Lɛvinima 23
23
Adiini Churi
1Ka Yawɛ daa yɛli Musa, 2“Yɛlim’ Izraɛlnima, yi ni yɛn puhiri chu’ shɛŋa ka di nyɛ laɣiŋgu kasinim’ yi sani, ka nyɛ man’ Yawɛ ni zali chu’ shɛŋa m-bɔŋɔ: 3#Yibu 20.8-10; 23.12; 31.15; 34.21; 35.2; Zal 5.12-14 Daba ayɔbu ka yi ni zaŋ tum tuma, amaa dabisi’ shɛli din pahiri daba ayopɔin nyɛla Vuhim Dabisili titali, ka nyɛ laɣiŋgu kasi dali. Di bi simdi ni yi tum tuma dindali, di nyɛla Yawɛ Vuhim Dabisili yi ni be luɣ’ shɛlikam zaa. 4Yawɛ ni zali chu’ shɛŋa ka di nyɛ laɣiŋgu kasinima, ka nyɛ yi ni yɛn puhiri shɛŋa o ni zal’ li saha shɛli m-bala.”
Yaɣigari mini Bɔrɔbɔro din ka Dabindi
(Kalinlinima 28.16-25)
5 #
Yibu 12.1-13; Zal 16.1-2 Gol’ tuuli biɛɣ’ pinaanahi dali zaawuni nyɛla yi ni yɛn zaŋdi Yaɣigari chuɣu pina tiri Yawɛ saha shɛli. 6Ka goli maa biɛɣ’ pinaanu dali mi nyɛla Bɔrɔbɔro din ka Dabindi Chuɣu Yawɛ sani. Ka yi ni ti ŋubi bɔrɔbɔro din ka dabindi daba ayopɔin. 7Di dabisi’ tuuli dali, di simdi ka yi laɣim laɣiŋgu kasi, ka miriya ka yi tum tuma. 8#Yibu 12.14-20; 23.15; 34.18; Zal 16.3-8 Amaa malimiya bɛ ni zaŋdi sara shɛli nyɔri buɣim la tiri Yawɛ hal ni daba ayopɔin, dabisi’ shɛli din pahir’ ayopɔin n-nyɛ laɣiŋgu kasi dali, Miriya ka yi tum tuma dindali.
9Ka Yawɛ daa yɛli Musa, 10“Yɛlim’ Izraɛlnima, Yi yi ti paai tiŋ’ shɛli n ni zaŋ tin ya maa ni nti kpuɣi di tiŋgbani maa daatam, yin’ zaŋmiya yi ni kpuɣi atam shɛli maa bindir’ tuuli kam bɔbili na ti ti maligumaana; 11ka maligumaana maa ti zaŋ li gahigahi Yawɛ tooni din ni chɛ ka o deei ya. Di simdi ka maligumaana maa zaŋ li gahila Vuhim Dabisili di n-kaai biɛɣu. 12Ka yi ni gahi yi bimbɔba dahin’ shɛli maa, zaŋmiya piɛlaa ŋun paai yuuni ka ka daŋa m-mali bɛ ni zaŋdi sara shɛli nyɔri buɣim la ti Yawɛ dindali. 13Ka yi zaŋ kpam gari zim viɛlli din tibisim nyɛ kilɔgiram ayi n-nyo buɣim mali chi sara din nyom viɛl’ ti Yawɛ. Ka binnyurigu sara din yɛn pahi di zuɣu n-nyɛ wain lita yini. 14Ka di bi simdi ni yi ŋubi bɔrɔbɔro bee kawaan’ chimda bee zaɣ’ maha hal ni dindali maa, naɣila yi ti zaŋ Naawuni sara maligu maa na pɔi. Di nyɛla zaligu sahakam yi ʒiɛmani kam ni luɣ’ shɛlikam zaa yi ni be.”
Puri atam kpuɣibu chuɣu
(Kalinlinima 28.26-31)
15Ka yi ni zaŋ yi bimbɔba maa na ti mali gahibu sara vuhim dabisi’ shɛli dali maa neei biɛɣu, yin’ kalimiya dabisa hal ti paai bakɔi ayopɔin dɛde, 16ka yi zani Vuhim Dabisili dali neei biɛɣu maa n-kali hal ni biɛɣ’ pihinu, di nyaaŋa ka yi naanyi zaŋ chi mini kawaan’ pala na ti mali chi mini kawana sara ti Yawɛ. 17Di simdi ka yi zaŋ yi biɛhigu shee bɔrɔbɔro kpil’ ayi shɛli bɛ ni zaŋ zim kuruwa ayi malina, ka bɛ ti zaŋ gahi. Di simdi ka di ti nyɛla zim viɛlli, ka yi ti niŋ dabindi niŋ di ni, ka di leei bindir’ tuuli shɛli yi ni zaŋ ti Yawɛ. 18Ka yi ti zaŋ yuun’ yini piɛbihi ayopɔin bɛn ka dansi mini naɣilaa ni piɛlahi ayi m-pahi bɔrɔbɔro maa zuɣu na, ka di ti niŋ bɛ ni zaŋdi sara shɛli nyɔri buɣim tiri Yawɛ la m-pahi di kawana mini chi sara maligu zuɣu, ka yi zaŋ li nyo buɣim ka di leei din nyom viɛl’ Yawɛ sani. 19Ka yi zaŋ bulaa mali alahichi sanyoo sara maligu, ka zaŋ piɛlabihi ayi bɛn paai yuun’ yini m-mali suhudoo sara. 20Ka maligumaana ti zaŋ di mini bindir’ pala bɔrɔbɔro ni piɛbihi ayi n-gahigahi, ka di leei gahibu sara Yawɛ sani. Di ni ti nyɛla din be kasi Yawɛ sani, ka bɛ zaŋ ti maligumaana maa. 21#Yibu 23.16; 34.22; Zal 16.9-12 Dindali maa di simdi ka yi moli molo, ka laɣim laɣiŋgu kasi, ka di tumiya tuma, di nyɛla zaligu ʒiɛmani kam ni yi biɛhigu shee zaa.
22 #
Lɛv 19.9-10; Zal 24.19-22 Ka yi yi yɛn kpuɣi yi puri atam, yin’ di kpuɣiya putariga bindira, yi mi di ti labiya ti yihi binyiha di ni yaha. Chɛliya li ti nandaamba mini saamba. Mani Yawɛ n-nyɛ yi Naawuni.
Yuun’ palli chuɣu
(Kalinlinima 29.1-6)
23Ka Yawɛ daa yɛli Musa, 24“Yɛlim’ Izraɛlnima, Gol’ so ŋun pahir’ ayopɔin dahin yini dali, di simdi ka yi zaŋ li leei vuhim dabisili, ka piɛbi kikahi n-laɣim jɛm Naawuni. 25Di ti tumiya tuma, amaa lee ti malimiyala bɛ ni zaŋdi sara shɛli nyɔri buɣim la ti Yawɛ.”
Sanyoo dabisili
(Kalinlinima 29.7-11)
26Ka Yawɛ daa yɛli Musa, 27“Gol’ so ŋun pahir’ ayopɔin ŋɔ biɛɣu pia dali ni nyɛla sanyoo dali, ka di ni ti nyɛla yi laɣiŋgu kasi saha, ka di simdi ni yi ti lo noli, ka mali bɛ ni zaŋdi sara shɛli nyɔri buɣim la ti Yawɛ. 28Miriya ka yi ti tum tuun’ shɛli dindali, dama di nyɛla sanyoo dali, ka bɛ ni yo yi daalahichi samli tin ya Yawɛ ŋun nyɛ yi Naawuni ŋɔ sani. 29Dinzuɣu ninvuɣ’ so ŋun ti bi lo noli dindali maa, bɛn’ yihim’ o n niriba ni. 30Ka ninvuɣ’ so ŋun ti tum tuma dindali maa, n ni yihi dilan’ maa niriba sunsuuni. 31Di ti tumiya tuma, di nyɛla zaligu yi ʒiɛmani kam ni sahakam yi ni be luɣ’ shɛlikam zaa. 32#Lɛv 16.29-34 Di ni ti nyɛla Vuhim Dabisili yi sani, ka yi ni ti lo noli goli maa daba awɛi dali zaawuni. Yi ni ti gbibila yi Vuhim Dabisili maa zaawuni hal ti lan paai zaawuni.”
Suɣa chuɣu
(Kalinlinima 29.12-40)
33Ka Yawɛ daa lan yɛli Musa, 34“Yɛlim’ Izraɛlnim’ zaa: Gol’ so ŋun pahir’ ayopɔin maa biɛɣ’ pinaanu dali, zaŋmiya daba ayopɔin m-puhi Naawuni chuɣu din nyɛ suɣa tibu chuɣu la. 35Di piligu dali ti nyɛla laɣiŋgu kasi dali. Di ti tumiya yi dabisili kam tuma dindali maa. 36Zaŋmiya daba ayopɔin m-mali sara shɛli bɛ ni zaŋdi nyɔri buɣim la ti Yawɛ. Dabisi’ shɛli din pahir’ anii dali, di simdi ka yi laɣim laɣiŋgu kasi, ka mali bɛ ni zaŋdi sara shɛli nyɔri buɣim la ti Yawɛ, di nyɛla laɣiŋgu tibisili; di ti tumiya tuma dindali maa.
37“Yawɛ ni zali chu’ shɛŋa ka di nyɛ yi ni yɛn mooni shɛŋa, ka di nyɛ laɣiŋgu kasi dabisa m-bala, ka yi zaŋdi yi pina nyɔri buɣim maani sara, ka maani bɛ ni zaŋdi sara shɛli nyɔri buɣim la mini chi sara ni sara maligunima ni binnyura sara maligunima n-tiri Yawɛ dabisi’ shɛli din simdi ni yi mal’ li, 38m-pahi Yawɛ vuhim dabisa la mini yi pina ni yi ni po pɔri shɛŋa sara ni yi suhuyubu sara shɛŋa yi ni maani tiri Yawɛ la zaa zuɣu.
39“Gol’ so ŋun pahir’ ayopɔin maa biɛɣ’ pinaata dali, yi yi ti kpuɣi tiŋgbani maa puri atam, yin’ zaŋmiya daba ayopɔin m-puhi Yawɛ chuɣu maa. Di piligu gba ni ti nyɛla vuhim dabisi’ tibisili dali, ka di daba anii dali gba ni ti nyɛla vuhim dabisi’ tibisili dali. 40Ti zaŋmiya ti’ viɛla wala mini abie tihi vari ni ti’ shɛŋa din mali vari wulikpana ni kul’ tihi na di piligu dali maa nti wuhi yi suhupiɛlli Yawɛ tooni hal ni daba ayopɔin. 41Zaŋmiya daba ayopɔin puhi li ka di leei Naawuni chuɣu yuuni puuni. Di nyɛla zaligu sahakam yi ʒiɛmani kam ni, ka di simdi ka yi gbib’ li la gol’ so ŋun pahir’ ayopɔin maa ni. 42Yi ni ti be suɣa ni hal ni daba ayopɔin. Izraɛl tiŋbihi zaa ni ti bela suɣa ni. 43Ka yi ʒiɛmannim’ ti baŋ ni n ni daa yihi Izraɛlnim’ Ijipti tiŋgbɔŋ ni na la, n daa chɛ ka bɛ bela suɣa ni. Man’ Yawɛ n-nyɛ yi Naawuni.”
44Di saha ka Musa daa zaŋ Yawɛ ni zali chu’ shɛŋa puhibu maa n-wuhi Izraɛlnima.
Red Letter Dagbani Bible © Bible Society of Ghana, 2011