Lɛvinima 18
18
Doo mini paɣ’ tab’ bɔbu din chihira
1Ka Yawɛ daa yɛli Musa: 2Yɛlim’ Izraɛlnima: Man’ Yawɛ n-nyɛ yi Naawuni. 3Miriya ka yi niŋdi kaman yi ni daa be Ijipti tiŋgbɔŋ ni ka bɛ niŋdi shɛm la. Ka miriya ka yi ti niŋdi kaman n ni yɛn zaŋ ya kulisi Keenan tiŋgbɔn shɛli ni ŋɔ nim’ ni niŋdi shɛm la. Miriya ka yi ti niŋ bɛ ni niŋdi shɛm. 4Man’ Yawɛ n-nyɛ yi Naawuni, di simdi ni yi niŋ n ni zali ya shɛm n-gbibi n zaligunim’ ka dol’ li. 5#Nɛh 9.29; Ɛzɛk 18.9; 20.11-13; Luk 10.28; Rom 10.5; Gal 3.12 Mani n-nyɛ Yawɛ, dinzuɣu gbibiya n zaligunim’ mini n ni yɛli ya shɛm, ka tummiya tuun’ shɛli din ni chɛ ka daadam be.
6Mani n-nyɛ Yawɛ. Yi ni so miri ka o ti chɛ ka o min’ o dɔɣira dɔni. 7So miri ka o ti zaŋ o ma dɔni, dama o nyɛla o ba paɣa ka nyɛ o ma, di bi simdi ni o zaŋ o dɔni. 8#Lɛv 20.11; Zal 22.30; 27.20 So miri ka o zaŋ o ba paɣ’ dɔni, dama o nyɛla o ba paɣa. 9#Lɛv 20.17; Zal 27.22 So miri ka o zaŋ o tizɔpaɣa dɔni, o yi nyɛla o ba bipuɣiŋga bee o ma bipuɣiŋga, bɛ yi dɔɣ’ o la yiŋa bee luɣ’ shɛli polo. 10So miri ka o zaŋ o bidibiga bipuɣiŋga bee o bipuɣiŋga mi bipuɣiŋga dɔni, dama di nyɛla vi tuuni. 11So miri ka o zaŋ o ma nyintaa bipuɣiŋga ŋun nyɛ o ba dapala dɔni, dama o nyɛla o tizɔpaɣa. 12So miri ka o zaŋ o ba tizɔpaɣ’ dɔni, dama o nyɛla o ba dɔɣira ni yɛlimaŋli. 13So miri ka o zaŋ o mapira dɔni, dama o nyɛla a ma dɔɣira ni yɛlimaŋli. 14#Lɛv 20.19-20 So miri ka o zaŋ o ba mabia ŋun nyɛ doo paɣa dɔni, dama o nyɛla o ma. 15#Lɛv 20.12 So miri ka o zaŋ o bia paɣa dɔni, dama o nyɛla o bia paɣa, di bi simdi ka o zaŋ o dɔni. 16#Lɛv 20.21 So miri ka o zaŋ o mabia paɣ’ dɔni, dama o nyɛla o mabia maa paɣa. 17#Lɛv 20.14; Zal 27.23 So miri ka o laɣim paɣ’ min’ o bipuɣiŋga dɔni, ka miri ka o bo o bidibiga bipuɣiŋga bee o bipuɣiŋga mi bipuɣiŋga, bɛ nyɛla paɣ’ shɛb’ bɛn nyɛ o dɔɣiriba ni yɛlimaŋli. Lala nyɛla zaɣ’ biɛɣu. 18So miri ka o kpuɣ’ o paɣ’ mabia pah’ o zuɣu saha shɛl’ o paɣ’ maa ni na be o nyɛvili ni maa.
19 #
Lɛv 20.18
Paɣ’ yi nya sɔrilim ka di na bi naai, nyin’ di mir’ o ni a bo o. 20#Lɛv 20.10 Miri ka a bo a kpee paɣa n-kpɛh’ amaŋ’ daɣiri ni o sani. 21#Lɛv 20.1-5 Miriya ka yi ti zaŋ yi bi’ so ti ni bɛ nyo buɣim mali buɣili Molɛk ka di zuɣu chɛ ka yi saɣim yi Naawuni yuli. Mani n-nyɛ Yawɛ. 22#Lɛv 20.13 Di bi simdi ka doo bo o dokpee kaman paɣ’ la, di nyɛla din chihira. 23#Yibu 22.19; Lɛv 20.15-16; Zal 27.21 Di bi simdi ka doo mini biŋkɔbigu dɔni bee ka paɣ’ zaŋ omaŋ’ ti biŋkɔbigu ka o min’ o dɔni; di nyɛla biriginsim.
24Miriya ka yi ti niŋ dimbɔŋɔnima n-saɣim yimaŋa, dama n ni kariti ninvuɣ’ shɛb’ ka chɛri palo tiri ya ŋɔ zaŋla dimbɔŋɔnim’ saɣim bɛmaŋa. 25Lala ka bɛ daa niŋ saɣim bɛ tiŋgbɔŋ maa, ka lala zuɣu chɛ ka n-daa darigi di tibili, ka di gbuɣi di niriba maa bahi maa. 26Amaa yinim’ gbibi n ni zali zaligu shɛŋa, ka miriya ka yi ni tiŋbia bee saan’ so ŋun be yi sani tum din chihiri maa. 27(Dama din chihiri maa ka ninvuɣ’ shɛb’ bɛn daa daŋ yi tooni be tiŋgbɔŋ ŋɔ ni daa yi tumda, ka di chɛ ka tiŋgbɔŋ maa saɣim). 28Di yi pa lala, yi yi saɣim tiŋgbɔŋ maa, di ni gbuɣi ya bahi kaman di ni daa gbuɣi zuliya shɛb’ bɛn daa be yi tooni la bahi shɛm la. 29Dama bɛnkam ti tum din chihiri maa, bɛn’ yihim’ ba bɛ daŋ ni. 30Dinzuɣu doliya n zaligunima, ka miriya ka yi ti doli ninvuɣ’ shɛb’ bɛn daa pun daŋ be tiŋgbɔŋ maa ni kaya din chihiri la, ka miriya ka yi ti zaŋ li saɣim yimaŋa: Man’ Yawɛ n-nyɛ yi Naawuni.
Red Letter Dagbani Bible © Bible Society of Ghana, 2011