JUAN 2
2
Caná markan jaqichasïwi utjatapa
1Kimsa uru saraqatarusti,#2.1 Mä jaqichasïwix taqinin uñjkata suma manq'añanakampiw lurasirïna. Paqallqu ururakiw ukham lurapxirïna. Galilea uraqinkir Caná markan mä jaqichasïwiw utjäna. Jesusan taykapasti ukankänwa, 2Jesusampi, yatiqirinakapampisti uka jaqichasïwir jawsayatäpxarakïnwa. 3Ukansti jaqichasïwitak wakichat vinox pist'xataynawa, ukat Jesusan taykapax jupar säna:
—Vino pist'ayasipxi —sasa.
4Jesusasti taykaparux sänwa:
—Warmi, ¿kunatsa nayar uk sista? Janïraw pachaxax purinkiti#2.4 Nayan pachaxa: Aka arux aka qillqatanxa, Jesusan jiwañapata, jiwatanak taypit jaktañapat parli (Jn 7.6,8,30; 8.20; 12.23; 13.1; 17.1). —sasa.
5Jesusan taykapasti ukan luqtirinakarux sänwa:
—Kuntix jupax sapkätam uk lurapxam#2.5 Gn 41.55. —sasa.
6Ukansti qalat lurat suxta jach'a wakullaw uma uchañatak utjäna, judionakax uka umampiw q'umachasiñ luräwi phuqhapxirïna.#2.6 Mc 7.2-3. Sapa wakullarux niya patak litro umaw phuqt'äna. 7Ukat Jesusax jupanakar säna:
—Aka wakullanakar umampi phuqhantapxam —sasa.
Jupanakasti taqpach wakullaruw umampi phuqharapxäna. 8Ukatsti Jesusax saskakïnwa:
—Jichhasti, apsupxam, jaqichasïwi sarayirin ukar mallt'ayir apapxam —sasa.
Jupanakasti ukham lurapxäna. 9Jaqichasïwi sarayirix vinor tukuyat uma mallt'äna, jupax janiw kawkit uk apsutapsa yatkänti; ukampis luqtirinakax um apsunipxatap sum yatipxäna. Jaqichasïwi sarayiristi, jaqichasir waynaruw jawsayäna, 10juparusti sarakïnwa:
—Taqi jaqiw nayraqatax sumïr vino luqtayi, umt'atäxapxi ukapachasti, jan suma vinöki uk luqtayxi. Ukampis jumax sumïr vino jichhakam imatätaxa —sasa.
11Kuntix Jesusax Galilea uraqinkir Caná markan lurkän ukax nayrïr muspharkañ luräwipänwa; uka luräwimpiw ch'amap uñacht'ayäna, yatiqirinakapasti juparux iyawsapxarakïnwa.
12Uka qhipatsti Jesusax Cafarnaúm markaruw sarxäna, taykapampi, jilanakapampi, yatiqirinakapamp chikt'ata; uka markansti mä qawqha uruw qamarapxäna.
Jesusax Diosan utap q'umachi
(Mt 21.12-13; Mc 11.15-18; Lc 19.45-46)
13Judionakan Pascua jach'a urup niya jak'ankxipansti, Jesusax Jerusalén markaruw saräna. 14Tatitun utap manqhansti, vacanaka, ovejanaka, palomanak aljir jikxatäna, ukhamarak qullqi turkirinaksa. 15Uk uñjasinsti, Jesusax mä jawq'añ wakicht'asïna, ukampiw taqinir Tatitun utapat alissüna, ovejanakapampi vacanakapamp chika. Qullqi turkirinakan qullqip willtäna qullqi uskusiñanakapsa jaqurpayänwa. 16Palomanak aljirinakarusti sänwa:
—¡Taqi akanak akat apsupxam! ¡Awkixan utap jan mä qhathur uñtat tukuyapxamti! —sasa.
17Yatiqirinakapasti Qillqatan siski uk amtapxäna: “Utamar munañaw ninjam nakhantitu”#2.17 Sal 69.9 (10). sasa.
18Judionakasti uk uñjasax Jesusaruw jiskt'apxäna:
—¿Kuna munañanïñampirak ak lurtasti? —sasa.
19Jesusasti jupanakarux sarakïnwa:
—Tatitun aka utap t'unjapxam, nayasti kimsürun wasitat sayt'ayä —sasa.
20Judionakasti juparux sapxarakïnwa:
—Pusi tunka suxtan maran aka uta lurañax tukuyasi, ¿jumasti, kimsürunakti sayt'ayasmasti? —sasa.
21Ukampis kawkïr utattix Jesusax parlkän ukax, jupan pachpa janchipänwa. 22Yatiqirinakapasti Jesusax jiwatat jaktkän ukapachaw uka arsutapat amtasipxäna, ukatsti jupanakax Qillqatan chiqätap iyawsapxäna, Jesusan arsutanakaparus iyawsapxarakïna.
Jesusax taqiniruw uñt'i
23Jesusax Pascua urun Jerusalén markankkän ukapachasti, muspharkañanak luratap laykux waljaniw juparux iyawsapxäna. 24Ukampis Jesusax janiw jupanakar alkataskänti, jupan taqinir uñt'atap layku. 25Janiw jupax uka jaqinakat khitin arsuñapas wakiskänti, jan ukasti jupa pachpaw jaqin chuymap uñt'äna.#2.25 Jaqin chuymap uñt'äna: 1 S 16.7; Jer 17.9-10; Jn 1.47-50.
Currently Selected:
JUAN 2: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996