YACHAY 14
14
1Waj runañataj, munaspa jatun qochaman yaykuyta, uj k'ullumanta mañakun mana phiña yakuwan atipachikunampaj. Chay k'ullutaj barcomantaqa, imapichus runa rinan tiyan, aswan pisi sinch'i.
2Qolqechakuyta munapayasqankurayku, runasqa barcosta ruwakorqanku. Sumajta unanchakuspa runasqa barcosta ruwarqanku.
3Qhawakusqaykiwan, qampuni kanki barcota pusajqa, Tatáy. Qanqa, jatun qochanta ñanta ruwanki, yakusninta uj cheqanchanata.
4Ajinamanta, rikuchinki ima sajramantapis runata jark'ayta atisqaykita. Pillapis, mana yakuman yachasqalla, kachaykukuyta atinampaj.
5Qan mana munankichu qhasillata qhepakunanta qampa ruwasqasniyki. Chayrayku, runasqa kausayninkuta jaywallanku k'ullu barcoman, imawanchus yakusninta rinku, chayankutaj chimpaman, mana ni imanasqas.
6Chay pachaj qallariynimpipis, maypachachus jatuchaj wampu runasqa wañorqanku, pikunachus qhepakorqanku chay runaslla, chhalla k'ulluman wicharerqanku. Ajinamanta, makiykiwan pusachikuspa, saqerqanku mosoj laya runamanta mujuta.
7Bendicisqa kachun k'ullu maynejta cheqanyachiy chayamun.
8K'ullurí imamantachus lanti ruwakun, maldicisqa kachun. Iskayninku maldicisqas kachunku: Lantipis, lantita ruwajpis. Lantita ruwajqa, chayta ruwasqanrayku. Lantirí, ismoj kaspa, dios sutichasqa kasqanrayku.
9Diosqa ujllapi chejnikun sajrata ruwajta, sajra ruwasqatataj.
10Ruwajpis, ruwasqa imapis jasut'isqas kanqanku.
11Diosqa t'unarparichenqa mana paypi creejkunaj lantisninkutapis. Diosqa ruwajtimpis chay imastaqa, runasqa chaykunata millachikunapaj imasman tukucherqanku. Chay lantisqa runasta chinkachinku, mana umayojkunata misk'achinku.
Imaynamantataj runasqa lantista yupaychayta qallarerqanku
12Runasqa, lantista yupaychasqankuwan, qallarerqanku millaykunata ruwayta. Chaynejta, kausayta tukuykuchinku.
13Chay ídolo lantisqa kay pachaj qallariynimpi mana karqankuchu, nitaj wiñaypaj kanqankuchu.
14Lantis rikhurimunku ch'usaj umayoj runasnejta. Chayraykumá, Diosqa nin amaña kanankuta. Qhajpacha chinkananku tiyan.
15Uj runa, paran paranta waqaspa, wawan waynallaraj kashajtin wañupusqanmanta, ruwachin chay wawampa lantinta, chay kikimpacha, wañupojman rijch'akojta. Pichus ñaqhallaraj wañusqa runa karqa, kunanqa dios jinata yupaychasqa kashan. Tatanqa nin tukuy ayllu chay ídolo lantiman k'umuykukunankuta, mañakuspataj, rikuchikusta jaywaspataj.
16Chantaqa, chayllatapuni ruwaspa sapa kuti, wataswanqa tukuy runas kikillanta ruwankuña.
17Ajinallatataj, kamachejkunapis ninku paykunaj lantisninkuta yupaychanankuta. Kamachejqa karupi tiyakusqanrayku, runasnin mana atinkuchu kikin payman k'umuykukuyta. Chayrayku, payman rijch'akoj lantita ruwakorqanku, chaypi kanman jina, lantillata yupaychanankupaj.
18Lantista ruwajkunaqa, qolqerayku waj ladosmampis apanku chay ruwasqasninkuta, chay kamachejta mana rejsejkunapis yupaychanankupaj.
19Chay lantista ruwajqa, sumaj ñawiwan qhawachikunampaj kamachejwan, lantita aswan k'achituta ruwarqa kikin kamachejmanta nisqaqa.
20Masarí, chay jina k'achituta rikuspa lantitaqa, dios jinata qhawan, pitachus chaykama runa jinallata qhawarqa chayta.
21Chayqa runasta pantaykuchin. Paykunaqa, sarusqas llakiykuchisqas kamachejninkoj atiyninkuwan, rumitapis, k'aspitapis suticharqanku chay sutiwan, mayqenwanchus Dios sapallan sutinchakunan karqa.
Chaynejta tukuy ima laya juchas chayamun
22Mana chayllachu. Paykunaqa mana pantallankuchu Diosta mana rejsispa, manachayqa paykuna ukhu maqanakuspalla kausanku. Chay jina kausakusqankumantaj, kayqa allin kausay, nispa ninku.
23Tantaykunasninkupi juch'uy wawasta wañurachej kanku. Ch'inllamantapis tukuy ima laya millaykunasta ruwallanku. Yuyayninkuta chinkachispataj, t'ukuna fiestasman qokunku.
24Millayta kausakunku. Ni casamientollapis respetowan qhawankuchu. Imallamantapis uj runaqa runa masinta wañurachin. Chantaqa, waj runañataj runa masinta llakichin, warminta qhechukapuspa.
25Tukuynejpi, chajru chajrullata rikunchej runas yawarta suruchisqankuta, wañuchinakusqankuta, suwakusqankuta, ch'aukiyanakusqankuta ima. Chantapis, lluk'iykuchikunku, llullakunkutaj. Chantapis, ch'ajwas tiyan. Chaymantataj, qhasi mana kajta parlanku.
26Manaña yachankupischu imachus allin, imachus mana allin. Chantá, qonqapunkutaj imallatapis runa masisninku tukuy sonqo paykunata yanapasqankumanta. Millaykunasmampis qokunku. Qharisqa mana warmisllawanchu purinku, manachayqa, qhari masisninkuwan. Ajinallataj, warmispis warmi masisninkuta mask'anku. Casadosqa t'aqanakunku, wasanchanakunku ima. Tukuy chaykunapeqa millaytapunitaj kausanku.
27Qhasi mana kaj lantista yupaychasqankumanta, tukuy ima laya sajra chayamun, p'utumuntaj. Kay pachataj tukuy mana allin kajwan junt'asqa kashan.
28Lantista yupaychajkunaqa, chay jina fiestasninkupi yuyayninkuta chinkachinku. Llullakuspa nillankutaj Diospa sutimpi parlasqankuta. Runa masisninkuta saruspa kausakullanku. Chaymantataj, qhajpachallata falsota juramentanakunku.
29Sonqosninkuta churasqankurayku mana kausakoj lantisman, yuyanku mana castigachikusqankuta falsota parlasqankumanta.
30Jinapis, castigachikullanqankupuni iskay kutita. Ñaupajtaraj, mana allintachu Diosmanta yuyasqankumanta, lantisman qayllaspa. Chaymantataj, santo kajta qhesachaspa, falso juramentosta ruwasqankurayku, imachus cheqan kajta p'akispa.
31Chay ídolo lantis, mayqenkunaj ñaupaqenkupi llullakunku, mana atiyniyojchu kanku paykunata castiganankupaj. Mana chayrí, chay cheqanyachej pichus juchasapasta castigan, chaypuni urman mana allin kajta ruwajkunaj patankuman.
Currently Selected:
YACHAY 14: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.