ECLESIÁSTICO 21
21
Juchaqa chinkayman apan runata
1Wawáy, juchallikorqankichu? Ama ujtawan juchallikuyñachu. Tukuy juchasniykimantataj perdonta mañakuy.
2Juchamanta ayqey katarimanta jina. Qayllanki chayqa, qhanichikuwaj. Leonqa kirusninwan runasta wañuchin.
3Juchaqa uj khuchuna jina, iskay ladomanta filochasqa. Runaqa chaywan khuchuchikunman chayqa, mana thañinmanñachu.
4Qhapaj runaqa wajchaman tukun anchata oqharikuspa, wapuman tukuspataj. Wapu wapoj wasanqa t'unarparichisqa kanqa.
5Diosqa wajchaj mañakuyninta uyarin, usqhayllatataj maychus kajta qopun.
6Mana k'amichikuyta munajqa, juchasapaj qhepampi purishan.
7Karumantapacha ch'ajwakuta rejsinchej. Umayojrí kikin juchasninmanta reparakun.
8Pichus wasinta ruwan wajpa qolqenwan, rijch'akun pimanchus rumista astan kikin sepulturanman.
9Sajra runasqa ch'aki llant'a jina kanku. Ruphaykonqanku.
10Juchasapaj ñannin sumaj allinchasqa. Jinapis, wañuyman apan.
Yachayniyojmanta, mana yachayniyojmantawan
11Señorpa kamachisqasninta junt'ajqa mana juchawan atipachikunchu. Señorta yupaychajqa yachayniyojman tukun.
12Mana umayojqa mana yachakuyta atinchu. Wakin runas, umayojkunapis kajtinku, llakisqa sonqolla purinku.
13Yachayniyojpa yachakusqanqa mayu jina. Nisqasnin mana tukukoj juturimanta jina p'utumunku.
14Sonsoj umanqa lajra manka jina. Yachakusqanqa sut'urishan.
15Umayoj runa uyariytawan k'acha palabrasta, umampi jap'ikun. Chaymanta, waj k'acha palabrastapis yapallantaj. Uj sonsorí, uyariytawantaj q'ellikumpacha, manataj uyarimpischu.
16Sonsota uyarejqa rijch'akun llasa q'epiwan purej runaman. Umayojta uyarikojrí mayta kusikun.
17Runasqa tantakuspa yachayniyojpa nisqanta uyarikunku. Uyarisqankuwantaj unanchanku.
18Sonsoj yachakusqanqa raqayman rijch'akun. Nisqanqa manapuni entiendekunchu.
19Rikuymá cadenasqa chakista, uj watasqa paña makitawan. Ajina, sonsopis yachayninwan.
20Sonsoqa simin kicharisqa asikun. Umayojtaj asirillan.
21Rikuymá imallatapis qorimanta ruwasqata. Rikuytaj uj paña makita qori warawasniyojta. Ajina yachayniyoj runaqa.
22Sonsoqa wasisman yaykullan. Umayojrí wasi punkupi suyarikullanraj wasiyoj pasachinanta.
23Sonsoqa, wasiman yaykuspa, tukuy imata rikushanña. Umayojri jawallapi sayan.
24Umayojqa manapuni uyarinmanchu punkumanta wasi ukhupi nisqankuta. P'enqaymanta wañunman.
25Ch'ajwilisqa tukuy uyarisqankuta parlallanku. Umayojkunarí, imallatapis ninankupaj unanchakunkuraj.
26Sonsoqa imachus yuyasqanta nillan. Yachayniyojrí yuyashanraj imatachus ninanta.
27Sonsoqa, millayta parlaspa enemigompaj, kikin paypa contrampi parlashan.
28Qhasimanta parlajqa, pay kikinta dañota ruwakun. Vecinosninwantaj chejnichikun.
Currently Selected:
ECLESIÁSTICO 21: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.