ECLESIÁSTICO 30
30
Wawasta yachachinamanta
1Wawanta munakojqa chicoteta mana kacharinchu. Machu kaynimpitaj, chay wawanqa payta kusichenqa.
2Wawanta allinta yachachejqa, kusikuyniyojmin kanqa. Rejsisqasnin ukhupitaj uman oqharisqalla kanqa.
3Sumaj uywasqa wawaqa envidiachin enemigosta. Amigostataj kusichin.
4Tatan wañojtenqa, mana wañunchu ninchejman. Wawanqa pay kikin ari.
5Kausakushajtin tatanqa, rikuspa kusikun. Wañupojtintaj, mana llakikunchu.
6Wañupuytawanqa, wawanñataj sayarenqa enemigospa contranta. Amigostataj agradecekonqa.
7Pichus wawantaqa mana allintachu uywarqa, wawampa heridasninta jampinan tiyan. Sonqonta nanachikuspa chayta ruwanqa.
8Mana allin yachachisqa caballoqa chucaroman tukun. Mana allin uywasqa wawataj salvajeman tukun.
9Wawaykita mana k'aminkichu chayqa, llakichisonqa. Phujllachillanki chayqa, waqachisonqa.
10Paywan asirikunki chayqa, waqanki, rabiawantaj kharkatitinki.
11Joven kaynimpi ama ruwachunchu munaynillantaqa. Mana allin ruwasqasninmanqa, ama ñawisniykita wisq'aychu.
12Joven kajtin, wasanta k'umuykuchiy. Wawallaraj kajtin, wasanta nanaykuchiy. Pajtataj oqharikunman mana kasukuyta munaspa, sonqoykita nanachisuspa.
13Wawaykita k'umuykuchiy, ama contraykita oqharikunampaj.
Kusikuyniyoj kaymanta
14Aswan walej sanotaj kallpayojtaj wajcha runa, onqosqa qhapaj runamantaqa.
15Sanotaj kallpayojtaj kayqa, aswan sumaj tukuy qorimanta. Qolqeyojmantaqa aswan sumaj kallpayojmin.
16Qolqeyoj runamanta aswan qhapaj sano runaqa. Kusikuyniyoj kaymantaqa, mana ni ima aswan sumaj kanchu.
17Aswan walej kanman wañupuy, mana kusisqalla kausaymantaqa. Mana sanoyayta atiyman chayqa, wiñaypaj samarikullaymanña.
18Sichus mikhunata uj wisq'asqa simiman chayachiwaj, rijch'akuwaj lantisman rikuchikusta apaj runaman.
19Lanteqa manataj rikunchu, manataj muskhirinchu. Imapajtaj rikuchikusta jaywankuri?
20Eunuco qhareqa sipasta abrazaykushan waqaspa. Ajinallataj chay lanteqa.
21Ama llakiywan atipachikuychu. Yuyasqaykiwan ama kikiykita llakichikuychu.
22Kusisqa sonqoqa runata kausachin. Kusisqa kasqanrayku astawan kausanqa.
23Ama munaychu wañupuyta. Sonqoykita thañiy. Llakiyta sonqoykimanta karunchay. Llakiyrayku ashkha runasqa chinkayman chayarqanku. Phiñakuynejta mana ni ima sumaj jamunchu.
24Envidiakojtaj maqanakojtaj aswan usqhayta wañupun. Anchata llakikojqa aswan usqhayta machuyan.
25Kusisqa kashanki chayqa, mikhullay.
Currently Selected:
ECLESIÁSTICO 30: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.