2 TIMOTEO 4

Diospa palabranta willana

1Kayta niyki tukuy sonqowan, mañakuyki Diospa ñaupaqempi, Cristo Jesuspa ñaupaqempi ima. Pay jamonqa kausajkunata, wañusqastapis jamuynimpi reinompi juzganampaj. 2Chayrayku, Diospa palabranta willay tiempompi, mana tiempompipis; jinallataj uyanchay, k'amiy, sonqochay pacienciawan allinta yachachispa. 3Uj p'unchay jamonqa maypachachus mana munanqankuchu uyariyta, cheqan kajtataj yachachiyta. Manachayqa paykunaj sajra munayninkuman jina yachachejkunata tantanqanku, imaynatachus uyariyta munasqankuta yachachinankupaj. 4Cheqa kajta mana uyariyta munanqankuchu, qhasi mana kaj yachachiykunata uyarisqankurayku. 5Qantaj maychus kajta kausakuy tukuy imapi, llakiykunata apay evangeliota willaraspa. Llank'ayniykita allinta junt'ay.

6Noqaqa rikuchiku jina Diosman jaywasqa kanay tiyan. Wañuyniy qayllapiña kashan. 7Allin tinkupi maqanakuniña, ruwanaytapis tukuychaniña, jinapis creespallapuni kani. 8Chayrayku, noqapaj kaj pilloqa waqaychasqaña kashan. Chaytataj qowanqa Señor, cheqan kaj juez, jaqay p'unchaypi. Manataj noqallamanchu qowanqa, astawanqa jamunan p'unchayta munakuywan tukuy suyajkunamampis.

Timoteollaman parlan

9Usqhaytapuni jamuy watukuwaj. 10Demasqa saqerpariwan, Tesalonicamantaj ripun, kay mundoj imasninta munakuspa. Crescentepis Galaciaman rerqa, Titotaj Dalmaciaman. 11Lucaslla noqawan kashan. Marcosta pusamuway, imaraykuchus payqa, allin yanapanawampaj. 12Tiquicota Efesoman kacharqani. 13Jamoj jinataj, Troaspi Carpoj wasimpi saqesqay qhatakunay p'achata, librosniytawan apampuway, astawanqa qarapi escribisqastawan.

14Herrero Alejandro ashkha sajra imasta ruwawarqa; paymantaj Señorlla kutichipuchun ruwasqasninman jina. 15Qampis allinta paymanta qhawakuy, imaraykuchus anchatapuni yachachisqanchejpa contrampi sayaykukorqa.

16Ñaupaj kutita kurajkunaj ñaupaqempi kutichikushajtiy, mana pipis yanapawarqachu, tukuyninkutaj saqerpariwarqanku. Kaymantaqa ama paykunata Dios juchachachunchu. 17Chaywampis, Señor noqawan karqa, kallpachawarqataj evangeliota allinta willanaypaj, tukuy mana judiostaj uyarinankupaj. Ajinamanta Señorqa leompa siminmanta kacharichiwarqa. 18Tukuy ima sajramanta Señorqa jark'awanqa, waqaychawanqataj janaj pacha reinompaj. Pay yupaychasqa kachun, wiñaypa wiñaynimpaj. Amén.

Pablo napaykun hermanosta

19Napaykapuway Priscata, Aquilata, Onesíforoj wasimpi kajkunatawan. 20Erasto qhepakorqa Corintopi, Trofimotataj saqerqani Miletopi onqosqata. 21Chantá jamuypuni, amaraj chiri tiempo chayamushajtin. Qanta napaykamusunku Eubulo, Pudentewan, Linowan, Claudiawan, tukuy hermanospiwan.

22Señortaj qanwan kachun. Jinallataj Diospa khuyakuynimpis qankunawan kachun.

Currently Selected:

2 TIMOTEO 4: QCHSB

Highlight

Copy

Compare