Aizaia 7

Bɛ tim tumo Naa Ahaz sani

1 # 2 Nan 16.5; 2 Yɛl 28.5-6 Juda naa Ahaz ŋun daa nyɛ Jɔtam bia, ka nyɛ Uzia yaaŋa la ʒiɛman’ ni ka Aram naa Rɛzin mini Izraɛl naa Pɛka ŋun daa nyɛ Rɛmalia bia la daa chaŋ ti liri Jɛrusalɛmnima, amaa ka daa bi tooi nyaŋ ba.

2Juda nayilinim’ ni daa wum ni Aram mini Ifriim zuliya naai noli, Ahaz min’ o niriba ni daa sɔhirimi kaman pɔhim ni ʒiɛri tibɔŋ ni tihi ka di damdi shɛm la.

3Di saha ka Yawɛ daa yɛli Aizaia “A min’ a bia Shiajashub#7.3 SHIAJASHUB: Hiburuli ni yuli ŋɔ gbinni nyɛla, “Niriba biɛla kɔŋko n-ni labina”. cham’ Ahaz sani. O be zuɣusaa polo biaŋ la polo kpaluhi solɔɣu la zuɣu. 4Yɛlim’ o ni o maam’ o ni ka mali shili gu, ka di zɔri dabiɛm. O mi di chɛ ka o suhu zɔhiri Rɛzin mini Rɛmalia bia Aram bɛn suhu yiɣisi pam ka nyɛ bɛn ŋmani buɣim datɛhi ayi la zuɣu. 5Dama Aram mini Ifriim zuliya ni Rɛmalia bia maa lo nia biɛɣu zaŋ chaŋ yi polo ka yɛra, 6‘Chɛliya ka ti chaŋ ti liri Juda tiŋgbɔŋ n-saɣim li, ka fa li leei timaŋmaŋ’ tiŋa, ka zaŋ Tabiil bia la leei di naa.’ ” 7Amaa man’ Yawɛ ŋun nyɛ yi Duuma ŋɔ yɛliya,

“Di ku zani,

di mi ku niŋ pali.

8Dama Aram tinzuɣu nyɛla Damaskus,

ka Rɛzin gba nyɛ Damaskus zuɣulana.

(Amaa zaŋ chaŋ yuun’ pihiyɔbu ni anu saha, Ifriim zuliya maa ti ku lan beni bee nti nyɛ zuliya yaha.)

9Ifriim zuliya maa tinzuɣu nyɛla Samaria,

ka Samarianim’ zuɣulana nyɛ Rɛmalia bia la.

Yi yi bi niŋ yɛda viɛnyɛliŋga,

yi ku di nasara.”

Imanuɛl palo yibu shihirili

10Ka Yawɛ daa lan yɛli Ahaz yaha, 11“Yɛlim’ Yawɛ ŋun nyɛ a Naawuni ŋɔ ni o wuhim’ a shihirili; di ni tooi nyɛ din zilima kaman kpiimba biɛhigu shee bee din du kaman zuɣusaa la.” 12Amaa ka Ahaz daa yɛli, “N ku yɛl’ o. N ku buɣisi Yawɛ ni n nya.” 13Di saha ka Aizaia daa yɛli, “Yinim’ Dauda zuliya ŋɔ, pumpɔŋɔ wummiya, yi ni niŋdi shɛm chɛ ka ninsalinim’ nyee nyooni la, lala ka yi bɔri ni yi niŋ chɛ ka n Naawuni ŋɔ gba nyee nyɔni. 14#Mat 1.23 Dinzuɣu ti Duuma maŋmaŋ’ ni wuhi ya shihirili. Nyamiya, paɣisari’ so ni ti niŋ pua n-dɔɣi bidibiga, ka bɛ ti bol’ o yuli Imanuɛl.”#7.14 IMANUƐL: Hiburuli ni yuli ŋɔ gbinni nyɛla, “Naawuni be ti sani”. 15Zaŋ chaŋ saha shɛl’ o ti yɛn baŋ din viɛli piibu ka zaɣisi din bi viɛla, o ni ti dirila waagasi mini shiri. 16Zaŋ chaŋ saha shɛl’ o ti yɛn pii zaɣ’ suŋ ka zaɣisi zaɣ’ biɛɣu, bɛ ni ti zo ka chɛ nanima ayi shɛb’ bɛn kpɛhiri ya dabiɛm ŋɔ tiŋgbana maa.

17“Yawɛ ni chɛ ka zaɣ’ biɛɣu paag’ a min’ a niriba ni a yaannim’ zuliya, ka nyɛ zaɣ’ biɛ’ shɛli din tatabo na ʒi m-paai ya, Izraɛl zuliya ni daa woligi ka chɛ Juda zuliya dahin shɛl’ la zaŋ kana zuŋɔ. O yɛn chɛmi ka Asiria naa kana ti liri ya.

18“Di saha Yawɛ ni ti vulim vuliŋga m-boli Ijiptinim’ ka bɛ yi Nail Mɔɣili polo kana kaman zɔhi la, ka Asirianim’ gba ti kana kaman shihi la. 19Bɛ ni ti kana ti mɛhim vinvama din be gbirimagbirima ni, ni tampima voya ni, ka mɛhim gɔhi tuturi mini mɔri ni.

20“Di saha ti Duuma ni ti bu wanzam ŋun nyɛ Asiria naa paa ka o yi Yufretiiz Mɔɣili duli n-kana ti pini yi zuɣuri mini yi teensi ni yi niŋgbuna ni kɔbiri.

21“Di saha nir’ yi ti tooi mali naɣisa’ yino mini piɛr’ ayi, 22bɛ ni ti mali bihim pam ka o ŋubiri waagasi; dama ŋunkam ti kpalim be tiŋgbɔŋ maa ni ni ti diri waagasi mini shiri.

23“Di saha suligunyinyari mini gɔhi ni ti zooi lim wain tihi din mali wula tuhilituhili, ka di zaɣ’ yini kam ni tooi da anzinfa laɣibaligu tuhilituhili. 24Nir’ ni ti zaŋ tɔbu mini piɛma kpe nimaani ni o ti go mɔɣu, dama gɔhi mini suligunyinyaɣu ni ti zooi lim tiŋgbɔŋ maa zaa. 25Dabo’ shɛŋa zaa zuɣu bɛ ni daa kɔri bindira, gɔhi mini suligunyinyaɣu ni ti zooi lim nimaani ka so ku tooi kpe di ni, amaa nimaani ni ti leela niɣi mini piɛri gɔrim shee.”

Currently Selected:

Aizaia 7: RLDB

Highlight

Copy