Lɛvinima 16
16
Alahichi samli yɔbu dali
1Aduna bidibis’ ayi la ni daa chaŋ miri Yawɛ ka kpi la nyaaŋa, ka Yawɛ daa tɔɣisi Musa yɛtɔɣa. 2#Hib 6.19 Yawɛ daa yɛli Musa: Yɛlim’ a mabia Aduna ni o di kanna luɣ’ kasi shee din be pateesa ŋɔ puuni ŋɔ waawaayili nti zaani Alikauli Adaka pindigu la gbini, di yi pa lala o ni kpi, dama n yirila zahira sagban’ ni di pindigu maa zuɣu. 3#Hib 9.7 Amaa Aduna ni yɛn niŋ shɛm ka naanyi kpe luɣ’ kasi maa puuni m-bɔŋɔ: O bom’ naɣila’ polli ŋun ni mali alahichi sanyoo sara mini piɛlaa ŋun ni mali bɛ ni zaŋdi sara shɛli nyɔri buɣim la na.
4O zaŋm’ binyɛribil’ piɛl’ kasi ye, ka so jinjɛŋŋma’ piɛlli, ka zaŋ shɛlɔr’ piɛlli lo o shee ni ka vili bantabiga. Di nyɛla situr’ shɛli din be kasi. O sum’ kom pɔi ka naanyi zaŋ li niŋ omaŋa.
5Ka o ti chɛ ka Izraɛlnim’ bo bulah’ ayi ti o ka o mali alahichi sanyoo sara, ka zaŋ piɛla’ yino mali bɛ ni zaŋdi sara shɛli nyɔri buɣim la. 6Ka Aduna ti zaŋ naɣilaa maa mali ŋun’ maŋmaŋ’ daalahichi sanyoo sara n-yo o min’ o yiŋnim’ daalahichi samli. 7Di nyaaŋa ka o naanyi zaŋ bulah’ ayi maa ti zali Naawuni tooni Yawɛ chirigibu shee suɣili dunol’ ni, 8ka pihi kuɣa sɔŋ n-lihi nya bulah’ ayi maa sunsuuni, kuɣ’ yini ni ti nyɛla Yawɛ dini, ka kuɣ’ yini ti nyɛ Azazɛl#16.8 AZAZƐL: Ti dii bi jɛndi baŋ Azazɛl ni nyɛ shɛli, amaa shɛb’ tɛhiya ni o nyɛla tiŋgban’ nɛli ni alizin’ biɛɣu. dini. 9Ka Aduna ti zaŋ Yawɛ kuɣili ni gbaai bula’ so la m-mali sara. 10Amaa Azazɛl kuɣili ni gbaai bula’ so la ŋuna o ni ti zaŋ o la zaɣ’ nɛɔŋ ti Yawɛ n-yo bɛ daalahichi samli, ka chɛ ka bɛ zaŋ o tahi mɔɣu ni nti ti Azazɛl.
11Ka Aduna ti zaŋ omaŋmaŋ’ naɣilaa la na nti mal’ o min’ o yiŋnim’ daalahichi sanyoo sara, ka o ti kɔrigi naɣilaa maa mali ŋun’ maŋmaŋ’ daalahichi sanyoo sara. 12Ka o ti zaŋ tulaale zim tuɣindi laa m-mooi buɣim sara maligu bimbini maa zuɣu Yawɛ tooni m-pal’ li, ka niŋ tulaale zim din nyom viɛla nukurigu pali buyi ŋ-ŋmiri li biɛlabiɛla n-zaŋ li kpe pateesa maa puuni 13nti zaŋ tulaale zim maa niŋ buɣim maa ni Yawɛ tooni, ka chɛ ka di nyɔhi tuɣi kpe bimpindigu din pili Alikauli Adaka la, di yi pa lala o ni kpi. 14Ka o ti zaŋ o nubila n-niŋ naɣilaa maa ʒim m-mihi bimpindigu maa tooni, ka lan zaŋ o nubil’ suɣi ʒim maa m-mihi bimpindigu maa tooni buyopɔin.
15 #
Hib 9.12
Di nyaaŋa, ka o kɔrigi niriba maa daalahichi sanyoo sara bulaa la, ka zaŋ o ʒim maa kpe pateesa maa puuni na nti niŋ kaman o ni niŋ naɣilaa maa ʒim shɛm maa, ka zaŋ li mihi adaka pindigu la zuɣusaa mini adaka maa tooni, 16din ni chɛ ka o yihi luɣ’ kasi shee maa daɣiri ni ni Izraɛlnim’ daɣiri mini bɛ biriginsim ni bɛ daalahichi la zaa zuɣu; ka di simdi ka o niŋ Yawɛ chirigibu shee suɣili din be bɛ sani bɛ daɣiri tuma ni maa lala. 17Ka o yi ti kpe luɣ’ kasi shee maa ni ni o ti yo alahichi samli, di bi simdi ka so kpe Yawɛ chirigibu shee suɣili maa puuni hal ka o ti yo omaŋmaŋ’ min’ o yiŋnim’ daalahichi samli ni Izraɛlnim’ zaa daalahichi samli, ka naanyi yina. 18Di nyaaŋa ka o naanyi yi n-chaŋ sara maligu bimbini din be Yawɛ tooni la gbini nti mal’ li ka di be kasi, ka zaŋ naɣilaa maa mini bulaa maa ʒim shɛli n-niŋ binyila din be sara maligu bimbini la ni ti gili. 19Ka o ti zaŋ o nubil’ suɣi ʒim maa m-mihi li buyopɔin n-yihi li Izraɛlnim’ daɣiri maa ni.
Bua ŋun ʒi alahichi kpe yɔɣu
20Ka o yi mali luɣ’ kasi shee maa mini Yawɛ chirigibu shee suɣili maa ni sara maligu bimbini maa ka di be kasi naai, ŋun’ zaŋm’ bu’ nɛɔŋ la na, 21ka ŋun’ Aduna ti zaŋ o nuh’ ayi pa bu’ nɛɔŋ maa zuɣu ni, ka kaŋka Izraɛlnim’ tuumbiɛri zaa mini bɛ biriginsim zaa ni bɛ daalahichi zaa n-zaŋ li ʒili bua maa, ka bɛ ni pun pii ninvuɣ’ so zali vo bua maa chaŋ mɔɣu ni. 22Ka bua maa ni deei bɛ tuumbiɛri zaa ʒi n-chaŋ tiŋgban’ nɛli ni, ka o ti zaŋ bua maa bahi mɔɣu maa ni.
23 #
Ɛzɛk 44.19
Dimbɔŋɔ nyaaŋa ka Aduna naanyi kpe Yawɛ chirigibu shee suɣili maa puuni nti yeeg’ o ni ye neempiɛl’ shɛŋa kpe luɣ’ kasi shee maa sɔŋ nimaani, 24ka su kom luɣ’ kasi shee maa, ka zaŋ omaŋmaŋ’ binyɛra ye n-yina ti mal’ o sara shɛli bɛ ni zaŋdi nyɔri buɣim la mini niriba sara shɛli bɛ ni zaŋdi nyɔri buɣim la n-yo omaŋmaŋ’ daalahichi mini niriba maa daalahichi samli. 25Ka zaŋ alahichi sanyoo sara maligu biŋkpam la nyo buɣim sara maligu bimbini zuɣu. 26Ka ŋun vo bua la tahi Azazɛl sani la, di simdi ka o paɣ’ o nɛma ka su kom, di nyaaŋa ka o naanyi kpe bɛ sansani maa ni. 27#Hib 13.11 Ka bɛ zaŋ alahichi sanyoo sara naɣilaa la mini alahichi sanyoo sara bua la, bɛ ni zaŋ shɛb’ ʒim kpe luɣ’ kasi shee la n-yi bɛ sansani maa ni kpaŋa nti nyo bɛ gbana mini bɛ nimdi ni bɛ bina buɣim. 28Ka di simdi ni ŋun nyo li maa paɣ’ o situra ka su kom, di nyaaŋa ka o naanyi kpe bɛ sansani maa ni na.
Alahichi samli yɔbu dabisili gbibbu
29Dimbɔŋɔ nyɛla zaligu yi sani sahakam. Gol’ so ŋun pahir’ ayopɔin biɛɣu pia dali, di simdi ka yi lo noli ka di tumiya tuma dindali, yinim’ bɛn nyɛ tiŋbihi bee tinzunnim’ bɛn be yi sani, 30dama dindali maa ka bɛ ni yo yi daalahichi samli tin ya, ka yihi ya daɣiri ni; yi ni ti yi yi daalahichi zaa daɣiri ni Yawɛ tooni. 31Dindali maa ni ti nyɛla Vuhim Dabisili yi sani, ka di simdi ka yi ti lo noli; di yɛn nyɛla zaligu sahakam. 32Bɛ ni booi kpam bahi maligumaana so zuɣu ni ka o leei maligumaana zan’ o ba zaani n-ni ti ye binyɛr’ piɛl’ kasi m-mali alahichi sanyoo sara maa. 33O ni ti mali luɣ’ kasi shee maa, ka mali Yawɛ chirigibu shee suɣili maa mini sara maligu bimbini maa, ka yo maligumaaniba mini niriba maa zaa daalahichi samli. 34#Lɛv 23.26-32; Kal 29.7-11 Ka di simdi ni dimbɔŋɔ nyɛla zaligu yi sani sahakam ni bɛ yɔri Izraɛlnim’ daalahichi zaa samli tiri ba yim yuuni puuni. Ka Musa daa niŋ Yawɛ ni zal’ o shɛm maa.
Currently Selected:
Lɛvinima 16: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
