Aizaia 54
54
Yawɛ ni yuri Izraɛlnim’ shɛm
1 #
Gal 4.27
Jɛrusalɛm, A daa ŋmanila paɣiŋoo,
amaa pumpɔŋɔ, yilimi yila
pampam ni suhupiɛlli.
Nyini ŋun na ʒi n-wolisi ŋɔ!
Yawɛ yɛliya, Pumpɔŋɔ,
a ni mali bihi gari paɣ’ so
ŋun mali yidana.
2Yɛligim’ a suɣili.
Di niŋ zinchili.
Kpam’ a kpahi ka di kpɛma,
ka voog’ a mihi ka di kpaŋ.
3A ni yɛligi kpa nudirigu
mini nuzaa polo,
ka a niriba ni su zuliya shɛba,
ka yi ti ʒini tin’ shɛŋa
din daa nyɛ dabari la ni.
4Di zɔri dabiɛm, a ku di vi,
di chɛ ka a suhu zɔhira,
a ku nya filiŋ.
A ni tam a bipalitali saha vi yɛla,
ka tam saha shɛli a ni daa nyɛ
pakoli ka nya filiŋ shɛl’ la yɛla.
5Dama ŋun nam a ni be a
kaman paɣ’ yidan’ ni be o shɛm la.
O yuli n-nyɛ,
“Yawɛ ŋun nyɛ Tɔbbihi Naa.”
Ŋuna n-nyɛ a tiligira
ŋun nyɛ Izraɛl Naawuni
ŋun be kasi la.
O yuli n-lan nyɛ,
dunia zaa Naawuni.
6Yawɛ ni lan bol’ a labisina
kaman paɣ’ so bɛ ni zaɣisi
ka o mali suhugarigu la.
Naawuni yɛliya, “A ŋmanila paɣ’ so
ŋun kuli dooyili o paɣisarilim ni
ka bɛ ti zaɣis’ o.
7N daa zaɣis’ a la
saha biɛla puuni,
amaa n nambɔzɔbo
din galisi pam puuni,
n ni lan zaŋ a labisi n sanna.”
8Man’ Yawɛ ŋun nyɛ
a tiligira la yɛliya,
“N suhu n-daa yiɣisi pam
saha biɛla puuni,
ka n chɛ a bahi.
Amaa n yurilim din bi
naari la zuɣu,
n ni zo a nambɔɣu.”
9 #
Pil 9.8-17
Nuhu ʒiɛman’ ni,
n ni daa lo alikauli ni
n ku chɛ ka kom
lan di dunia la,
lala ka n lo alikauli
ni n ku lan chɛ ka
n suhu yiɣisi bah’ a zuɣu,
ka mi ku lan darig’ a tibili.
10Man’ Yawɛ ŋun zɔr’ a
nambɔɣu la yɛliya,
“Zoya mini kunkuna ni vuui,
amaa n yurilim din bi
naari la ku vuui ka chɛ a;
ka n suhudoo alikauli la
gba ku vuug’ a sani.”
Jɛrusalɛm ni yɛn be shɛm dahin’ shɛli ha
11Sanʒiɛɣu ni nahim tin’ shɛli,
ka di bi nya sɔŋsim ŋɔ,
n ni zaŋ kuɣ’ viɛla
me a zali,
ka zaŋ safaya kuɣa
sɔŋ a tanzaa.
12 #
Kah 21.18-21
N ni zaŋ rubis
me a pihi,
ka zaŋ kuɣ’ shɛŋa
din nyɛlisiri me a dunoya,
ka zaŋ kuɣ’ viɛla
m-mal’ a gooni.
13 #
Jɔn 6.45
Man’ Yawɛ maŋmaŋ’
ni wuh’ a zuliya maa zaa,
ka chɛ ka bɛ nyamma yɛligi pam.
14Wuntia puuni ka yi
ni niŋ yaa.
So ku lan nahim ya,
ka dabiɛm ku lan mali ya.
So ku lan kpɛhi ya dabiɛm,
di ni ti niŋ ya katiŋa.
15So yi liri ya,
di pala n yɛda
ni ka o niŋ lala.
Ka ŋunkam liri ya,
o ku di nasara.
16Nyama, Mani n-nam machɛle,
ka ti zuɣiri pɔhim,
ka di chɛ ka
buɣimsala buɣim nyɛligira,
ka machɛli kuriti bidibbini
din ni ku di bukaata.
Mani n lan nam ŋun bɔhiri
biɛri ka o kuri niriba.
17Amaa bɛ ni mali bidibbin’
shɛlikam jɛndi ya ku tooi niŋ ya shɛli;
ka yi ni tooi garigi
ŋunkam zaŋ ya taali bɔhigu.
Man’ Yawɛ ni zabi n daba zuɣu, ka ti ba nasara.
Currently Selected:
Aizaia 54: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
