ka a ti zaŋ zim viɛlli mali bɔrɔbɔro kpil’ pinaayi. Zaŋm’ zim kilɔgiram yini m-mali bɔrɔbɔro kpilli kam. 6#Yibu 25.30 Ka a zaŋ li sɔŋ pie taba kulis’ ayi salima teebuli la zuɣu. Kul’ yini kam zuɣu zaɣ’ kpil’ ayɔbu. 7Ka a zaŋ firanki tulaale zim alali pahi kul yini kam zuɣu, ka yi ti zaŋ li pahi bɔrɔbɔro maa zuɣu nyo buɣim mali sara ti Yawɛ, ka di leei shɛhira. 8Vuhim Dabisili dali kam, Aduna ni zaŋdi li zaani ka di doli soli Yawɛ tooni kaman lzraɛlnim’ ʒiɛyimtali, ka di leei alikauli sahakam. 9#Mat 12.4; Maak 2.26; Luk 6.4 Ka di ni ti nyɛla Aduna min’ o bidibisi la ni su shɛli, ka bɛ ni ti di li luɣ’ kasi shee la, dama di nyɛla o tarili din be kasi zaa, bɛ ni zaŋ binshɛŋa nyo buɣim mali sara ti Yawɛ puuni; ka di nyɛla o ni su shɛli sahakam.
Tibidarigibo din tuhi ka daɣiri ka di ni
10Izraɛl paɣ’ bia ŋun ba daa nyɛ Ijipti do’ so daa doli Izraɛlnim’ maa chana, ka Izraɛl paɣ’ bia maa mini Izraɛl doo daa ti zabi bɛ sansani maa ni. 11Ka Izraɛl paɣ’ bia maa daa tu Naawuni, ka bɛ zaŋ o tahi Musa sani. O ma yuli n-daa booni Shɛlomit, o daa nyɛla Dibiri bipuɣiŋga, ka nyɛ Dan zuliya ni nira. 12Ka bɛ daa zaŋ o kpɛhi duu, ka guhiri ni Yawɛ ti yɛli ba o yubu ni nyɛ shɛm.
13Ka Naawuni daa yɛli Musa, 14“Zaŋm’ ninvuɣ’ so ŋun tu ma maa yihi sansani maa kpaŋa nti chɛ ka bɛn zaa wum o ni tu ma shɛm maa zaŋ bɛ nuhi pa o zuɣu ni, ka chɛ ka Izraɛlnim’ maa zaa lab’ o kuɣa. 15Ka a yɛli Izraɛlnima, ‘Ŋunkam tu Naawuni, dilan’ daalahichi ni ʒin’ o zuɣu. 16Ŋunkam ti mo Yawɛ, o yi nyɛla Izraɛl tiŋbia bee sana, bɛn kum o, Izraɛlnim’ maa zaa bɛn’ labim’ o kuɣa.’
17 #
Yibu 21.12
“Ŋunkam ku ninsala, bɛn’ kum’ o. 18Ŋunkam ku biŋkɔbigu, ŋun’ bom’ biŋkɔb’ so yo o samli; nyɛvili la nyɛvili.
19“So yi ti o kpee dalinli, bɛn’ niŋm’ o gba o ni niŋ shɛm maa labisi. 20#Yibu 21.23-25; Zal 19.21; Mat 5.38 So yi kabi o kpee kɔbili, bɛn kabim’ o dini labisi, ka ŋun fɔɣ’ o kpee nini bɛn’ fɔɣimi o dini labisi, ka ŋun ŋme n-kabi o kpee nyini bɛn’ ŋmɛm’ kab’ o dini labisi. O ni ti o kpee maa dalinli shɛm, di simdi ka bɛ niŋ o gba lala. 21Ŋunkam ku biŋkɔbigu, ŋun bom’ so yo o zuɣu, ka ŋunkam ku ninsala, bɛn’ kum’ o. 22#Kal 15.16 Tiŋbihi mini saamba zaa zaligu yɛn nyɛla zaɣ’ yini; dama man’ Yawɛ n-nyɛ yi Naawuni.”
23Ka Musa daa yɛli Izraɛlnim’ maa lala, ka bɛ daa zaŋ ninvuɣ’ so ŋun daa tu Naawuni maa yi bɛ sansani maa kpaŋa nti lab’ o kuɣa. Izraɛlnim’ maa daa tum Yawɛ ni zali Musa shɛm maa.
Red Letter Dagbani Bible © Bible Society of Ghana, 2011