Aizaia 66

Yawɛ kari zuliya kam saria

1 # Mat 5.34-35; 23.22 Yawɛ yɛliya:

Alizanda nyɛla n nam ʒiishee,

ka dunia ŋɔ nyɛ n naba zaashee.

Ka yili bɔ ka yi yɛn me n-ti ma?

Ka bee luɣ’ dini n-lee yɛn nyɛ n vuhibu shee?

2 # Tuma 7.49-50 Yawɛ yɛliya, Mani n-nam binshɛɣukam din beni ŋɔ.

N nini ni tiɣi ninvuɣ’ shɛb’ nyɛla bɛn siɣisiri bɛmaŋa ka niŋdi tuuba,

ka luri n yɛligu sizuura,

ka doli n yɛligu maa.

3Amaa niriba ŋɔ dolila bɛmaŋmaŋ’ suhuyubu soli

n-tumdi din chihira

ka mali suhupiɛlli di zuɣu.

Ka so yi ku naɣilaa mali sara,

di ŋmanila ninsala ka o ku;

ka so yi ku piɛɣu mali sara,

di ŋmanila baa ka o ku;

ka so yi zaŋ chi mali sara,

di ŋmanila kuruchu ʒim ka o zaŋ mali sara maa;

ka so mi yi tuɣili sara maligu tulaale zim,

di ŋmanila ninvuɣ’ so ŋun jɛmdi buɣili.

4Dinzuɣu n gba ni chɛ

ka alɔbo din nyɛ bɛ ni zɔri shɛl’ la lu bɛ zuɣu.

Dama n kuhi boli ba ka so bi saɣi,

ka tɔɣisi ba yɛtɔɣa ka so bi saɣi wum li,

amaa ka tumdila tuumbiɛri,

ka niŋdi din bi piɛli n suhu.

5Yinim’ bɛn doli Yawɛ yɛligu ŋɔ,

wummiya o ni yɛl’ shɛm.

Yi niriba bɛn jɛn ya ka zaɣisi ya

n zuɣu ka yɛra,

“Chɛliya ka Yawɛ wuh’ o yiko ni nyɛ shɛli

ka di niŋ ya suhupiɛlli ka ti nya.”

Amaa bɛna n-yɛn di vi.

6Wummiya vu’ shɛli din yɔri pampam tiŋ’ puuni ŋɔ,

ka wumya vuri din yiri Naawuni jɛmbu duu na ŋɔ!

Yawɛ n-darigir’ o dimnim’ tibili maa!

7 # Kah 12.5 N tiŋ’ kasi maa ŋmanila paɣ’ so

ŋun dɔɣi ka bi wolisi.

8So na mi n-nya lahizibu yɛlli ŋɔ?

Tiŋgbɔŋ niriba ni tooi zani dahin yini yɛligi?

Bee zuliya ni tooi zani dahin yini yɛligi?

Ziɔn ku nahim ka di yuui,

ka o niriba yɛligi.

9Yawɛ ŋun nyɛ yi Naawuni ŋɔ yɛliya,

“Yi tɛhiya ni n tahila puli niŋbu na ka ku tahi di dɔɣibu na?

10Yinim’ bɛn zaa yuri Jɛrusalɛm,

maliya suhupiɛlli di zuɣu,

ka chɛ ka yi mini li laɣim mali suhupiɛlli.

Yinim’ bɛn zaa fabindi di zuɣu,

chɛliya ka yi mini li laɣim mali suhupiɛlli pam!

11Yi ni ti di di suhumaabo daazichi din galisi pam la daanfaani

kaman bia ni mɔɣiri o ma bihili shɛm la.”

12Dama Yawɛ yɛliya,

“N ni chɛ ka yi nyamma tɔŋ pam.

Zuliya shɛb’ azichi ni zo na

kaman mɔɣili kom la nti kpɛn ya;

ka yi be kaman bi’ so ŋun ma kpuɣ’ o ʒili o naba zuɣu,

n gbib’ o ni yurilim m-mɔɣisir’ o bihim la.

13N ni kpaŋsi yi suhuri

kaman paɣ’ ni kpaŋsir’ o bia suhu shɛm la.

Yi ni nya suhukpaŋsibo Jɛrusalɛm.

14Dimbɔŋɔ yi niŋ ka yi nya,

yi suhu ni paligi,

ka yi nya kpiɔŋ mini alaafee,

ka zoori kaman momaha la;

ka di chɛ ka yi baŋ ni man’ Yawɛ nyɛla ŋun sɔŋdi ninvuɣ’ shɛb’ bɛn deeri n noli;

ka chɛ ka n suhu yiɣisiri bahiri n dimnim’ zuɣu.”

15Nyama, Yawɛ ni gbib’ buɣim kana.

O chɛchɛbunsi yuri zɔbu yɛn ŋmanila pɔhimʒiɛpiliŋga,

ka o zaŋ li kana ti darig’ o suhu ni yiɣisi bahi ninvuɣ’ shɛb’ zuɣu tibili.

16Yawɛ yɛn zaŋla buɣim min’ o takɔbi

n-darigi dunia ŋɔ niriba bɛn zaa mali taali tibili.

O ni ti chɛ ka niriba pam kpi.

17Yawɛ yɛliya ni ninvuɣ’ shɛb’ bɛn mali bɛmaŋa n-doli tab’ chani buɣa maligu shee mini bɛn ŋubiri kuruchunim’ ni jɛŋgbarisi, ka diri bindiri yoya la bahigu saha miriya.

18M mi bɛ tɛha mini bɛ tuma. N kanimina ni n ti laɣim zuliya kam mini tinzun’ yɛtɔɣa balibu kam nim’ zaa ka bɛ kana ti nya n jilima, 19ka baŋ ni mani n-nyɛ ŋun darigiri bɛ tibili. Amaa n ni tiligi bɛ shɛba n-zaŋ ba tim zuliya shɛb’ mini tiŋgban’ shɛŋa din be katiŋ’ ha ka na bi wum n yɛla bee n-nya n yiko tuma la nim’ sani. Tinsi maa n-nyɛ: Speen mini Libia ni Lidia din niriba nyɛ peentɔri biinsi la ni Tubal ni Giriis, ka bɛ ti wuhi di niriba n yiko ni nyɛ shɛm, 20ka ʒi yi mabihi bɛn be bɛ san’ la kaman pini la na nti ti ma. Bɛ ni zaŋ ba balisi yuri mini buntaansi ni laakumnima ni chɛchɛbunsi ni tɔrokɔnim’ ni n-tahi Jɛrusalɛm na n zoli din be kasi la zuɣu kaman Izraɛlnim’ ni zaŋdi chi n-niŋdi adiini soli ŋman’ shɛŋa din be kasi ni n-tahiri Yawɛ jɛmbu duu na shɛm la. 21N ni zaŋ bɛ ni shɛb’ leei maligumaaniba ni Lɛvinima. Man’ Yawɛ n-yɛli lala maa.

22 # Aiz 65.17; 2 Pita 3.13; Kah 21.1 Yawɛ lan yɛli,

“N ni yɛn nam zuɣusaa zaɣ’ palli shɛli

mini dunia palli shɛl’ la ni yɛn yuui shɛm,

lala ka yi zuliya ni yi yuli yɛn yuui.”

23Yawɛ lan yɛli yaha,

“Goli palli kam chuɣu dali

mini Vuhim Dabisili dali kam

di simdi ni zuliya kam zaa kana ti jɛm ma.

24 # Maak 9.48 Bɛ yi ti yi, bɛ ni nya ninvuɣ’ shɛb’ bɛn zaɣisi ma ka bɛ kpi n-doya, ka zunzuya bɛn yɛn di ba bi kpira; ka buɣim din yɛn di ba gba bi kpira. Ka bɛ dooshee maa ni mali dabiɛm pam sokam zaa sani.”

Currently Selected:

Aizaia 66: RLDB

Highlight

Copy