2 Samuɛl 22
22
Naa Dauda nasara dibu yilli
(Yila 18)
1Ka Dauda daa zaŋ yɛtɔɣa ŋɔ n-yili yilli paɣi Yawɛ dahin’ shɛli Yawɛ ni daa fa o o dimnim’ zaa nuu ni bahi, ka lan fa o Sool gba nuu ni bahi la nyaaŋa.
2O daa yɛliya, “Yawɛ n-nyɛ n tampiŋ ni m birini ni ŋun fari ma bahira.
3N Naawuni, n tampiŋ,
n ni sɔɣiri so sani.
N nyɔtaɣirigu mini
kpiɔŋlana ŋun tiligi ma.
M birini mini n sɔɣisili shee,
nyini n-nyɛ n tiligira
ŋun tiligiri ma barina ni.
4N daa kuhi boli Yawɛ ŋun simdi paɣibu ŋɔ, ka tiligi n dimnim’ nuu ni.
5Kum kɔgbana daa gili ma niŋ sunsuuni,
ka bahi yoli kɔgbana liri ma.
6Kpiimba biɛhigu shee mihi
daa vili ma gbibi,
ka kum zana daa do n tooni.
7N daa kuhi boli Yawɛ n nandahima puuni.
N Naawuni ka n daa boli maa.
Ka o daa be o jɛmbu duu puuni
ka wum n kukoli;
ka n kuhigu maa daa lu o tiba ni.
8Di saha ka tiŋgbani daa sɔhigi ka dam;
ka zuɣusaa tanzahi daa sɔhigi
ka dam o suhuyiɣisili zuɣu.
9Ka nyɔhi daa yir’ o nyɛvoya ni na,
ka buɣimniɛm din diri binyɛra
yir’ o nol’ ni na;
ka sala buɣimniɛm yir’ o sanna.
10O daa chɛ ka sagbana bɔɣi
ka o siɣina;
ka zibisim titali be o naba tiŋli.
11O daa ba chɛrubi yiɣi;
ka bɛ daa nya o
ka o bela pɔhim ni chana.
12O daa zaŋ zibisim din gil’ o leeg’ o sampaa,
ka sagban’ tibisa leeg’ o kom dooshee.
13Ka sala buɣimniɛm yiri
neesim shɛli din be o sani maa ni na.
14Yawɛ daa be alizanda ni
ka tahi bahina,
ka bɛ daa wum Zallakudura Naa kukoli.
15Ka o daa to piɛma n-wurim ba bahi;
ka chɛ ka saa nyaɣisi niŋ ba
ka bɛ ŋmaligi guui.
16Ka niriba nya teeku puuni kɔsoya,
ka dunia ni tam tanza’ shɛŋa zuɣu yi zahira
Yawɛ tahigu mini pɔhim shɛli
din yiri o nyɛvoya ni na vuri zuɣu.
17Ka o daa teeg’ o nuu zuɣusaa ha
n-tirina gbaai ma
n-vooi ma yihi kom pam puuni na.
18O daa fa ma n dim’
ŋun nyɛ yaalan’ nuu ni bahi,
ka tiligi ma bɛn je ma nuu ni,
dama bɛ daa gari ma yaa.
19Nandahima ni daa mali ma dahin’ shɛli,
ka bɛ daa kana ti liri ma;
amaa ka Yawɛ daa nyɛ ŋun guli ma.
20O daa zaŋ ma zali pal’ tital’ ni.
O daa tiligi ma,
dama o nini daa tiɣi ma.
21Yawɛ daa ti ma laara
n wuntitali zuɣu;
o yo ma samli n ni ka galimi zuɣu.
22Dama n daa doli Yawɛ zaligunima,
ka daa bi tum ninvuɣ’ biɛtali tuma
ŋ-ŋmaligi ka chɛ ŋuna
ŋun nyɛ n Naawuni maa.
23N daa kul dolila
o zaligu shɛŋa din pahi zaa,
ka bi birig’ o zaligunim’ maa shɛli.
24N daa ka galimi o sani,
dama n daa bi tum taal’ shɛli.
25Dinzuɣu ka Yawɛ ti ma laara
n wuntitali mini m biɛrisuntali zaŋ chaŋ o sani zuɣu.
26Ninvuɣ’ shɛb’ bɛn ʒe a yim,
a gba ʒe ba la yim;
ka ninvuɣ’ so ŋun ka galimi,
a wuhir’ o a gba ni ka galimi shɛm.
27Ninvuɣ’ shɛb’ bɛn be kasi,
a wuhiri ba ni a gba bela kasi,
ka ninvuɣ’ shɛb’ bɛn mi
nyɛ ninvuɣ’ biɛri,
a wuhiri ba a ninkuunsi ni nyɛ shɛm.
28A tiligiri tarimba,
ka pa nina lihiri karimbaannima
ni a filim ba.
29Yɛlimaŋli, Yawɛ, nyini n-nyɛ n firila,
Yawɛ tiri ma neesim n zibisim ni.
30Yɛlimaŋli, a zuɣu n ni tooi
nyaŋ ninvuɣ’ gbaliŋ.
N Naawuni zuɣu, n ni tooi
kpahi yaɣi gooni.
31Naawuni ŋɔ soli nyɛla din be tibi.
Yawɛ daalikauli niŋdi pali.
O nyɛla nyɔtaɣirigu n-taɣiri
ninvuɣ’ shɛb’ bɛn zaa zɔr’ kpɛr’ o yuli.
32Dama ŋuni n-lee lan nyɛ Naawuni
ka pa ni nyini Yawɛ?
Ka ŋuni n-lee lan nyɛ tampiŋ
ka pa ni ti Naawuni ŋɔ?
33Naawuni ŋɔ n-nyɛ
n sɔɣibu shee din mali kpiɔŋ;
ka chɛ ka barina shɛli ka n soli zuɣu.
34 #
Yila 18.33; Hab 3.19 O chɛ ka n naba ŋmanila
naba anahilan’ nyaaŋa naba,
ka chɛ ka m be zoya zuɣu chana
ka barina shɛli kani.
35O wuhi n nuhi tɔbu tuhibu;
ka di chɛ ka n ni tooi zaŋ
n nuhi dahim daanya tɔbu.
36Nyini n-ti ma a tiliginsim nyɔtaɣirigu;
ka a sɔŋsim chɛ ka n lee wɔɣirili.
37Nyini n-daa ti ma pal’ yɛlinli
ka n yaari n naba chana,
ka n naba daa bi sarigi.
38N daa kari doli n dimnima nti ku ba,
ka n daa bi ŋmaligi labi n nyaaŋa
hal ka ti naai bɛ balibu zaa.
39N daa to ba la kpani ka di pili yi,
ka bɛ lu n naba ni ka kɔŋ yiɣisibu,
ka n ku bɛ zaa.
40Dama nyini n-daa ti ma kpiɔŋ
ni n tuhi tɔbu.
Nyini n-daa chɛ ka n no n dimnim’ firi tiŋa.
41Nyini n-daa chɛ ka
n dimnim’ ŋmaligi guui ka chɛ ma,
ka chɛ ka n ku bɛn je ma la.
42Bɛ daa lihiya,
amaa ka so daa kani ŋun ni tiligi ba.
Bɛ daa fabili niŋ Yawɛ,
amaa ka o daa bi garigi ba.
43N daa bu n-nuɣisi ba
kaman taŋkpa’ zim la.
N daa burisi ba ka no n-taai ba
kaman soli zuɣu batibati la.
44Nyini n-daa fa ma m mini
ninvuɣ’ shɛb’ bɛn zabiri nuu ni bahi.
Nyini n-zaŋ ma leei zuliya bɔbili zuɣulana;
ka n ni daa bi mi ninvuɣ’ shɛb’ zaa jɛmdi ma mi.
45Tinzunnim’ kanna ti damdiri ma la tiŋa.
Bɛ yi kul wum ka n yɛli shɛlikam,
bɛ deerila n noli.
46Dabiɛm gbahi tinzunnima,
ka bɛ yiri bɛ ni me birini gili
bɛ tiŋ’ shɛŋa ni
n-kani n sanna, ka bɛ ni sɔhira.
47Yawɛ nyɛla ŋun be,
ŋun nyɛ n tampiŋ ŋɔ mali alibarika,
Tibigimiya n Naawuni
ŋun nyɛ n tiliginsim tampiŋ ŋɔ.
48Naawuni n-nyɛ ŋun daa bɔhi biɛri ti ma,
ka zaŋ niriba ti ma ni n su ba.
49Nyini n-nyɛ ŋun daa yihi ma
n dimnim’ nuu ni.
Nyini n-daa duhi ma gari n dimnima.
Nyini n-daa fa ma ninvuɣ’ shɛb’ bɛn taai duŋ nuu ni bahi.
50 #
Rom 15.9
Yawɛ, n ni paɣ’ a dimbɔŋɔ zuɣu
zuliya bɔbili sunsuuni;
ka yili yila paɣ’ a yuli.
51O ti o naa nasara pam,
ka wuh’ o yurilim ni galisi shɛm
zaŋ chaŋ o ninvuɣ’ gahindili Dauda min’ o zuliya sani hal ni saha din ka bahigu.”
Red Letter Dagbani Bible © Bible Society of Ghana, 2011