TITO 1

Pabloj napaykuynin

1Noqa Pablo, Diospa kamachin, Jesucristoj apostolnintaj kani; Diospa ajllasqasninta creeyman pusanaypaj, cheqa kajtataj rejsinankupaj, Diosta yupaychana kasqanman jina. 2Wiñay kausay suyaypi, mayqentachus mana llullakoj Dios qosqaykichej nerqa, manaraj kay mundo ruwasqa kashajtin. 3Maychus tiempompitaj rikuchisqa karqa palabran willaykunanejta; chaytaj noqaman qosqa karqa, Salvadorninchej Dios kamachisqanrayku. 4Tito, kay cartata escribimuyki, qanman pichus cheqamanta waway kanki khuska creesqanchejpi. Khuyakuy, sonqo tiyakuy, Dios Tatamanta, Señor Jesucristo Salvadorninchejmantawan qanwan kachun.

Kurajkunaj ruwaynin

5Creta churupi saqerqayki, imaschus ruwanaraj kasqanta ruwanaykipaj, sapa llajtapi kurajkunata churanaykipaj, kamachisusqayman jina. 6Kurajqa mana imamanta k'amina kanan tiyan, uj warmiyojlla. Wawasnintaj creejkuna kananku tiyan, manataj sajra kausaymanta ch'atanas, nitaj mana kasukojkuna. 7Iglesiapi uma kajqa mana k'amina kanan tiyan, Diospa mayordomon jina, mana jatunchakoj, mana usqhayllata phiñakoj, mana machaj, mana maqanakoj, nitaj qolqeta munapayaj. 8Astawanqa wasinman wajyakoj kanan tiyan, allin kajta munakoj, sumaj yuyayniyoj, cheqan kajta ruwaj, juchamanta t'aqasqa, kausaynimpitaj mana juchawan atipachikoj. 9Cheqa kaj palabrata yachakusqanman jina, paypis wajkunata sonqochanampaj allin yachachiywan, churanakojkunatapis atipanampaj.

10Ashkha tiyan mana kasukojkuna, mana kajta parlajkuna, ch'aukiyajkuna. Kaykunamanta astawanqa kanku circuncisionmanta kajkuna. 11Chaykunataqa ch'inyachina tiyan. Chaykunaqa pejtunku wasintinta mana kajta yachachispa, qhasimanta qolqeta jap'ispa.

12Uj Creta llajtayoj profeta llajta masisninmanta paraspa nerqa: Cretensesqa llullas kanku, k'ita uywas jina, mikhunawan mana sajsay atejkuna, qhellastaj. 13-14Kay nisqayqa cheqapuni. Chayrayku sinch'ita k'amiy, feninkupi paykuna allin kanankupaj, ama kasunankupaj judiospa llulla yachachiyninkuta, nitaj runakunaj kamachisqankutapis cheqa kajmanta t'aqasqa kajkunamantapis.

15Llimphuspajqa tukuy ima llimphu; juchasapaspajqa, Diospi mana creejkunapaj, mana imapis llimphuchu, imaraykuchus yuyayninku, sonqonkupis juchawan ch'ichichasqas kanku. 16Yuyanku Diosta rejsisqankuta, ruwasqasninkuwantaj payta qhesachanku. Millaykuna mana kasojkuna kanku, nitaj allin kajtapis ruwayta atinkuchu.

Currently Selected:

TITO 1: QCHSB

Highlight

Copy

Compare