Jɔshua 4
4
Izraɛlnim’ pihi kuɣa sɔŋ ni di teeri ba Naawuni daalahiziba tuma yɛla
1Izraɛlnim’ zaa ni daa gbaai Jɔɔdɛn Mɔɣili du n-naai saha shɛli, ka Yawɛ daa yɛli Jɔshua, 2“Piim’ dɔbba pinaayi bɛn nyɛ Izraɛl zuliya pinaayi la ni niriba 3n-yɛli ba, ‘Siɣimiya Jɔɔdɛn Mɔɣili maa sunsuuni ti pii kuɣa pinaayi maligumaaniba la ni ʒe luɣ’ shɛl’ la n-ʒi li ti sɔŋ yi ni ti yɛn gbe luɣ’ shɛli yuŋ ŋɔ.’ ”
4Di saha ka Jɔshua daa boli dɔbba pinaayi bɛn nyɛ Izraɛl zuliya pinaayi maa ni niriba, ka nyɛ o ni daa pun pii shɛb’ zuliya yini kam ni la na 5nti yɛli ba, “Chamiya Yawɛ ŋun nyɛ yi Naawuni ŋɔ Daalikauli Adaka maa gbini Jɔɔdɛn Mɔɣili ŋɔ sunsuuni, ka yi zaa yinoyino ti pii kuɣ’ yiniyini m-pa yi bɔɣusapima zuɣu, ka di kalinli saɣisi yi Izraɛlnim’ zuliya pinaayi ŋɔ kalinli, 6ka di ti nyɛ shihirili yi sani. Ka yi bihi yi ti bɔhi ya dahin’ shɛli ha, ‘Ka kuɣ’ bɔnima n-lee bɔŋɔ?’ 7Di saha yin’ ti yɛlimiya ba ni bɛ daa ʒila Yawɛ Daalikauli Adaka la gbaai Jɔɔdɛn Mɔɣili du, ka di kom pirigi buyi dɔni. Dinzuɣu kuɣa ŋɔ nyɛla din yɛn chɛ ka Izraɛlnim’ kul teeri yɛlli ŋɔ yɛla sahakam.”
8Ka Izraɛlnim’ daa shiri niŋ Jɔshua ni wuhi shɛm maa, ka daa pii kuɣa pinaayi Jɔɔdɛn Mɔɣili maa sunsuuni, ka di saɣisi Izraɛlnim’ zuliya kalinli kaman Yawɛ ni daa yɛli Jɔshua shɛm. Ka bɛ daa ʒi kuɣa maa mali chaŋ bɛ ni daa yɛn gbe luɣ’ shɛli nti zaŋ li sɔŋ nimaani. 9Ka Jɔshua daa lan chɛ ka bɛ pii kuɣ’ pinaayi n-sɔŋ Jɔɔdɛn Mɔɣili maa sunsuuni luɣ’ shɛli maligumaaniba bɛn daa ʒiri Alikauli Adaka maa ni daa ʒiɛya la. Ka kuɣa maa na kul do nimaani hal ni zuŋɔ. 10Dama maligumaaniba bɛn daa ʒiri Alikauli Adaka maa daa kul kpalim ʒiɛla Jɔɔdɛn Mɔɣili maa sunsuuni m-mali hal ka Yawɛ ni daa yɛli Jɔshua ni o yɛli niriba maa shɛlikam la ti niŋ naai. Di daa niŋmi kaman Musa ni daa pun yɛli Jɔshua shɛm la zaa.
Ka Izraɛlnim’ maa daa niŋ yomyom du duli. 11Niriba maa zaa ni daa du duli naai saha shɛli ka maligumaaniba bɛn daa ʒiri Yawɛ Alikauli Adaka maa mi naanyi du duli na n-gari niriba maa tooni. 12Ka Rubin mini Gaad zuliya ni Manaasa zuliya pirigili bɛn daa lo kpara la daa gari niriba maa tooni kaman Musa ni daa pun yɛli ba ni bɛ niŋ shɛm la. 13Ninvuɣ’ shɛb’ bɛn daa lo kpara m-mali shili zani Yawɛ tooni ni bɛ chaŋ ti tuhi tɔbu maa kalinli daa nyɛla kaman tuhi’ pihinahi laasabu n-chaŋ Jɛriko bɔpiɛligu ni. 14Dindali maa ka Yawɛ daa duhi Jɔshua Izraɛlnim’ zaa ninni, ka bɛ daa lu Jɔshua sizuura kaman bɛ ni daa yi luri Musa sizuura shɛm la hal ni Jɔshua nyɛvili tariga.
15Ka Yawɛ daa yɛli Jɔshua, 16“Yɛlim’ maligumaaniba bɛn ʒiri Alikauli Adaka maa ni bɛ yim’ Jɔɔdɛn Mɔɣili maa ni na.” 17Ka Jɔshua daa yɛli maligumaaniba maa, “Yimiya Jɔɔdɛn Mɔɣili maa ni na.” 18Ka maligumaaniba bɛn daa ʒiri Yawɛ Daalikauli Adaka maa daa yi Jɔɔdɛn Mɔɣili maa sunsuuni na. Maligumaaniba maa naba ni daa kul mali ti tam taŋkpa’ kuŋ zuɣu saha shɛli ka Jɔɔdɛn Mɔɣili kom maa gba daa dii piligi n-lan zɔri chani kaman di ni daa pun chani shɛm n-lan kpe m-pali yaha.
19Goli so ŋun daŋ tooni biɛɣu pia dali ka Izraɛlnim’ daa du Jɔɔdɛn Mɔɣili duli n-chaŋ ti dɔni Giligal din daa be Jɛriko wulimpuhili polo la. 20Ka Jɔshua daa zaŋ bɛ ni daa pii kuɣ’ pinaayi shɛŋa Jɔɔdɛn Mɔɣili ni la na n-sɔŋ Giligal maa. 21Ka Jɔshua daa yɛli Izraɛlnima, “Yi bihi yi ti bɔhi bɛ banim’ dahin’ shɛli ha, ‘Ka kuɣ’ bɔnima n-lee bɔŋɔ?’ 22Di saha yin’ yɛlimiya ba Izraɛlnim’ ni daa chaŋ taŋkpa’ kuŋ zuɣu Jɔɔdɛn Mɔɣili ŋɔ ni n-du li shɛm yɛla. 23Dama Yawɛ ŋun nyɛ yi Naawuni ŋɔ n-daa chɛ ka Jɔɔdɛn Mɔɣili kom vuui ka chɛ soli tin ya hal ka yi ti gbaai li du. Di daa niŋmi kaman Yawɛ ŋun nyɛ yi Naawuni ŋɔ ni daa chɛ ka Teeku Ʒiɛɣu kom vuui ka chɛ soli ti ti hal ka ti ti gbaai li du shɛm la. 24Dimbɔŋɔ daa niŋmi ni di chɛ ka dunia ŋɔ ni ninsalinim’ zaa baŋ Yawɛ yiko ni galisi shɛm. Ka di chɛ ka yi lu Yawɛ ŋun nyɛ yi Naawuni ŋɔ sizuura sahakam.”
Red Letter Dagbani Bible © Bible Society of Ghana, 2011