Hozia 10
10
1Izraɛlnim’ daa ŋmanila
azichi wain ti’ shɛli din wali wala.
Bɛ zuliya ni kul galisiri shɛm,
lala ka bɛ gba kul mɛri maligu bimbina pahira.
Bɛ tiŋgbɔŋ dariza ni kul pahiri shɛm,
lala ka bɛ gba kul pahiri
bɛ ni jɛmdi binwɔɣil’ shɛŋa la gba dariza.
2Bɛ suhuri ni palila ʒiŋmabo.
Pumpɔŋɔ bɛ ni ʒi bɛ tuumbiɛri zambu.
Naawuni ni ŋme ŋ-ŋma bɛ maligu bimbina maa,
ka wurim bɛ binwɔɣila maa.
3Dama pumpɔŋɔ bɛ ni yɛli,
“Ti lan ka naa,
dama ti bi zɔri Yawɛ,
ka bɔ ka naa lee yɛn niŋ ti ti?”
4Bɛ tɔɣisiri yɛtɔɣ’ yoya,
ka lɔri alikauli,
ka pɔri pɔri din ka buchi,
dinzuɣu saria karibu tɔhi zanna
kaman mɔ’ shɛŋa din nyɛ bɔchaa
ni bili puu ni shɛm la.
5Samarianim’ suhuri zɔhirimi Bɛtavɛn naɣibil’ la zuɣu.
Di niriba ni ti kum naɣibil’ maa zuɣu.
Ka di tindaannim’ la ti kum di zuɣu pam.
Bɛ ni ti kum pam
di ni kɔŋ jilima shɛl’ la zuɣu.
6Yɛlimaŋli, bɛ ni ti zaŋ buɣili maa maŋmaŋ’ kuli Asiria
nti zaŋ li ti na’ titali,
ka di leei bɛ farigu yɔbu o sani.
Bɛ ni ti dihi Ifriimnim’ vi,
ka vi ti gbahi Izraɛlnim’ bɛ buɣili maa zuɣu.
7Samarianim’ naa ni ti bahi yoli
kaman tipɔɣu din pa kom zuɣu la.
8 #
Luk 23.30; Kah 6.16 Bɛ ni ti saɣim buɣ’ jɛmbo luɣ’ shɛŋa din be Avɛn,
ka nyɛ Izraɛlnim’ daalahichi la.
Ka gɔhi mini suligunyinyaɣu ti bili
di maligu bimbina maa zuɣu.
Ka bɛ ti yɛli zoya,
“Limsimiya ti.”
Ka yɛli daboya,
“Lumiya ti zuɣu na.”
Naawuni yɛli Izraɛlnim’ taali ni nyɛ shɛli
9 #
Zuɣ 19.1-30
Izraɛlnima, Gibia dal’ la ka yi daa tum alahichi.
Nimaani ka bɛ daa dii gbaai alahichi tumbu.
Dinzuɣu tɔbu ni lu bɛ zuɣu Gibia.
10N ni kana ti liri ninvuɣ’ shɛb’ bɛn nyɛ tipawumli nim’ ŋɔ n-fiɛb’ ba.
Ka n yi ti fiɛb’ ba bɛ ni tum tuumbiɛri buyi maa zuɣu,
zuliya shɛb’ ni laɣisi tab’ na ti liri ba.
11Ifriimnim’ daa ŋmanila bɛ ni wuhi naɣisa’ so
ka o bɔri ni bɛ zaŋ o bu chi,
ka n daa bi zaŋ binshɛli pa
o nyiŋgoli din viɛl’ la zuɣu.
Amaa pumpɔŋɔ n ni zaŋ dapua
n-ga Ifriimnim’ nyiŋgoya ni.
Judanim’ ni jari,
ka Yaakubu zuliya yɛbisi bɛmaŋmaŋ’ puu.
12 #
Jɛr 4.3
Birimiya wuntitali ti yimaŋa,
ka ti kpuɣi atam din nyɛ yurilim din ka ŋmali.
Komiya yi tiŋgbani din doya ka bi ko la,
dama saha paaya ni yi bo Yawɛ
ka o kana ti tiligi ya.
13Yi birila ninvuɣ’ biɛtali,
ka kpuɣi atam din bi doli yɛlimaŋli.
Yi dila ʒiri tiwala.
Yi ni niŋ yi chɛchɛbunsi
mini yi tɔbbihi bɛn galisi ŋɔ naani la zuɣu,
14tɔbu ni lu yi zuɣu,
ka yi birininim’ la zaa ti wurim.
Di ni ti bemi kaman Naa Shaliman ni daa ŋme Bɛtaribɛlnim’ tɔbu,
ka wurim li,
ka zaŋ bihi mini bɛ manim’ tɔri taba n-kuri ba shɛm la.
15Di ni ti niŋ yinim’ Izraɛlnim’ lala,
dama yi tuumbiɛri galisiya pam.
Zaŋ chaŋ biɛkaali,
bɛ ni ti ku Izraɛlnim’ naa.
Currently Selected:
Hozia 10: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
