2 Samuɛl 6
6
Bɛ zaŋ Naawuni Daalikauli Adaka chaŋ Jɛrusalɛm
(1 Yɛlikura 13.1-14; 15.25—16.6; 16.43)
1Ka Dauda daa lan laɣim Izraɛl tɔbutuhiri’ biinsi ninvuɣ’ tuhi’ pihita. 2#Yibu 25.22 Ka o mini ba zaa daa chaŋ Baalɛjuda ni bɛ ti zaŋ Naawuni Daalikauli Adaka la na. Bɛ daa zaŋla Yawɛ ŋun nyɛ Tɔbbihi Naa, ka o nam kuɣ’ tam chɛrubinim’ zuɣu la yuli boli Alikauli Adaka maa. 3#1 Sam 7.1-2 Ka bɛ daa zaŋ Naawuni Daalikauli Adaka maa Abinadab yiŋ’ din daa be zoli zuɣu la na nti tam naɣ’ tɔroko palli zuɣu; ka Yuza mini Ahio bɛn daa nyɛ Abinadab bidibisi la daa be tooni vɔri tɔroko palli maa; 4ka Naawuni Daalikauli Adaka maa daa tam di zuɣu; ka Ahio daa be Alikauli Adaka maa tooni. 5Ka Dauda mini Izraɛlnim’ zaa daa doli yiini yila ka ŋmɛri mɔɣilɔnim’ mini goonjɛnim’ ni chaɣisanima ni feensi ni dawulɛnim’ n-wari wahi ni bɛ yaa zaa ni suhupiɛlli Yawɛ tooni.
6Ka bɛ daa ti paai Nakɔn kabɔɣili ni, ka naɣila’ shɛb’ bɛn daa vɔri tɔroko maa tuui, di saha ka Yuza daa teeg’ o nuu gbaai Naawuni Daalikauli Adaka maa mali. 7Ka Yawɛ suhu daa yiɣisi bahi Yuza zuɣu, ka o ku o nimaani sɔŋ Alikauli Adaka maa luɣili ni o ni daa zaŋ o nuu gbaai Alikauli Adaka maa zuɣu. 8Ka Dauda daa je suli Yawɛ ni daa yiɣis’ o suhu bahi Yuza zuɣu shɛm maa zuɣu; ka bɛ daa boli nimaani yuli Pɛrɛzuza#6.8 PƐRƐZUZA: Hiburuli ni yuli ŋɔ gbinni nyɛla, “Yuza tibidarigibo.” hal ni zuŋɔ dabisili ŋɔ.
9Ka Yawɛ yɛla daa gbaai Dauda dabiɛm pam dindali maa ka o yɛli, “Ka wula ka n lee yɛn niŋ zaŋ Alikauli Adaka ŋɔ kuli n yiŋa?” 10Di zuɣu ka Dauda daa bi lan bɔri ni o zaŋ Yawɛ Daalikauli Adaka maa kuli ŋun’ Dauda tiŋ’ la ni, amaa ka daa zaŋ li ŋmaligi tahi la Obɛdɛdom ŋun daa nyɛ Gaat nir’ la yiŋa. 11#1 Yɛl 26.4-5 Ka Yawɛ Daalikauli Adaka maa daa kpalim be Obɛdɛdom Gaat nir’ maa yiŋ’ chira ata, ka Yawɛ daa niŋ alibarika niŋ Obɛdɛdom min’ o yiŋnim’ zaa ni.
12Ka bɛ daa yɛli Naa Dauda ni Yawɛ niŋla alibarika niŋ Obɛdɛdom min’ o malibu zaa ni, Naawuni Daalikauli Adaka maa zuɣu. Di saha ka Dauda daa chaŋ ti kpuɣi Naawuni Daalikauli Adaka maa Obɛdɛdom yiŋa n-zaŋ li kuli ŋun’ Dauda tiŋ’ la ni ni suhupiɛlli. 13Ka bɛn daa ʒiri Yawɛ Daalikauli Adaka maa daa yi kul chaŋ napɔŋ yaabu buyɔbu zuɣu, o chɛrimi ka bɛ zani ka o kɔrigi naɣilaa mini naɣilalantabili mali sara. 14Ka Dauda daa zaŋ tampiɛlli din ŋmani mukuru la lo o shee ni n-wa waa ni o yaa zaa Yawɛ tooni. 15Ka Dauda mini Izraɛlnim’ zaa daa zaŋ Yawɛ Daalikauli Adaka maa kuli ni vuri yɔbu mini bana piɛbbu.
16Bɛ ni daa ti zaŋ Yawɛ Daalikauli Adaka maa paai Dauda tiŋ’ maa ni, ka Sool bipuɣiŋga Mikal la daa lihi takɔro ni na n-nya ka Naa Dauda kul wari waa, ka yiɣiri jamdi Yawɛ tooni, ka o lihi ʒiɛm Dauda o suhu ni. 17Ka bɛ daa zaŋ Yawɛ Daalikauli Adaka maa na ti zali di zaashee Dauda ni daa pun chɛ ka bɛ ti suɣ’ shɛli zal’ li la puuni. Ka Dauda daa mali sara shɛli bɛ ni zaŋdi nyɔri buɣim la mini suhudoo sara maligu Yawɛ tooni. 18Dauda ni daa ti mali bɛ ni zaŋdi sara shɛli nyɔri buɣim la mini suhudoo sara maligu maa naai, ka o zaŋ Yawɛ ŋun nyɛ Tɔbbihi Naa ŋɔ yuli n-suhi alibarika niŋ niriba maa ni; 19ka daa zaŋ maha tari Izraɛl salo bɛn nyɛ dɔbba mini paɣiba maa zaa, ka sokam daa deei mahi’ yiniyini mini nim’ kpillikpilli ni bɛ ni zaŋ wain tihi wala m-pahi mali mahi’ shɛŋa zaɣ’ yiniyini pahi. Di nyaaŋa ka sokam daa wurim kuli bɛ yinsi.
20 #
1 Yɛl 16.43
Ka Dauda daa lab’ yiŋa ni o ti suhi alibarika niŋ o yiŋ’ nim’ ni. Amaa ka Sool bipuɣiŋga Mikal la daa yina ti tuhi Dauda soli yɛl’ o, “Izraɛl naa ti omaŋ’ jilima zuŋɔ dabisili ŋɔ, dama o pirigiya ka chɛ o zaɣim o kpamba dabipaɣiba tooni kaman jɛrigu ŋun bi zɔri vi ni pirigiri ka chɛr’ o zaɣim shɛm la.”
21Ka Dauda daa garigi yɛli Mikal, “Yawɛ ŋun daa pii ma ka duhi ma gar’ a ba min’ o yiŋnim’ zaa, ka zaŋ ma leei nabia ni n su Izraɛlnim’ bɛn nyɛ ŋun’ Yawɛ niriba ŋɔ tooni ka n di wari waa maa, ka di simdi ni m mali suhupiɛlli Yawɛ tooni. 22Hal n ni filim mmaŋa n-gari ŋ-ŋɔ gba, ka lihi ʒiɛm mmaŋa, amaa dabipaɣiba shɛb’ yɛla a ni yɛli ŋɔ bɛn’ ni ti ma jilima.”
23Ka Sool bipuɣiŋga Mikal maa daa bi dɔɣi bia hal ni o nyɛvili tariga.
Red Letter Dagbani Bible © Bible Society of Ghana, 2011