YACHAY 13
13
Imaynamantataj runasqa qoyllurkunata, kay pachapi kajkunatataj yupaycharqanku
1Ch'usaj umasniyojpuni karqanku Diosta mana rejsej runasqa. Mana aterqankuchu rikusqankunejta kausakojta rejsikapuyta. Manataj aterqankuchu ruwasqasnejta yachayta pichus tukuy imata ruwarqa.
2Mana chayrí, dioskuna jinata yupaycharqanku ninata, wayrata, mana sayaj phukuyta, qoyllurkunata, phullchimoj yakuta, janaj pachapi kaj k'anchaykunatawan. Tukuy chaykunaqa paykunapaj dioskuna karqanku, mundontinta kamachejkuna.
3Sichus chaykunaj k'acha kayninkuta rikuspa dioskunapunichá kaykuna, nispa nerqanku, yachachunku chaykunaj señorninku aswan k'acha kasqanta, imaraykuchus paypuni, k'acha kajta ruwajqa, kanankuta nerqa.
4Chaymantataj, sichus t'ukorqanku rikuspa atiyniyoj kasqankuta, rikuspataj kayman jaqayman kuyurisqankuta, yuyachunku aswan atiyniyojpuni kasqanta chaykunata ruwarqa.
5Mundontimpi rikuspa jatuchaj kajta, k'acha kajtataj, rejsiyta atinchej chaykunata ruwajta.
6Chay jinamanta yuyaj runastaqa ama p'enqachinachu. Ichapis pantasqas kashanku, manaraj Diosta tariyta atispa, mask'ashajtinkupis.
7Diospa ruwasqasnin ukhupi kausanku. Chaykunata rikuspataj, rejsikapuyta munanku. K'achitu kasqanraykutaj, jap'erqochikunku.
8Jinapis, juchanku kakullampuni.
9Imajtin ari, qayllaykuspaña tukuy imaman yuyayninkuwan, mana kunankama tarinkuchuri tukuy imaj Señornintaqa?
Imaynamantataj runasqa k'ullusman k'umuykukorqanku
10Khuyakunapajpuni kanku paykunaqa. Sonqosninkuta qopunku mana kuyurikuyta atejkunaman. Runaspa ruwasqasninkutaqa dioskunata sutichanku: Qorimantawan, qolqemantawan imasta, k'achituta ruwasqasta. Uywasman rijch'akojkunatapis, dioskunata ninku. Chantaqa, ñaupa runas k'achanchasqanku chay wijch'unallapajña rumispis, paykunapaj dioskunallataj karqanku.
11Kunanqa yuyarikuna wakin llant'eros ruwasqankumanta. Llant'eroqa, juch'uy sach'ata urmachiytawan, qaranta qechukapun usqhayllata. Chay k'ullumantataj imallatapis ruwarqon wasimpi sirvinampaj.
12Puchorqa chay k'aspistarí, llant'apaj jallch'an, mikhunanta wakichikunampaj.
13Mana ni imapajña sirvej k'ullutarí, phujllakuspalla k'achanchaykun. Chay mosqosniyoj wist'u kurkutaqa, runa rijch'akojman tukurparichin.
14Kutispi, makisninmantaqa llojsin qhesachana animalman rijch'akoj. Chantaqa, pukamanta llut'arqompacha, jusk'usmampis t'uruta ñit'ispa.
15Chaymantataj, perqapi uj t'oqota ruwan. Chaypitaj k'ullutaqa fierrowan sayachin.
16Chayta ruwan ama k'ullu urmanampaj. Yachan ari chay k'ulloqa sapallanmanta mana kuyuriyta atisqanta. Lantilla kasqanrayku, runapuni kayman jaqayman apanan tiyan.
17Jina kajtimpis, chay k'ullumanta mañakun, imallamantapis pisichikushajtin. Casaranampajpis mañakullantaj. Wawasnimpajpis mañakullan, mana penqachikuspa mana kausakojman parlasqanmanta. Onqosqa kashajtintaj, mana kallpayojmanta mañakullan.
18Kausanampajqa, mana kausayniyojmanta mañakun. Mana ni imata ruwayta atejwanqa yanapachikuyta munashan. Waj ladosman rinan kashajtin, mana chakisniyojmanta mañakun.
19Qhatuman rinan kajtin, imallatapis ruwanan kajtimpis, mana makisnimpi kallpayojwan yanapachikuyta munashan.
Currently Selected:
YACHAY 13: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.