JUAN 1
1
I. DIOSAN YUQAPAN AKAPACHAR JUTATAPA. UÑSTATAPA, JAYSATAPA
(1—12)
Qallta
1Arux#1.1 Jesucristow Aruxa qalltan utjapunïnwa, khä Arusti Diosampïnwa, uka Arusti Diosarakïnwa. 2Jupax qalltan Diosampïnwa. 3Jupa tuqiw Diosax taqi kun luräna; jan jupampisti janiw kuna luratas utjkiti.#1.3 Col 1.15-17; Heb 1.2. 4Jakañax jupan utjäna, uka jakañasti jaqin qhanapänwa. 5Aka qhanasti ch'amakanak taypin qhanti, ch'amakanakasti janiw qhanarux jiwt'ayañatak ch'amanïkänti.
6Mä chachaw utjäna, Juan sutini, jupasti Diosan khithanitänwa,#1.6 Mt 3.1-12; Mc 1.1-8; Lc 3.1-9,15-17. 7jupax uka qhanat parliriw jutäna, kuntix jupax parlkäna uka tuqi taqinin iyawsañapataki. 8Juanax janiw qhanäkänti; jan ukasti uka qhanat arsuñapatak khithanitakïnwa. 9Taqi jaqinakar qhant'ki uka chiqpach qhanax akapacharuw purisinkäna.
10Uka Arux akapachankänwa; Diosasti jupa tuqi akapach lurkäna ukasa, akapachankirinakax juparux janiw uñt'känti. 11Jupasti jupankirinakan ukaruw jutäna, jupankirinakasti janiw katuqapkänti. 12Ukampis jupar katuqasin iyawsirinakax#1.12 Jesusar iyawsirinaka: Juan apostolux Jesusar iyawsañax askïtap uñacht'ayi. Jesucristor iyawsasax mä jaqix amuyupampi, chuymapampiw jupar katuqi. Iyawsi ukapachasti wiñay jakañ katuqaraki (Jn 3.14-16; 6.40; 11.25-26; 20.31). Diosan wawanakapäxiwa. 13Jupanakasti janiw jaqin munañapat janchin yuritäpkiti, jan ukasti Diosan wawanakapäxiwa.
14Arusti jaqiruw tuküna, ukatsti jiwasanak taypin jakarakïna. Jiwasanakasti jach'a qhapaq kankañap#1.14 Qhapaq kankañapa: ukampix Diosan markapar qhispiyañatak jank'ak wakicht'atap uñacht'ayi (1 R 8.10-11; Is 6.3; 58.8; 60.1; Jn 2.11; 17.5). uñjapxtan, uka jach'a qhapaq kankañsti, Awkin mä sapa Yuqapätap laykuw katuqäna, munasiñampi askimpi phuqhantata. 15Juanasti jupat parläna akham sasa: “Jupatpï nayax arsupxäyäsmaxa: Nayan qhipaxat jutki ukax, nayat sipan juk'amp jilïriwa, jupasti nayax janïr utjkäyät ukkhatpach utjapunïnwa” sasa.
16Taqiniw jupan jilarkir churäwinakap katuqapxtan; askita, askiru, 17kamachix Moisés tuqiw churasïna, ukampis munasiñampi, chiqa kankañampix Jesucristo tuqiw juti. 18Janipuniw Diosarux khitis uñjkiti;#1.18 Ex 33.18-20. ukampis Awkimpi chika jakasir Diosan Yuqapakiw jupar uñt'ayistu.#1.18 Mt 11.27; Lc 10.22; 1 Jn 1.2.
1. Jesusax luräwip tuqi, arup tuqiw qhansti: iyawsäwi tuqi jaysatapa
(1.19—3.36)
Bautisir Juanax Jesucristot qhanañchi
(Mt 3.11-12; Mc 1.7-8; Lc 3.15-17)
19Jerusalenankir judionakax Juanan ukaruw sacerdotenakampiru levitanakampir khithapxäna, khitïpachasa jupax uk jiskt'ayiri. 20Jupasti qhanpach arsusïna:
—Janiw nayax Cristökti —sasa.
21Jupanakasti wasitat jiskt'apxäna:
—Ukhamasti ¿khitirakïtasti? ¿Elías profetätati? —sasa.
Juanasti sarakïnwa:
—Janiw ukäkti —sasa.
Mayampsa jiskt'asipkakïnwa:
—Ukhamasti ¿jutañapäki uka profetätati? —sasa.
Juanasti sänwa:
—Janiw ukäktsa —sasa.
22Jupanakasti sasipkakïnwa:
—Ukhamasti, ¿khitirakïtasti? Khithanipkitu ukanakar yatiyapxañaxawa. Sapxitaya, ¿khitirakïtasti? —sasa.
23Juanasti jupanakarux sänwa:
—Nayax wasaran arnaqasir jaqïtwa: “Tatitun thakhip chiqaptayapxam” sasa, kunjämtix Isaías profetax arskän ukhamarjama.#1.23 Is 40.3; Mt 3.3.
24Juanar jiskt'irinakax fariseonakan khithatänwa, 25Juanarusti jiskt'apxänwa:
—Ukhamasti jan Cristöksta, jan Eliasäksta, janirak profetäksta ukax, ¿kunatarak bautistasti? —sasa.
26Juanasti jupanakarux sänwa:
—Nayax umampiw bautista, ukampis jumanak taypin mayniw utji, juparusti janiw uñt'apktati. 27Jupasti nayan qhipaxat juti. Nayax janiw askïkti wiskhu t'isnup jararañatakisa —sasa.
28Taqi akanakasti Betania sat chiqan ukham lurasïna, Jordán jawir khurkatana, kawkhantix Juanax bautiskän ukawjana.
Jesusax Diosan Corderopawa
29Qhipürusti Juanax Jesusaruw uñjäna, jupar jak'achasisinkiri, ukat säna: “¡Uñtapxam, jupaw akapachan juchap q'umachir Diosan Corderopaxa!
30Jupatpï nayax arsupxäyäsmaxa: ‘Nayan qhipaxat jutki ukaxa, nayat sipan juk'amp jilïriwa, jupasti nayax janïr utjkäyät ukkhatpach utjapunïnwa’ sasa. 31Janiw nayax jupar uñt'käyätti; ukampis Israel markan jupar uñt'añapatakiw jutta, ukat umampi bautisarakta” sasa.
32Ukxarusti Juanax saskakïnwa: “Nayax Qullan Ajayuruw alaxpachat mä palomar uñtat saraqanir uñjta, uka Qullan Ajayusti jupxaruw sayt'arakïna. 33Nayax janïraw khitïtapsa yatkäyätti; ukampis umampi Bautisir khithankitu uka Diosaw akham situ: ‘Khitxarutix Qullan Ajayur purir uñjkäta, ukapï Qullan Ajayumpi bautisirixa’ sasa.#1.33 Mt 3.11,16-17; Hch 1.5; 2.1-4 (Is 11.1-2; 42.1; 61.1). 34Nayasti uñjtwa, uk arsurakta: Jupapï Diosan Yuqapaxa.”
Jesusan nayrïr yatiqirinakapa
35Qhipürusti Juanax pani arkirinakapampiw wasitat ukawjankaskäna. 36Ukatsti Jesusar uka chiqa saraskir uñjasinxa, Juanax sänwa:
—¡Uñtapxam, jupaw Diosan Corderopaxa! —sasa.
37Uk ist'asinsti, Juanan pani arkiripax Jesusaruw arkapxäna. 38Jesusasti jupar arkaskir uñjasin kutikipstani, ukat jupanakar sarakïna:
¿Kunarak thaqhasipktasti? —sasa.
Jupanakasti sapxänwa:
—Yatichiri, ¿kawkinarak utjastasti? —sasa.
39Jesusasti jupanakarux sarakïnwa:
—Jutapxam, ukat uñjapxäta —sasa.
Jupanakasti jupamp chikaw utjäwip uñjir sarapxäna. Uka urusti Jesusampiw qamapxäna, niya pusi jayp'üxatap layku.
40Juanar ist'asin Jesusar arkapkatayna uka paninit maynïrix Andrés sutinïnwa; jupasti Simón Pedron jilapänwa. 41Andresax janïr kunäkipan Simón jilapar thaqhirix saräna, ukat sarakïna:
—Cristoruw jikxatapxta —sasa.
42Ukatsti Andresax Simón jilaparuw Jesusan ukar irpäna.#1.42 Mt 4.18-20; Mc 1.16-18. Jesusasti jupar uñjasin sänwa:
—Jumax Juanan yuqapa, Simón sutinïtawa, ukampis jichhax Cefas sutinïyätawa, ukasti Pedro sañ muni —sasa.
Jesusax Felipempiru, Natanaelampiruw jawsi
43Qhipürusti Jesusax Galilea tuqiruw sarañ amtäna, Feliper jikxatasinsti, juparuw säna:
—Arkita —sasa.
44Felipex Betsaida markankirïnwa, Andresampi Pedrompisti uka markankirïpxarakïnwa. 45Felipesti Natanaelar thaqhiriw saräna, ukat sarakïna:
—Moisesax khitittix kamachin qillqkäna, profetanakas qillqkarakïna juparuw jikxatapxta. Ukasti Nazaret markankir Josean yuqap Jesusawa, —sasa.
46Natanaelasti sarakïnwa:
—Nazaret markat#1.46 Nazaret markax uka urunakan jan yäqat markakïnwa. ¿kuna sumarak mistuspasti? —sasa.
Felipesti sarakïnwa:
—Jutam uñjiri —sasa.
47Jesusasti Natanaelar jak'achasisinkir uñjasax sänwa:
—Akaxay, chiqpach israelitaw juti, jupansti janiw kuna sallqjañas utjkiti —sasa.
48Natanaelasti jiskt'änwa:
—¿Kunjämatarak uñt'istasti? —sasa.
Jesusasti sarakïnwa:
—Felipex janïr jawskäyätam ukapachaw higo quqa kayun uñjsma —sasa.
49Natanaelasti sarakïnwa:
—Yatichiri, ¡jumax Diosan Yuqapätawa, Israel markan Reyipa! —sasa.
50Jesusasti sarakïnwa:
—¿Higo quqa kayun uñjsma satatti nayar iyawsista? Ukatsipan akat qhiparux jach'a luräwinak uñjäta —sasa.
51Jesusax saskakïnwa:
—Qhanak sapxsma, jumanakax alaxpach jist'arat uñjapxäta, Diosan angelanakaparusti, Jaqin Yuqapxar makhataskiri, saraqasinkir uñjapxarakïta —sasa.
Currently Selected:
JUAN 1: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996