Jɔshua 19
19
Bɛ ni zaŋ tiŋgban’ shɛli ti Simiɔn zuliya niriba
1Simiɔn zuliya n-daa pah’ ayi n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. Bɛ tiŋgbani maa daa bela Juda zuliya tiŋgban’ ni. 2Bɛ tiŋgbani maa ni fɔŋ kara n-daa nyɛ: Bɛrishiiba mini Shiiba ni Molada 3ni Hazarishual ni Bala ni Ɛzɛm 4ni Ɛlitolad ni Bɛtul ni Hɔrima 5ni Zikilag ni Bɛtimaakabɔt ni Hazarisusa 6ni Bɛtilɛbaut ni Sharuhɛn: ka di zaa kalinli yiɣisi fɔŋ kara pinaata m-pahi di tiŋkpansi zuɣu.
7Fɔŋ kar’ shɛŋa gba daa lan beni yaha. Dina n-nyɛ: Ain mini Rimɔn ni Ɛta ni Ashan: ka di zaa kalinli yiɣisi fɔŋ kara anahi m-pahi di tiŋkpansi zuɣu 8#1 Yɛl 4.28-33 zaŋ tabili tiŋkpan’ shɛŋa zaa din gil’ li zaŋ hal ti paai Baalatibeer (bee Rama din be Nɛgɛb la). Simiɔn zuliya niriba ni daa deei tiŋgban’ shɛli ka di leei bɛ dini m-bala. 9Juda zuliya niriba tiŋgbani palo ni daa galisi pam zuɣu, ka bɛ daa ŋmaai di shɛli polo ti Simiɔn zuliya niriba; ka Simiɔn zuliya niriba tiŋgbani maa daa be Juda zuliya niriba tiŋgbani maa puuni.
Bɛ ni zaŋ tiŋgban’ shɛli ti Zɛbulɔn zuliya niriba
10Zɛbulɔn zuliya n-daa pah’ ata n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. Bɛ tiŋgbani maa daa zaŋmi hal ti paai Sarid 11n-yi nimaani n-zaŋ kpa wulinluhili polo m-mali hal ti paai Mariɛl n-zaŋ ti to Dabɛshɛt n-gari chaŋ hal ti paai Jokiniam wulimpuhili polo kulibɔŋ la. 12Ka di tintariga maa daa lan kpuɣi Sarid n-zaŋ kpa di wulimpuhili polo hal ti paai Chisilɔtabo n-zaŋ gari hal ni Dabɛrat n-chaŋ hal ti paai Jafia. 13Ka yi nimaani n-zaŋ kpa wulimpuhili polo hal ni Gatihɛfa m-mali hal ni Ɛtikazin nti ŋmaligi kpa Niya polo n-zaŋ hal ti paai Rimɔn. 14Zaŋ lab’ nuzaa polo mi di daa chaŋmi ti ŋmaligi kpa Hannatɔn polo n-zaŋ hal ti paai di tariga Ɛfitahɛl Vinvamli ni. 15Fɔŋ kar’ shɛŋa din pahi n-nyɛ: Katat mini Nahalal ni Shimrɔn ni Idala ni Bɛtilihɛm: ka di zaa kalinli yiɣisi fɔŋ kara pinaayi m-pahi di tiŋkpansi zuɣu. 16Fɔndi ŋɔ mini tiŋkpansi ŋɔ zaa daa bela Zɛbulɔn zuliya ni daa deei tiŋgban’ shɛli ka di leei bɛ dini kaman bɛ daŋ niriba ni nyɛ shɛm la puuni.
Bɛ ni zaŋ tiŋgban’ shɛli ti Isaka zuliya niriba
17Isaka zuliya n-daa pah’ anahi n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. 18Bɛ tiŋgbani maa ni ka Jɛziriil mini Chɛsulɔt ni Shunɛm 19ni Hafaraim ni Shiɔn ni Anaharat 20ni Rabit ni Kishiɔn ni Ɛbɛz 21ni Rɛmɛt ni Ɛnganim ni Ɛnhada ni Bɛtipazɛz daa be. 22Ka bɛ tintariga daa zaŋ chaŋ hal ti paai Tabo mini Shahazuma ni Bɛtishɛmɛshi n-zaŋ ti paai di tariga Jɔɔdɛn Mɔɣili ni: ka di zaa kalinli yiɣisi fɔntiŋ’ kara pinaayɔbu m-pahi di tiŋkpansi zuɣu. 23Fɔndi ŋɔ mini di tiŋkpansi maa zaa daa bela Isaka zuliya ni daa deei tiŋgban’ shɛli, ka di leei bɛ dini kaman bɛ daŋ niriba ni nyɛ shɛm maa ni.
Bɛ ni zaŋ tiŋgban’ shɛli ti Asha zuliya niriba
24Asha zuliya n-daa pah’ anu n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. 25Bɛ tiŋgbani maa ni tinsi n-nyɛ: Hɛlikat mini Hali ni Bɛtin ni Akishaf 26ni Alammɛlɛk ni Amad ni Mishal. Zaŋ kpa wulinluhili polo, di daa zaŋmi hal ni Kamɛl mini Shihɔrilibinat. 27Ka di tintariga daa ŋmaligi kpa wulimpuhili polo n-zaŋ hal ni Bɛtidagɔn m-mali hal ti paai Zɛbulɔn mini Ifitahɛl Vinvamli din be Bɛtimɛk mini Nɛyɛl soli nuzaa polo la, ka kul zaŋ kpa nuzaa polo maa hal ti paai Kabul 28mini Ɛburɔn ni Rɛhɔb ni Hamɔn ni Kana m-mali hal ti paai Sidɔn din nyɛ tin’ tital’ la. 29Ka di tintariga maa lan ŋmaligi chaŋ Rama m-mali lala hal ti paai Taai fɔŋ din nyɛ bɛ ni me birini gili shɛl’ la. Ka lan ŋmaligi nimaani chaŋ hal ni Hɔsa m-mali lala hal ti paai di tariga Mɛditirɛniɛn Teeku ni. Ka Mahalab mini Akizib 30ni Umma ni Afɛk ni Rɛhɔb gba daa pahi: ka di zaa kalinli yiɣisi fɔntiŋ’ kara pisinaayi m-pahi di tiŋkpansi zuɣu. 31Fɔndi ŋɔ mini di tiŋkpansi maa zaa daa bela Asha zuliya ni daa deei tiŋgban’ shɛli ka di leei bɛ dini kaman bɛ daŋ niriba ni nyɛ shɛm maa ni.
Bɛ ni zaŋ tiŋgban’ shɛli ti Naftali zuliya niriba
32Naftali zuliya n-daa pah’ ayɔbu n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. 33Bɛ tintariga daa kpuɣila Hɛlɛf zaŋ hal ti paai oki tia din be Zaananim la n-gari chaŋ hal ni Adaminɛkɛb mini Jabiniil m-mali lala hal ti paai Lakkum n-zaŋ hal ti paai di tariga Jɔɔdɛn Mɔɣili ni. 34Ka di tintariga daa ŋmaligi nimaani n-zaŋ kpa wulinluhili polo chaŋ hal ni Azinɔtitabo zaŋ ti paai Hukok n-zaŋ ti to Zɛbulɔn tiŋgbani nudirigu polo, ka zaŋ ti to Asha tiŋgbani mi wulinluhili polo, ka lan zaŋ ti to Juda gba tiŋgbani wulimpuhili polo Jɔɔdɛn Mɔɣili ni. 35Bɛ ni daa me birini gili fɔŋ kar’ shɛŋa n-nyɛ: Zidim mini Zɛr ni Hammat ni Rakat ni Kinɛrɛt 36ni Adama ni Rama ni Hazɔr 37ni Kɛdɛshi ni Ɛdirɛi ni Ɛnhazɔr 38ni Yirɔn ni Migidalɛl ni Hɔrɛm ni Bɛtanat ni Bɛtishɛmɛshi: ka di zaa kalinli yiɣisi fɔntiŋ’ kara pisiyinika m-pahi di tiŋkpansi zuɣu. 39Fɔndi ŋɔ mini di tiŋkpansi maa zaa daa bela Naftali zuliya ni daa deei tiŋgban’ shɛli ka di leei bɛ dini kaman bɛ daŋ niriba ni nyɛ shɛm maa ni.
Bɛ ni zaŋ tiŋgban’ shɛli ti Dan zuliya niriba
40Dan zuliya n-daa pah’ ayopɔin n-nyɛ bɛ ni ti shɛb’ tiŋgbani kaman bɛ daŋ niriba ni nyɛ shɛm. 41Fɔntiŋ’ kar’ shɛŋa din daa be bɛ tiŋgbani maa ni n-nyɛ: Zɔra mini Ɛshitaol ni Irishɛmɛsh 42ni Shaalabin ni Aijalɔn ni Itila 43ni Ɛlɔn ni Timna ni Ɛkurɔn 44ni Ɛlitɛke ni Gibɛtɔn ni Baala 45ni Jɛhud ni Bɛnɛbɛrak ni Gatirimɔn 46ni Mɛjarikɔn ni Rakɔn ka bɛ tintariga bɔbili chaŋ ti gili Jɔpa. 47#Zuɣ 18.27-29 Bɛ ni daa ŋme n-fa Dan zuliya niriba tiŋgban’ shɛli bɛ ni daa pun su la nyaaŋa, ka bɛ gba daa chaŋ ti liri Lɛshɛmnima ŋ-ŋme n-fa li ʒini ka zaŋ bɛ yab’ Dan yuli boli tiŋ’ maa. 48Fɔndi ŋɔ mini di tiŋkpansi zaa daa bela Dan zuliya ni daa deei tiŋgban’ shɛli ka di leei bɛ dini kaman bɛ daŋ niriba ni nyɛ shɛm maa ni.
Tiŋgban’ shɛli din bahindi nyaaŋa taribu
49Bɛ ni daa piri tiŋgbɔŋ maa ti Izraɛl zuliya maa ka di leei bɛ dini naai, ka Izraɛlnim’ daa zaŋ tiŋgbɔŋ maa ni tin’ shɛli ti Nan bia Jɔshua ka di leeg’ o dini. 50Yawɛ ni daa pun zali shɛm zuɣu, bɛ daa zaŋla Jɔshua maŋmaŋ’ ni daa pun yɛli ni o bɔri tin’ shɛli la ti o. Bɛ ni daa zaŋ tin’ shɛli ti o maa yuli n-nyɛ Timnatisɛra. Tiŋ’ maa daa bela Ifriim zuliya niriba tiŋgban’ ni zoya zuɣu. Ka Jɔshua daa mali me tiŋ’ maa ʒini.
51Maligumaana Ɛliɛza mini Nan bia Jɔshua ni Izraɛl kpamba n-daa pihi kuɣa sɔŋ Yawɛ tooni Shilo, tanti suɣili la dunol’ ni lihi nya, ka piri tiŋgbɔŋ maa yaɣili kam tari. Lala ka bɛ daa niŋ tari li naai.
Red Letter Dagbani Bible © Bible Society of Ghana, 2011