2 Samuɛl 23
23
Naa Dauda yɛtɔɣ’ shɛŋa din bahindi nyaaŋa
1Dauda yɛtɔɣ’ shɛŋa din bahindi nyaaŋa m-bɔŋɔ: Jɛsi bia Dauda daanabitali yɛtɔɣa m-bɔŋɔ.
Bɛ ni duhi ninvuɣ’ so, Yaakubu Naawuni ni pii ninvuɣ’ so ka o ŋma yil’ nyaɣisa Izraɛl tiŋgbɔŋ ni la daanabitali yɛtɔɣa m-bɔŋɔ.
2Yawɛ Shia tɔɣisiri yɛtɔɣa n sani,
ka o yɛligu be n zilinli zuɣu.
3Izraɛlnim’ Naawuni tɔɣisi yɛtɔɣa.
Izraɛl tampiŋ la yɛli ma:
So yi doli yɛlimaŋli soli n-su o niriba,
ka su ba ni Naawuni zɔbo,
4o ŋmanila biɛkaali neesim bɛ sani,
ka be kaman sagbana ni yi kani
ka wuntaŋ’ puhi na asiba
ka o neesim be shɛm la;
ka be kaman saa ni yi mi
ka mɔri bili tiŋgban’ ni yina shɛm la.
5Yɛlimaŋli, pa lala
ka Naawuni yɛn niŋ n zuliya?
Dama o lo ma alikauli din ka bahigu;
o chɛ ka di zani dɛde
binshɛɣukam zaa ni,
ka lan ka taɣibu yaha.
Dama o ni chɛ ka n sɔŋsim
mini n suhu ni yu shɛli nya nasara.
6Amaa ninvuɣ’ shɛb’
bɛn baɣa ka Naawuni ni
ŋmanila gɔ’ shɛŋa bɛ ni zaŋ labi;
dama so ku tooi zaŋ o nuu kpuɣi ba.
7Amaa ninvuɣ’ so ŋun yɛn shihi ba,
ŋun zaŋmila kur’ bini mini
kpan’ dɔɣu n-niŋ lala,
ka buɣim di ba zaa nimaani.
Naa Dauda tɔbutuhiri’ biinsi
(1 Yɛlikura 11.10-41)
8Dauda ni daa mali tɔbutuhiri’ biinsi shɛb’ yuya m-bɔŋɔ: Jɔshɛbashɛbɛt Tachɛmɔn nira ŋun daa nyɛ wɔɣiri’ kɔba ata la naa, ŋun daa zaŋ o kpani lu niriba kɔbisinii zuɣu n-ku bɛ zaa tɔb’ tuhibu yim puuni la.
9Ka ŋun daa pa o zuɣu wɔɣiri’ kɔba ata maa ni n-daa nyɛ Ɛliɛza, o daa nyɛla Dɔdo bia, ka Dɔdo mi nyɛ Aho bia. Ŋuna n-daa be Dauda sani saha shɛli bɛ ni daa filim Filistianim’ bɛn lo tɔbu n-laɣim nimaani na, ka Izraɛlnim’ nya ba ka tiri gbin’ la. 10Ŋuna n-daa yiɣisi lu Filistianim’ maa zuɣu n-ku ba hal ka o nuu ti ja ka o kɔŋ o takɔbi o nuu ni yihibu. Ka Yawɛ daa chɛ ka bɛ di nasara pam dindali maa. Ka niriba maa daa labina ti dol’ o nyaaŋa yihir’ o ni daa ku shɛb’ maa bidibbina.
11Ka ŋun daa pa o mi zuɣu nyɛ Shamma Agee ŋun daa nyɛ Hara nir’ la bia. Filistianim’ daa ti laɣim tab’ lo tɔb’ Lɛhi luɣ’ shɛli tuya balibu pam ni daa be la, ka Izraɛlnim’ daa ŋmaligi guui ka chɛ Filistianim’ maa. 12Amaa ka ŋun’ daa bari zani puu maa sunsuuni n-zabi di zuɣu, ka daa ku Filistianim’ maa, ka Yawɛ daa chɛ ka bɛ di nasara pam.
13Ka puu atam kpuɣibu saha daa ti miri, ka wɔɣiri’ kɔba pihita la ni niriba ata daa chaŋ Dauda sani Adulam vo’ kabili ni. Ka Filistianim’ daa lo tɔb’ na ti do Rɛfaim vinvamli ni. 14Di saha Naa Dauda daa bela zoli zuɣu birini puuni, ka Filistia tɔbbihi mi do Bɛtilihɛm. 15Ka Dauda suhu daa ti lu yiŋ’ ni ka o yɛli, “N di bi zaɣisi ka so chaŋ Bɛtilihɛm ti tooi kɔbil’ shɛli din do” di dunol’ shee la ni kom na ti ti ma ka n nyu!” 16Di saha ka wɔɣiri’ kɔba ata maa daa vaai yiɣisi tim Filistia tɔbbihi maa sunsuuni gari chaŋ Bɛtilihɛm kɔbil’ shɛli din daa do di dunol’ shee maa nti tooi di kom na ti ti Dauda. Amaa ka o zaɣisi li nyubu, ka kpaai li bahi tiŋ’ ti Naawuni, 17ka yɛli, “Yawɛ, din’ kariya ni n niŋ lala. N ni tooi nyu ninvuɣ’ shɛb’ bɛn zaŋ bɛ nyɛviya pa talima chaŋ ŋɔ ʒim?” Dinzuɣu ka o daa bi nyu kom maa.
Wɔɣiri’ kɔba ata maa ni daa tum tuun’ shɛŋa m-bala.
18Ka Abishai Zɛruya bia ŋun daa nyɛ Jɔab mabia la daa nyɛla ŋun su tɔbbihi pihita fukumsi, ŋuna n-daa zaŋ kpani lu ninvuɣ’ kɔbisita zuɣu n-ku ba ka zali yuli pahi wɔɣiri’ kɔba ata maa zuɣu. 19Ŋuna n-daa tum tuma ka o yuli du n-gari ninvuɣ’ pihita maa zaa ka o leei bɛ zuɣulana la, amaa o yuli daa lee bi du m-paai wɔɣiri’ kɔba ata maa yuya.
20Ka Bɛnaaya ŋun daa nyɛ Jɛhɔiada bia ka nyɛ Kabiziil nir’ la gba daa nyɛla suhukpeendan’ ŋun tum tuun’ kara. Ŋuna n-daa ku Mɔabnim’ wɔɣiri’ kɔba ayi, ka daa ti lan siɣi bɔɣili ni ti ku gbuɣinli paɣili ni daa kpe dahin shɛl’ la. 21O daa ti lan ku Ijipti do’ viɛl’ so gba. Ijipti doo maa daa gbibila kpani o nuu ni, amaa ka Bɛnaaya daa zaŋ jaaŋgbee chaŋ ti lir’ o n-fa kpani maa o nuu ni n-zaŋ omaŋmaŋ’ kpani maa ŋmaligi ku o. 22Bɛnaaya Jɛhɔiada bia maa mi ni daa tum tuun’ shɛŋa m-bala, ka o gba yuli daa du m-pahi wɔɣiri’ kɔba ata maa zuɣu. 23O yuli daa duya pam ninvuɣ’ pihita maa ni, amaa di daa bi du m-paai wɔɣiri’ kɔba ata maa yuya. Ka Dauda daa zaŋ o leei o tɔbbihi bɛn gul’ o zuɣulana. 24Ninvuɣ’ pihita maa yuya m-bɔŋɔ:
Asahɛl ŋun daa nyɛ Jɔab mabia la mini Ɛlhanan ŋun ba daa nyɛ Dɔdo Bɛtilihɛm nir’ la 25ni Shamma mini Ɛlika bɛn daa yi Harɔd na la 26ni Hɛlɛz ŋun daa nyɛ Paliti nir’ la ni Ira Ikɛsh ŋun daa nyɛ Tɛkɔa nir’ la bia 27ni Abiɛza ŋun daa nyɛ Anatɔt nir’ la ni Mɛbunai ŋun daa nyɛ Husha nir’ la 28ni Zalimɔn ŋun daa nyɛ Aho nir’ la ni Maharai ŋun daa nyɛ Nɛtɔfa nir’ la 29ni Hɛlɛb ŋun daa nyɛ Baana Nɛtɔfa nir’ la bia ni Itai ŋun ba daa nyɛ Ribai ŋun daa nyɛ Gibia din daa be Bɛnjamin tiŋgban’ ni nir’ la 30ni Bɛnaaya ŋun daa nyɛ Piratɔn nir’ la ni Hiddai ŋun daa yi Gaash kulibɔŋ duli na la 31ni Abialibɔn ŋun daa nyɛ Araba nir’ la ni Azimavɛt ŋun daa nyɛ Bahurim nir’ la 32ni Ɛliaba ŋun daa nyɛ Shaalibɔn nir’ la ni Jashɛn bihi ni Jɔnatan 33ŋun nyɛ Shamma ŋun daa nyɛ Harar nir’ la bia ni Ahiam ŋun daa nyɛ Sharar Harar nir’ la bia 34ni Ɛlifɛlɛt ŋun daa nyɛ Ahasibai Maaka nir’ la bia ni Iliam ŋun daa nyɛ Ahitɔfɛl Gilo nir’ la bia 35ni Hɛziro ŋun daa nyɛ Kamɛl nir’ la ni Paarai ŋun daa nyɛ Aribi nir’ la 36ni Igal ŋun daa nyɛ Neetan Zɔba nir’ la bia ni Bɛni ŋun daa nyɛ Gaad nir’ la 37ni Zɛlɛk ŋun daa nyɛ Ammɔn nir’ la ni Naharai ŋun daa nyɛ Bɛrɔt nira ka daa nyɛ ŋun ʒiri Zɛruya bia Jɔab tɔbutuhiri’ nɛma la 38ni Ira ni Garɛb bɛn daa nyɛ Jatir niriba la 39ni Yuria ŋun daa nyɛ Hiti nir’ la. Bɛ zaa kalinli daa yiɣisila ninvuɣ’ pihitanaayopɔin.
Red Letter Dagbani Bible © Bible Society of Ghana, 2011