Aizaia 52
52
Naawuni ni tiligi Jɛrusalɛm
1 #
Kah 21.2, 27 Jɛrusalɛm, yiɣisima,
yiɣisima, niŋmi yaa!
Naawuni tiŋ’ kasi ŋɔ,
zaŋm’ a situr’ suma ye.
Chɛfirinim’ mini daɣirinim’
ku lan kpe a puuni yaha.
2Jɛrusalɛm din be
dabitim ni ŋɔ,
yiɣisim’ taŋkpaɣu ni
n-dam amaŋa.
Ziɔn bipuɣiŋga ŋun be
dabitim ni ŋɔ,
yihim’ mii din be
a nyiŋgol’ ni bahi.
3Yawɛ yɛliya, “Pa liɣiri ka bɛ daa zaŋ dan ya leei daba maa. Dinzuɣu pa liɣiri ka n yɛn zaŋ yo yi zuɣu n-yihi ya dabitim maa ni.” 4Dama ti Duuma NAAWUNI lan yɛli, “N niriba daa tuui kulila Ijipti ti be nimaani. Nyama, di nyaaŋa ka Asirianim’ gba daa ti nahim ba yoli. 5#Rom 2.24 Ka pumpɔŋɔ yi bela Babilɔn, ka bɛ gba zaŋ ya leei bɛ daba yoli. Ka bɛn sun ya maa nyuri bara ka diri dari, ka kul maani ma ansarisi sahakam, ka ʒiɛmdi n yuli dabisili kam. 6Dahin shɛli kanna, ka yi ni ti baŋ ni mani n-nyɛ Naawuni; mani n-nyɛ ŋun tɔɣisi ya yɛtɔɣa maa.”
7 #
Nah 1.15; Rom 10.15; Ɛfɛs 6.15 Nyam’ tumo ŋun mali lahiba’ suŋ
mini suhudoo yɛtɔɣa n-zɔri
duri zoya kanna ŋɔ
naba ni viɛli pam shɛm!
O moonila tiliginsim molo
yɛri Ziɔnnima,
“Yi Naawuni nyɛla naa.”
8Nyamiya, yi tiŋguliba laɣim yili suhupiɛlli yila!
Dama bɛ nini nya Yawɛ ni labisi Ziɔn
zali di zaashee shɛm.
9Jɛrusalɛm din lu dahim ŋɔ,
yilimi suhupiɛlli yila!
Dama Yawɛ tilig’ o tiŋa,
ka maag’ o niriba suhuri.
10Yawɛ ni chɛ ka
o yiko din be kasi la tum tuma.
O ni tilig’ o niriba,
ka dunia ŋɔ nim’ zaa nya.
11 #
2 Kɔr 6.17
Yinim’ bɛn ʒiri Yawɛ
jɛmbu duu lahi la,
miriya ka yi shihi
binshɛŋa din nyɛ daɣiri.
Malimiya yimaŋ’ be kasi.
Yimiya Babilɔn chaŋ.
12Dama dimbɔŋɔ dina
yi ti bi yɛn niŋ yomyom yi
n-chaŋ bee n-yi n-guui.
Yawɛ nti yɛn be yi tooni
mali ya chana.
Ka Izraɛl Naawuni nyɛ
ŋun yɛn be yi nyaaŋa polo
n-nyɛ yi gula.
Dabili ŋun diri wahala
13Nyama, n dabili ni tɔŋ.
Bɛ ni duh’ o,
ka ti o jilima pam.
14Niriba pam daa nya o
ka di gari ba pam.
O biɛhigu daa taɣimi,
ka o bi ŋmani ninsala.
15 #
Rom 15.21
Amaa o yɛla ni ti niŋ
niriba pam alahiziba
ka nanim’ ti kɔŋ bɛ
noya yaabu o zuɣu.
Dama bɛ nini ni ti nya bɛ
ni daa bi yɛli ba shɛli yɛla;
ka baŋ bɛ ni daa pun
bi wum shɛli yɛla.
Currently Selected:
Aizaia 52: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
