Aizaia 1
1
1 #
2 Nan 15.1-7; 15.32—16.20; 18.1—20.21; 2 Yɛl 26.1—32.33 Amɔz bia Aizaia ni daa nya ʒii shɛŋa zaŋ chaŋ Judanim’ mini Jɛrusalɛmnim’ polo shɛm m-bɔŋɔ: Uzia mini Jɔtam ni Ahaz ni Hɛzɛkia bɛn daa nyɛ Juda nanim’ la ʒiɛman’ ni n-daa bala.
Naawuni galim’ o niriba
2Zuɣusaa, wumma, tiŋgbani, wumma!
Yawɛ yɛliya:
“N ni wumsi bi’ shɛb’
zaɣisi ma.
3Niɣi mi bɛ lana,
ka bunsi mi bɛ lan’ ni dihiri ba luɣ’ shɛli.
Amaa Izraɛlnim’ bi mi lala,
n niriba maa bi baŋ.”
4Zuliya shɛb’ bɛn nyɛ alahichinim’ ŋɔ,
yi nyɛla tuumbiɛri taali ni ʒi shɛb’ zuɣu.
Yi nyɛla bi’ shɛb’
bɛn tumdi tuumbiɛri.
Yi nyɛla bɛn zaɣisi Yawɛ ŋun nyɛ Izraɛlnim’ Naawuni
ŋun be kasi ŋɔ,
ka lɛb’ yi nyaaŋa bir’ o!
5Bɔzuɣu ka yi kul zaɣisir’ o?
Yi bɔrila tibidarigibo din galisi?
Izraɛlnima, yi zuɣuri zaa malila dansi,
ka yi suhuri mini yi tɛha ka alaafee.
6Yi zuɣuri ni zaŋ ti siɣi yi naba ni
zaa ka alaafee.
Amaa dansi mini yuma
din kabiri ʒim m-beni;
di bi paɣi bee m-pɔbi,
kpam mi bi niŋ bɔbili li ka di maha.
7Buɣim di yi tinsi,
ka yi tiŋgbɔŋ nyɛ zaɣ’ nɛli.
Tinzunnim’ fa yi tiŋgbɔŋ n-saɣim li yi ninni,
ka di kpalimla zaɣ’ nɛli.
8Ka Ziɔn bipuɣiŋga ŋun be o ko la
bemi kaman tihi puu ni suɣili
bee puu ni sampaa la;
ka be kaman be ni teei gili tin’ shɛli.
9 #
Pil 19.24; Rom 9.29 Yawɛ ŋun nyɛ Tɔbbihi Naa ŋɔ yi di daa bi chɛ ka shɛb’ tiligi, ti tiŋ’ maa naan’ bemi kaman Sɔdom mini Gomɔra.
10Sɔdom nanima,
“Wummiya Yawɛ yɛligu!
Gomɔranima, wummiya
Naawuni ni wuhiri ya shɛli!”
11Yawɛ yɛliya,
“Yi sara maligu gbaliŋ la pa shɛli n sani.
Yi ni zaŋdi piɛla’ bihi shɛb’
mini biŋkɔb’ suma kpa’ shɛli yi ni zaŋdi nyɔri buɣim maani sara la,
n nyee nyɔni li.
N kɔre ka naɣilahi mini piɛla’ bihi ni buhi ʒim ni.
12Yi yi ka n tooni na ni yi ti jɛm ma,
ŋuni n-lee yɛli ya ni yi zaŋ biŋkɔbiri maa na?
Ŋuni n-lee puhi ya ni yi be
n jɛmbu duu n-nɔri ginda?
13Yi ni zaŋdi yi pin’ shɛŋa na maa ka buchi. Chɛliya li zaŋbuna.
Yi tulaale zim nyɛla zaɣ’ biɛɣu n sani.
Yi goli palli churi puhibu mini vuhim dabisa ni yi ni booni laɣiŋgu shɛŋa puuni,
n je alahichi ni be yi jɛmbu laɣiŋgu shɛŋa ni.
14 #
Amɔs 5.21-22
N suhu je yi goli pala churi
mini yi ni zali chu’ shɛŋa puhibu la.
Di leela ʒitibisili n sani,
di ʒibu wum ma pam.
15“Yi yi kpuɣi yi nuhi zuɣusaa n-suhi ma, hal yi yi suhi ma kabo,
n ku lihi yi polo na;
m mi ku wum yi suhigu maa.
Yi nuhi tim ʒim ni.
16Paɣimiya yi nuhi maa ka di yi.
Chɛliya yi ni tumdi tuumbiɛ’ shɛŋa ka n nini nyari maa tumbu.
Chɛliya tuumbiɛri maa tumbu.
17Bɔhimmiya zaɣ’ viɛlli tumbu.
Niŋmiya din tuhi,
ka sɔŋdi bɛn be nahiŋgu ni,
ka niŋdi kpibisi di ni simdi ni yi niŋ ba shɛm,
ka sɔŋmiya pakoya.”
18Yawɛ yɛliya,
“Pumpɔŋɔ, kamiyana ka ti tɔɣisi mali ti yɛla maa.
Hal yi daalahichi ni kul be kaman mulifu maa,
di ni paligi kaman sakuɣa la;
hal di ni kul be kaman zom maa,
di ni paligi kaman piɛ’ piɛlli kɔbiri la.
19Yi yi saɣi li, ka deei n noli,
yi ni di tiŋgbani ŋɔ bin’ suma anfaani.
20Amaa yi yi zaɣisi, ka niŋ tipawumli,
Yawɛ yɛliya,
‘Bɛ ni zaŋ takɔbi kun ya.’ ”
Alahichi ni be tin’ shɛl’ ni
21Tin’ shɛli din daa ʒe yim la
yipa ŋmanila pagɔrili!
Yɛlimaŋli mini wuntitali
n-daa yi be di ni,
amaa pumpɔŋɔ ninvuɣ’ kuriba m-be di ni.
22A daanzinfa saɣimya,
ka kom gari a wain ni.
23A zuɣulaannim’ nyɛla tipawumlinim’
mini tayiɣisi zɔnima.
Bɛ zaa yuri birapu dibu
ni faɣiri dibu.
Bɛ bi sɔŋdi kpibisi bɛ saria dibu ni,
ka bi saɣiri ka pakoya zaŋdi bɛ yɛlimuɣisira kani bɛ sanna.
24Dinzuɣu Yawɛ ŋun nyɛ ti Duuma, ka nyɛ Tɔbbihi Naa ni Izraɛlnim’ Kpiɔŋlan’ ŋɔ yɛliya:
“To, n ni yiɣisi n suhu bahi yinim’ bɛn nyɛ n dimnim’ ŋɔ zuɣu,
ka bɔhi ya biɛri.
25N ni ŋmaligi lu yi zuɣu;
n ni nyahi ya ka yi yi daɣiri ni
kaman bɛ ni zaŋdi buɣim maani anzinfa ka di yiri shɛm la.
26N ni labisi yi sariakaritiba zali kaman di ni daa nyɛ shɛm piligu ni,
ka labisi yi saawarimaaniba zali kaman di ni daa nyɛ shɛm piligu ni.
Di nyaaŋa ka bɛ ni lan boli tiŋ’ maa
wuntitali mini ʒiɛyimtali tiŋa.”
27Naawuni yɛlimaŋtali zuɣu, o ni tiligi Ziɔn;
o wuntitali zuɣu o ni tiligi ninvuɣ’ shɛb’ bɛn be di ni ka niŋ tuuba.
28Amaa duŋtaariba mini alahichinim’ zaa ni ti bahi yoli,
ka ninvuɣ’ shɛb’ bɛn zaɣisi Yawɛ mi ni ti kpi.
29Dama yi ni ti di vi
yi ni yuri buɣa oki ti’ shɛŋa la zuɣu,
ka yi suhuri ti saɣim
yi ni pii yi sambani pu’ shɛŋa ti yi wuna la zuɣu.
30Dama yi ni ti bemi kaman oki ti’ shɛli
din vari suui,
ka be kaman mahili ni ka pu’ shɛl’ ni.
31Ninvuɣ’ shɛb’ bɛn mali yaa ni ŋmanila gumdi,
ka bɛ tuma be kaman chɛbili la.
Buɣim ni di bɛ mini bɛ tuma zaa,
ka so ku kpihi li.
Currently Selected:
Aizaia 1: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
