2 Samuɛl 5
5
Dauda leei Izraɛlnim’ mini Judanim’ zaa naa
(1 Yɛlikura 11.1-9; 14.1-7)
1Ka Izraɛl zuliya zaa daa laɣim ka Dauda sanna Hiburɔn ti yɛl’ o, “Nyama, ti nyɛla a niŋgbuŋ ni a ʒim. 2Sool ni daa su ti saha shɛl’ la, nyini n-daa gari tooni chaŋ ti tuhi fa Izraɛlnima, ka Yawɛ daa yɛl’ a, ‘Nyini n-nyɛ ŋun ni ti guli n niriba Izraɛlnim’ ŋɔ, ka ti nyɛ ŋun ni su Izraɛl.’ ” 3Ka Izraɛl kpamba zaa daa ka naa sanna Hiburɔn, ka Naa Dauda ti lo ba alikauli Yawɛ tooni Hiburɔn maa, ka bɛ daa booi kpam bahi Dauda zuɣu ni ka o leei Izraɛl naa. 4Dauda yuma daa nyɛla yuun’ pihita ka o naanyi di nam, o daa dila nam maa yuun’ pihinahi. 5#1 Nan 2.11; 1 Yɛl 3.4; 29.27 O daa di nam be Hiburɔn n-su Judanim’ la yuma ayopɔin ni chira ayɔbu. Ka o daa lan ʒini Jɛrusalɛm n-su Izraɛlnim’ mini Judanim’ zaa yuun’ pihitanaata.
6 #
Jɔsh 15.63; Zuɣ 1.21 Ka naa min’ o niriba daa lo tɔb’ chaŋ Jɛrusalɛm ni bɛ ti tuhi Jɛbusinim’ bɛn daa nyɛ tiŋ’ maa tiŋbihi ka yɛli Dauda, “A kul ku kpɛna, hal zoomba mini gbariti ni gu a soli kar’ a labisi.” Bɛ daa tɛhiya ni Dauda ku tooi kpe nimaani na. 7Di zaa yoli, ka Naa Dauda daa ti tuhi fa Ziɔn birini la, dina ka bɛ booni Naa Dauda tiŋ’ la.
8Dindali maa ka Dauda daa yɛli, “Ŋunkam bɔr’ ni o ku Jɛbusinim’ ŋɔ ŋun’ yim’ na nti doli ko’ bɔbili ŋɔ chaŋ ti ku zoomba mini gbariti ŋɔ, dama man’ Dauda suhu je bɛ yɛlli zaa.” Dinzuɣu ka bɛ daa yɛli ni zoomba mini gbariti ku tooi kpe Naawuni jɛmbu duu la. 9Ka Dauda daa be birini maa ni, ka daa bol’ li Dauda tiŋa. Ka Naa Dauda daa piligi me yiya Millo polo na ti gil’ li. 10Ka o yaa daa kul pahiri biɛɣukam, dama Yawɛ ŋun nyɛ Tɔbbihi Naawuni ŋɔ daa be o sani.
11Ka Hiram ŋun daa nyɛ Taai naa la daa tim tuumba ka bɛ ʒi sida tihi dari na ti ti Dauda, ka daa lan tim kapintanim’ mini tammɛriba na ni bɛ ti me Naa Dauda yili ti o. 12Di saha ka Dauda daa baŋ ni Yawɛ n-zaŋ o leei Izraɛlnim’ naa, ka duh’ o nam maa ŋun’ Naawuni niriba Izraɛlnim’ zuɣu.
13Dauda ni daa yi Hiburɔn na nyaaŋa o daa kpuɣi paɣiba Jɛrusalɛm pahi, ka bo mamanim’ pahi, ka bɛ daa dɔɣi bidibisi mini bipuɣinsi pah’ o. 14Bɛ ni daa dɔɣi bi’ shɛb’ Jɛrusalɛm ti o maa yuya m-bɔŋɔ: Shammua mini Shɔbab ni Neetan ni Sulemaana ni 15Ibihar ni Ɛlishua ni Nɛfɛg ni Jafia ni 16Ɛlishama ni Ɛliada ni Ɛlifɛlɛt.
Naa Dauda tuhi nyaŋ Filistianima
(1 Yɛlikura 14.8-17)
17Filistianim’ ni daa ti wum ni Dauda ka bɛ zaŋ leei Izraɛlnim’ naa, ka bɛ zaa daa yi n-gbaai Dauda shee bɔbu, amaa ka Dauda daa wum di yɛla ka chaŋ ti be birini la ni. 18Ka Filistianim’ maa daa kana ti do Rɛfaim vinvamli ni. 19Ka Dauda daa bɔhi Yawɛ, “N cham’ ti liri Filistianim’ maa? A ni zaŋ ba niŋ n nuu ni?”
Ka Yawɛ daa yɛli Dauda, “Cham’ ti liri ba, biɛhiŋ kani, n ni zaŋ ba niŋ a nuu ni.”
20Di saha ka Dauda daa yiɣisi chaŋ Baalipɛrazim#5.20 BAALIPƐRAZIM: Hiburuli ni yuli ŋɔ gbinni nyɛla, “Nasara dibu Duuma.” nti tuhi nyaŋ Filistianim’ maa nimaani ka yɛli, “Yawɛ kpe n dimnim’ maa sunsuuni kaman kokpɛɣu la.” Dinzuɣu ka bɛ daa boli nimaani yuli Baal Pɛrazim maa. 21Ka Filistianim’ maa daa zo ka chɛ bɛ buɣa bahi nimaani, ka Dauda min’ o niriba maa daa kahi di zaa chaŋ.
22Ka Filistianim’ maa daa ti lan laɣim ka Rɛfaim vinvamli maa ni na ti doya yaha. 23Ka Dauda daa lan bɔhi Yawɛ, ka o daa yɛl’ o, “Di yi kpe chaŋ ti liri ba, amaa gilim’ bɛ nyaaŋa chaŋ ti liri ba tulaale tihi la tooni polo. 24Ka a yi ti wum niriba naba vuri tulaale tihi maa zuɣu, nyin’ lirim’ ba, dama di saha maa man’ Yawɛ daŋla a tooni ni n ti tuhi Filistia tɔbbihi maa ti a maa.” 25Ka Dauda daa niŋ kaman Yawɛ ni zal’ o shɛm maa, ka daa ku Filistianim’ maa Gɛba hal ti paai Gɛza.
Red Letter Dagbani Bible © Bible Society of Ghana, 2011