JUAN QALLTA ARUNAKA
QALLTA ARUNAKA
Juan apostolun qillqatapax maynïr qillqatanakat sipan qhip qhipa qillqatätap yatisi, aka qillqatax maynïr qillqatanakat sipan mayjätap amuyasi, ukax Tatitun walja luräwinakapata, yatichäwinakapat parlaraki, ukanakasti janiw maynïrinakan jikxataskiti, jikxataschi ukasa, yaqha tuqit amuyt'ayi. Marcosan qillqatapjamaw Bautisir Juanan luräwipat parlañ qallti (1.19-51). Galilea uraqin Jesusan taqi jaqinakan uñjkat luräwinakapatxa, mä juk'ak qhanañchi; ukampis Judea uraqin lurkän ukanakat jilpach parlaraki (2.1—12.50). Ukatsti Jesusan Jerusalén markar Pascua uru amtañatak walja kuti saratapa, judionakan yaqha jach'a urunak amtañatak saratapat qhanañcharaki. Ukxarusti, Tatitun qhip qhipa urunakan Jerusalén markankatapata, jaktäwipampita, walja kuti mayninakar uñstatapampita, fariseonakampi jikisitapata, griegonakan jupar tumpir jutatapata, juk'amp suma wakiskir luräwinakapat qhanañcharaki, ukanakasti janiw maynïr kimsa evangelio qillqatan utjkiti (13.1—19.42). Aka sapa qillqatanak Jesusan Galilea quta thiyan uñstäwipat parli, ukhamarak Pedron wasitatampi ajay tuqin ch'amañchasitapatsa (cap. 21).
Juan apostolun qillqatapanxa, Jesusan luräwinakapat sipanxa, Jesusax khitïkitix uk sum qhanañcharaki. Ukanak tuqitxa, qalltir arunakapan qhanañchi (1.1-18); ukansti Tatitux Diosan wiñay Arunakapjam uñstayatawa, jupasti jaqiruw tuküna, jaqinak taypin jakañapataki. Muspharkañanak luratanakapax jupan ch'amanïtapat uñacht'ayistu. Arsutanakapasti uñtasïwinak tuqiw amuyt'ayistu, uma tuqi, t'ant'a tuqi, qhana tuqi; ukanakasti Diosax Cristo tuqi wiñay jakañ churirïtapat qhanañcharakistu, uksti khitinakatix Jesusar jichhür jaysapki, jupan thakhïtapa, chiqätapa, jakañätap uñt'apki ukanakaw katuqapxi. 13-17 uka jaljanakanxa, Jesusan yatiqirinakapampi jila purjam jakasitapat parlistu, katuntatätapata, yatiqirinakapatak Diosat mayitapata, yatiqirinakapar suma ch'allxtayir arunak arsutapata, ukatsti, kunapachatix Jesusax katuntatäkani, ch'akkatatäkani uka pachan ch'amañchir arunak jaytawayatapat parlistu.
Currently Selected:
JUAN QALLTA ARUNAKA: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996