Jɔshua 3
3
Izraɛlnim’ gbaai Jɔɔdɛn Mɔɣili du
1Ka Jɔshua mini Izraɛlnim’ zaa daa ti yiɣisi asibaasi n-yi Akasia chaŋ Jɔɔdɛn Mɔɣili ni nti dɔn’ nimaani ni bɛ gbaai li du. 2Di daba ata dali ka Izraɛl kpambaliba daa yiɣisi kpe bɛ sansani maa ni chani gindi 3n-yɛri niriba maa, “Yi yi ti kul nya ka maligumaaniba kpuɣi Yawɛ ŋun nyɛ yi Naawuni ŋɔ daalikauli Adaka la ʒi n-chana, yin’ yiɣisimiya yi dooshee ŋɔ doli ba; 4ka di chɛ ka yi baŋ yi ni yɛn doli so’ shɛli, dama yi na ʒi n-doli soli maa. Amaa lee miriya ka yi miri Alikauli Adaka maa. Doliya di nyaaŋa m-be li larigim kaman kilomita yini laasabu.”
5Ka Jɔshua daa yɛli Izraɛlnim’ maa, “Malimiya yimaŋa, dama biɛɣuni Yawɛ sa ni tum alahiziba tuma yi sani.” 6Di saha ka Jɔshua daa yɛli maligumaaniba, “Kpuɣimiya Alikauli Adaka maa m-be niriba maa tooni chana.” Ka bɛ daa kpuɣi Alikauli Adaka maa m-be niriba maa tooni chana.
7Ka Yawɛ daa yɛli Jɔshua, “N ni duh’ a Izraɛlnim’ zaa ninni zuŋɔ dabisili ŋɔ; ka bɛ baŋ ni n ni be a sani kaman n ni daa be Musa sani shɛm la. 8Yɛlim’ maligumaaniba bɛn ʒiri Alikauli Adaka maa ni bɛ yi ti paai Jɔɔdɛn Mɔɣili ni, bɛn’ kpalimmi zani di kom maa ni baalim.”
9Di saha ka Jɔshua daa yɛli Izraɛlnima, “Kamiya kpe na nti wum Yawɛ ŋun nyɛ yi Naawuni ŋɔ ni yɛn yɛli ya shɛm.” 10Ka Jɔshua daa lan yɛli, “Dimbɔŋɔ puuni ka yi ni baŋ ni Naawuni ŋun kul be ŋɔ be yi sani, ka ni kari Keenannim’ mini Hitinim’ ni Hivinim’ ni Pɛrizinim’ ni Gɛrigashinim’ ni Amɔrinim’ ni Jɛbusinima. 11Nyamiya, maligumaaniba ni ʒi dunia zaa Duuma Daalikauli Adaka maa n-gari yi tooni chaŋ ti gbaai Jɔɔdɛn Mɔɣili du. 12Dinzuɣu piimiya dɔbba pinaayi bɛn nyɛ Izraɛl zuliya pinaayi la ni niriba. 13Ka maligumaaniba bɛn ʒiri Yawɛ ŋun nyɛ dunia zaa Duuma Daalikauli Adaka maa naba yi ti kul shihi Jɔɔdɛn Mɔɣili kom, di kom maa ni chɛ zɔbu, ka di kom din zɔri yiri mɔɣili maa zuɣusaa polo n-sirigirina la mi fo n-zani n-tiɣisi dɔni luɣ’ yini.”
14Saha shɛli niriba maa ni daa yi bɛ tantinim’ ni na chani ni bɛ ti gbaai Jɔɔdɛn Mɔɣili du, ka maligumaaniba bɛn daa ʒiri Alikauli Adaka maa daa gari bɛ tooni chana. 15Ka maligumaaniba bɛn daa ʒiri Alikauli Adaka maa ni daa mali ti paai Jɔɔdɛn Mɔɣili maa ni n-zaŋ bɛ naba siɣi di kom ni saha shɛli, (dama Jɔɔdɛn Mɔɣili daa yi kul kpɛrimi paani puri atam kpuɣibu saha zaa), 16ka ko’ shɛli din daa zɔri yiri mɔɣili maa zuɣusaa polo na la dii kpalim zani n-tiɣisi dɔni mali lala hal ti paai Adam din nyɛ fɔntin’ shɛli din daa baɣi Zarɛtan la, ka ko’ shɛli din mi daa zɔri kpari Araba Teeku din nyɛ Yalim Teeku polo la gba daa chɛ zɔbu, ka niriba maa daa gbaai mɔɣili maa du zaŋ lab’ Jɛriko tooni polo. 17Niriba maa ni daa duri maa, maligumaaniba bɛn daa ʒiri Yawɛ Daalikauli Adaka la daa kul kpalim ʒiɛla mɔɣili maa sunsuuni tiŋkuŋ zuɣu hal ka niriba maa zaa ti du Jɔɔdɛn Mɔɣili maa naai.
Red Letter Dagbani Bible © Bible Society of Ghana, 2011