MATEO 2
2
Amawt'a jaqinakan Jesusan ukar jutapxatapa
1Kunapachatix Herodesax uka markan reyïkän ukapachaw Jesusax Judea uraqina, Belén#2.1 Belén: uka markax Jerusalén marka jak'ankiwa; David reyin yurïwi markapawa (1 S 16.1). Lc 2.4-7. markan yurïna. Jerusalén markarusti amawt'a#2.1 Amawt'a jaqinaka: Qillqatanxa janiw siskiti qawqhanïpxpachänsa uka, ukhamarus janirakiw yatiskiti kawki markatäpxpachänsa. Jan ukasti, kawkïr markanakatix jan judiökasin Tatitur katuqapkani uk uñacht'ayäna. jaqinakaw inti jalsu tuqit purinipxäna, 2ukat jiskt'apxäna:
—¿Kawkinkis jichha yurki uka judionakan reyipaxa? Inti jalsu tuqin warawarap uñjapxta, ukat jupar yupaychir jutapxta —sasa.
3Herodes reyisti uk yatisin wal mayjt'asïna, Jerusalenan jakir taqi jaqinakas mayjt'asirakïnwa. 4Ukat jupax jilïr sacerdotenakampiru, kamachi yatichirinakampir jawsthapiyäna, ukatsti kawkhantix Cristox yuriñapäkän uka tuqit jiskt'äna. 5Jupanakasti sapxänwa:
—Judeankir Belén markan yuriñapawa, profetax akham qillqawayi:
6‘Judea uraqinkir Belén marka,
wali aytat markanak taypinxa,
janiw sinti jisk'äktati;
jumat mä jilïrix mistuni,
jupaw Israel markaxarux irpani’ sasa.#2.6 Miq 5.2 (1).
7Ukat Herodes reyix amawt'anakar jamasat jawsäna, ukatsti jupanakaruw jiskt'äna kunapachapunisa uka warawarax uñstkatayna uka. 8Jupanakarusti Belén markaruw khithäna, akham sasa:
—Sarapxam, uka wawat sum yatxatanipxam; jikxatasinsti nayar yatiyapxita, ukat nayan yupaychir sarañaxatakiraki —sasa.
9Reyin iwxanakap ist'asinsti, amawt'anakax sarawayxapxänwa. Kawkïr warawartix uñjapkän ukax, jupanakan nayraqatap saräna, ukatsti kawkhantix wawax jikxataskäna ukkharuw sayt'äna. 10Amawt'anakasti warawarar uñjasin wal kusisipxäna. 11Utar mantasinsti wawarux, María taykapampïskir jikxatapxäna; ukatsti killt'asisin wawarux yupaychapxäna. Imasiñanakap jist'arasinsti, quri, incienso, mirra#2.11 Incienso, mirra: Arabia markat apanit suma q'apkir qullanaka. uka churäwinak juparux katuyapxäna. 12Amawt'anakasti mä samka tuqiw Herodesan ukar jan kutt'añapatak yatiyatäpxäna, ukat yaqha thakhinjam markapar kutt'awayxapxäna.
Egiptor jaltxapxatapa
13Amawt'anakan sarxatapatsti, Tatitun angelapaw Josearux samkan uñstäna, juparusti sänwa: “Sartasim, ukatsti wawampiru María taykapampir irpxarusin Egipto markar jaltxam. Kunapachkamatix nayax siskäma ukürkamaw ukankäta, Herodesaw wawar jiwayañatak thaqhani” sasa.
14Uka arumpachaw Joseax wawampiru taykapampir irpxaruwayasin Egipto markar sarxäna, 15uka markansti Herodesan jiwañapkamaw ukankapxäna. Taqi akanakasti kuntix Tatitux profetap tuqi arskatayna ukarjamaw phuqhasiskäna: “Egiptot wawaxar jawsta” sasa.
Herodesax wawanakaruw jiwarayi
16Herodesasti amawt'anakan jupar sallqjatap amuyasisinxa, walpun phiñasïna, ukat Belén markana, uka thiyanakan jakir wawanakar pä maranit aynachar taqpachanir jiwarayiriw khithäna; amawt'anakax sapkatayna uka urunakarjam amuyt'asa. 17Ukhamat Jeremías profetan qillqatapax phuqhasïna:
18“Arnaqasitanakaw Ramá sat markan ist'asi,
jachañampi, wali ayquñampi.
Raquelaw wawanakapat jachaskäna,
jupasti janiw chuymachatäñ munkänti,
wawanakapan jiwaratäxatap layku” sasa.
Josean Nazaret markar kutt'xatapa
19Herodesan jiwatap qhipatsti, Tatitun angelapaw Egipto markan Josearux samkan uñstäna, ukatsti juparux sarakïnwa: 20“Sartasim, ukatsti wawampiru taykapampir irpxarusin Israel markar kutt'xam, wawar jiwayañ munirinakax jiwxapxiwa” sasa.#2.20 Ex 4.19-20.
21Ukapachaw Joseax, wawampiru taykapampir irpxarusin Israel markapar kuttxäna. 22Joseasti Arquelao sat chachan Herodes awkip lanti Judea markar apnaqaskatap yatïna, ukat jupax ukar sarañ axsaräna, ukampis jupax mä samka tuqi Tatitun yatiyataw Galilear sarxäna. 23Galilea markar purisinsti, Nazaret markar jakiriw sarxäna. Ukasti kuntix Diosax profetanak tuqi arskäna ukarjamaw phuqhasiskäna: “Nazaretankir Jesús satäñapataki”.
Currently Selected:
MATEO 2: AYOPD
Highlight
Share
Copy
Want to have your highlights saved across all your devices? Sign up or sign in
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996