2 Samuɛl 12
12
Neetan zilinkom mini Naa Dauda tuuba niŋbu yɛla
1Ka Yawɛ daa tim Neetan Dauda sani, ka o daa chaŋ ti yɛl’ o, “Niriba ayi n-daa be tin’ shɛli, yino daa nyɛla bundana, ka ŋun’ la mi nyɛ faralana. 2Bundan’ maa daa mali piɛri mini niɣi pam, 3amaa faralan’ maa ŋun’ daa ka shɛli n-naɣ’ pahila piɛsabil’ kɔŋko. O daa dala piɛsaa maa n-wubis’ o ka o zoog’ o min’ o bihi sani; o ni daa diri shɛli, dina ka piɛsaa maa gba daa dira, o kɔnyuri ŋman’ ni ka piɛsaa maa daa nyuri kom, ka o daa zaŋdi piɛsaa maa sɔŋd’ o tooni. O mini piɛsabil’ maa biɛhigu daa ŋmanila omaŋmaŋ’ ni dɔɣi bipuɣimbil’ so. 4Ka sana daa ti paai bundana maa, ka o je ni o piig’ o piɛri maa ni bee o niɣi maa yino n-niŋ o saani, amaa ka daa chaŋ ti gbaala faralan’ maa piɛsaa la na nti niŋ o san’ maa saani.”
5Di saha ka Dauda suhu daa yiɣisi pam bahi ninvuɣ’ so ŋun niŋ lala maa zuɣu, ka o yɛli Neetan, “Hal ka Yawɛ ŋun be ŋɔ zuɣu, ninvuɣ’ so ŋun niŋ lala maa simdila kubu. 6Ka di simdi ka o yo faralan’ maa piɛr’ anahi, o ni tum shɛm maa min’ o ni bi zɔri nambɔɣu la zuɣu.”
7Ka Neetan daa yɛli Dauda, “Nyini n-nyɛ lala nir’ maa. Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ: ‘Mani n-daa piig’ a leei Izraɛlnim’ naa, ka daa fa a Sool nuu ni bahi, 8ka daa zaŋ a dan’ maa yili ti a, ka zaŋ o paɣiba ti a, ka zaŋ Izraɛl mini Juda ti a pahi. Ka dimbɔŋɔ yi di pɔra, n naan ti a din gari lala pahi. 9Ka bɔ n-niŋ ka a lihi ʒiɛm man’ Yawɛ yɛligu ka tum zaɣ’ biɛɣu ŋɔ man’ Yawɛ ninni? Nyini n-ku Yuria ŋun nyɛ Hiti nir’ la. Nyini n-daa chɛ ka Ammɔnnim’ zaŋ takɔbi ku o, ka a kpuɣ’ o paɣa n-leeg’ a paɣa. 10Dinzuɣu pumpɔŋɔ a ni lihi ʒiɛm ma ka kpuɣi Yuria ŋun nyɛ Hiti nir’ la paɣa maa zuɣu, ninvuɣ’ kubo kul ku milig’ a yili ŋɔ.’ 11Yawɛ yɛliya, ‘Nyama, n ni chɛ ka zaɣ’ biɛɣu yi a yiŋ’ dundɔŋ ni na n-lu a zuɣu; ka n ti zaŋ a paɣiba ti a ʒiʒiinikpee ka o zaŋ ba dɔni palo ni wuntaŋ’ ni a ninni. 12#2 Sam 16.22 Dama nyin’ daa niŋ li la ashilɔni, amaa man’ yɛn niŋ li la palɔni wuntaŋ’ ni Izraɛlnim’ zaa ninni.’ ”
13Ka Dauda daa yɛli Neetan, “N tum alahichi Yawɛ sani.”
Ka Neetan garigi yɛl’ o, “Yawɛ chɛ a taali maa, a ku lan kpi. 14Amaa di zaa yoli, a ni bi lihi nya Yawɛ ka tum tuun’ shɛli ŋɔ zuɣu, paɣ’ maa ni yɛn dɔɣi bi’ so ti a maa ni kpi.” 15Di nyaaŋa ka Neetan daa yiɣisi kul’ o yiŋa.
Naa Dauda bidibiga kpiya
Ka Yawɛ daa chɛ ka dɔro gbaai Yuria paɣ’ ni dɔɣi bidib’ so ti Dauda maa. 16Ka Dauda daa lo noli, ka kpe duu nti teei dɔni tiŋgban’ ni suhiri Naawuni bia maa zuɣu din dali maa yuŋ zaa. 17Ka kpambaliba bɛn daa be o yiŋa kana ti zan’ o sani ni bɛ kpuɣ’ o yiɣisi, amaa ka o bi saɣi bee n-chɛ ka o mini ba laɣim ʒini di bindirigu. 18Di daba ayopɔin dali ka bia maa daa kpi. Ka kpambaliba maa daa zɔri ni bɛ garigi Dauda o bia maa kuli; dama bɛ daa yɛlimi, “Nyama, bia ŋɔ daa na nɛmi ka ti tɔɣis’ o yɛtɔɣa ka o zaɣisi wumbu la, ka wula ka ti lee yɛn tooi yɛl’ o ni bia maa kpiya? Di pa shɛli ka o ti tum omaŋ’ barina.”
19Amaa Dauda ni daa nya ka o kpambaliba maa sɔɣiri yɛri tab’ maa ka o baŋ ni bia maa kpiya; ka bɔh’ o kpamba maa, “Bia maa kpiya?”
Ka bɛ yɛl’ o, “O kpiya.” 20Di saha ka Dauda daa yiɣisi tiŋgban’ ni n-chaŋ ti su kom ka ʒe kpam, ka taɣi binyɛra ye n-chaŋ ti kpe Yawɛ jɛmbu duu jɛm o. Di nyaaŋa ka o daa yi n-kuli yiŋa nti bɔhi bindirigu yɛla, ka bɛ daa zaŋ bindirigu na ti ti o ka o di. 21Di saha ka o kpamba maa daa bɔh’ o, “Wula ka a lee niŋ shɛm maa? Bia maa ni daa na ne, a daa lola noli ka kum o zuɣu pam, amaa ka o ti lee kpi ka a yiɣisi di bindirigu?”
22Ka Dauda daa garigi yɛli ba, “O ni daa na ne ka n lo noli ka kumd’ o zuɣu maa, n daa yɛlimi, ‘Di pa shɛli Yawɛ ni zo ma nambɔɣu ka chɛ ka o ku kpi. 23Amaa pumpɔŋɔ o kpiya, ka bɔ zuɣu ka n lee lan yɛn lo noli yaha? N ni tooi lan chɛ ka o labina? Mani n-naɣi ni ti chaŋ o sani, amaa ŋun’ ku lan labi n sanna.’ ”
Bɛ dɔɣi Sulemaana
24Di nyaaŋa ka Dauda daa maag’ o paɣa Batishiiba suhu, ka o min’ o daa lan dɔni ka o dɔɣi bidibiga, ka o bol’ o yuli Sulemaana. Ka Yawɛ daa yur’ o pam, 25ka daa zaŋ o zilinli ti anab’ Neetan ka o kana m-mi ti boli bia maa yuli Jɛdidia;#12.25 JƐDIDIA: Hiburuli ni yuli ŋɔ gbinni nyɛla, “Yawɛ ni yuri so” bee “ Yawɛ yur’ a.” di gbinni nyɛla Yawɛ ni yuri so.
Naa Dauda tuhi deei Raba
(1 Yɛlikura 20.1-3)
26Di saha maa Jɔab daa na kul tuhirila Ammɔnnim’ bɛ tin’ zuɣu din nyɛ Raba la ni. 27Ka o daa ti tim ti yɛli Dauda, “N tuhi nyaŋ Rabanim’ maa hal ka fa bɛ tin’ shɛli din mali kom la gba. 28Dinzuɣu pumpɔŋɔ laɣimmi ninvuɣ’ shɛb’ bɛn kpalim la na nti tuhi deei tiŋ’ maa amaŋmaŋa, di yi pa lala n yi tuhi deei tiŋ’ maa, bɛ ni zaŋ n yuli bol’ li.” 29Di saha ka Dauda daa laɣim niriba maa zaa chaŋ Raba ti tuhi deei li. 30Ka Dauda daa piligi bɛ naa salima zuɣupiligu o zuɣu ni, ka di tibisim nyɛ kilɔgiram pihitanaanu, ka kuɣ’ viɛlli daa be di ni, ka bɛ daa zaŋ li pili Dauda zuɣu ni, ka o daa va bɛ ni tuhi di neen’ shɛŋa tiŋ’ maa ni pam. 31Ka o daa chɛ ka tiŋ’ maa niriba zaŋ suhi din mali nyina mini kuriti kuya ni kuriti lɛri n-tumd’ o tuma, ka ŋmar’ o bilichiisi; lala ka o daa niŋ Ammɔnnim’ tinsi maa zaa. Di nyaaŋa ka Dauda min’ o niriba maa zaa daa lab’ Jɛrusalɛm.
Red Letter Dagbani Bible © Bible Society of Ghana, 2011