DANIEL Gr 3
3
Azariaspa mañakuynin
24Sadracwan, Mesacwan, Abed-negowan ima purisharqanku nina chaupipi, takispa, yupaychaspataj Señor Diosta.
25-26Azariasqa, nina chaupipi kashaspa, Diosmanta mañakuyta qallarerqa nispa: Yupaychayki, Señor, ñaupa tatasniykoj Diosnin. Qantapuni yupaychanayku tiyan. Sutiyki jatunchasqa kachun wiñaypaj. 27Qanqa, cheqan sonqoykiman jina, tukuy imata allinta ruwapuwarqayku. Tukuy imata cheqanta ruwaj kanki. Simiyki ujlla. Cheqan yachispa mana pantajchu kanki. 28Qanqa cheqanta ruwarqanki kachamuspa kay jina nanayta noqaykuman, jinallataj ñaupa tatasniykoj ajllasqa llajtankumampis. Tukuy chaykunataqa kachamuwarqayku cheqanta, juchasniykuman jina. 29Juchallikuspataj, mana ruwaspataj kamachikusqasniykita, noqaykoqa qanmanta karunchakorqayku. Tukuy imapipuni juchata tarerqayku. Kamachisqasniykita mana kasorqaykuchu. 30Qanqa niwarqayku chayta junt'anaykuta kusisqas kanaykupaj. Noqaykurí manapuni junt'araykuchu niwasqaykutaqa. 31Chayrayku, juchasniykuman jinapuni kachamuwarqayku llakiytaqa. 32Qanqa churawarqayku sajra enemigosniykoj makisninkuman. Chay runasqa mana Diosniyojchu kanku. Leykunata mana rejsinkupischu. Qanqa jaywawarqayku sajra reyman, tukuy reyesmanta aswan rumi sonqoyojman. 33Kunanqa, ni simisniykutapis kichariyta atiykuñachu. Qanta munakojkuna, qanta sirvejkuna p'enqaywan qhatasqas kashanku. 34Sutiykirayku, ama saqerpariwaykuchu. Ama tukuchiychu noqaykuwan ruwarqanki chay tratota. 35Amataj noqaykumanta karunchachiychu khuyakuyniykitaqa. Kayta mañakuyku Abraham kausaqeykirayku, Isaac kamachiykirayku, ajllakusqayki Israelraykutaj. 36Qanqa paykunaman nerqanki mirayninku kananta qoyllurkuna jina yupa, ajinallataj qocha t'iyu jina yupa. 37Kunanqa, Señor, aylluyku aswan juch'uysitu tukuy ayllusmanta. Juchasniykurayku pampaman k'umuykuchisqas kayku tukuynejpi. 38Mana kapuwaykuñachu nitaj rey, nitaj profeta, nitaj kamachejpis. Mana jaywaykuñachu rikuchikusta, manataj q'osñichiykuchu inciensotapis. Mana kapuwaykuchu ni uj cheqallapis mishkha poqoyniykuta jaywasunaykupaj, khuyakuyniykita tarinaykupajpis. 39Jinapis, ichas kunanqa llamp'u sonqo rikhurimususpa, pampaman k'umuykuchisqas aswan allin ñawiyoj qhawawasqayku, qayllaykamusqaykumanta oveja kankawan, waka kankawan, waranqa wira ovejaswampis. 40Kay kunan jaywasqaykoqa allin rikhurichun ñaupaqeykipi. Yachayku ari noqaykoqa jap'ikusqaykitapuni imallatapis qanman sonqonta jaywakojqa. 41Kunanqa tukuy sonqo thaskiyta munayku qhepaykipi. Qanta yupaychayku. Munayniykitataj junt'ayta munayku. 42Ama k'umuykuchisqasta qhepachiwaykuchu. Cheqan sonqoykiman jina qhawawayku khuyakoj kasqaykimanta yuyarikuspa. 43Jatun atiyniykiwan kacharichiwayku enemigosniykumanta. Tukuyman rikuchiy sutiyki jatumpuni kasqanta. 44Kamachisniykita llakichejkuna p'enqaypi rikhurimuchunku, pampaman k'umuykuchisqas kachunkutaj. Atiyninkuta qhechuykuy. Kallpankutataj llauch'iyachiy. 45Tukuy runas yachachunku qanlla Señor kasqaykita, qanlla Dios, qanlla gloriayoj tukuy kay pachapi.
46Chay runas pikunachus reyta kasukuspa wijch'usqanku waynasta ninaman, enqhallajpuni kanku wijch'umuspa aceiteta, alquitranta, thanta p'achasta, k'aspista ima. 47Nina larway oqharikoj pataman, horno ukhumanta aysakuspa iskay chunka iskayniyoj metro astawan. 48Ninaqa llojsimuspa ruphaykucherqa caldeosta hornonejpi kasharqanku chaykunata. 49Señorpa angelnintaj hornoman uraykamorqa kanampaj Azariaswan hermanosninwan ima. Uraykamuspataj, angelqa hornomanta ninaqa karuncharqa. 50Ajinamanta, horno ukhupeqa wayra chirilla karqa. Ninaqa manapuni paykunata llankhaykorqapischu, mana nanacherqachu, mana ni imatataj nerqachu.
Kinsa waynaj takikuynin
51Chaypacha kinsantinku, horno ukhupi kashaspa, uj similla takiyta qallarerqanku Diosta yupaychaspa kay jinata:
52Qanta yupaychayku, ñaupa tatasniykoj Señor Diosnin. Yupaychasqapuni kanayki tiyan wiñaypaj. Lliphipej santo sutiyki yupaychasqallataj. Yupaychasqapuni kanan tiyan wiñaypaj.
53Yupaychasqa kanki lliphipej santo temploykipi. Chaypi yupaychasqapuni kanayki tiyan wiñaypaj.
54Yupaychasqa kanki, rey tiyanapi tiyakojqa. Yupaychasqapuni kanayki tiyan wiñaypaj.
55Yupaychasqa kanki, querubín chaupipi tiyakojqa. Qanqa ñawiykiwan ukhukamapis rikullanki. Yupaychasqapuni kanayki tiyan wiñaypaj.
56Yupaychasqa kanki janaj pacha patapi. Yupaychasqapuni kanayki tiyan wiñaypaj.
57Señorpa ruwasqasnin, Señorta yupaychaychej. Paypaj takipuychej wiñaypaj.
58Señorpa angelesnin, Señorta upaychaychej. Paypaj takipuychej wiñaypaj.
59Janaj pacha, Señorta yupaychay. Paypaj takipuy wiñaypaj.
60Janaj pachapi kaj yaku, Señorta yupaychay. Paypaj takipuy wiñaypaj.
61Tukuy qoyllurkunapis, Señorta yupaychaychej. Paypaj takipuychej wiñaypaj.
62Intipis killapis, Señorta upaychaychej. Paypaj tukipuychej wiñaypaj.
63Janaj pacha qoyllurkuna. Señorta yupaychaychej. Paypaj takipuychej wiñaypaj.
64Parapis chhullapis, Señorta yupaychaychej. Paypaj takipuychej wiñaypaj.
65Tukuy laya wayraspis, Señorta yupaychaychej. Paypaj takipuychej wiñaypaj.
66Ninapis ruphaypis, Señorta yupaychaychej. Paypaj takipuychej wiñaypaj.
67Chiripis ruphaypis, Señorta yupaychaychej. Paypaj takipuychej wiñaypaj.
68Chhullapis chhullunkapis, Señorta yupaychaychej. Paypaj takipuychej wiñaypaj.
69Qhasapis chiripis, Señorta yupaychaychej. Paypaj takipuychej wiñaypaj.
70Qhasapis rit'ipis, Señorta yupaychaychej. Paypaj takipuychej wiñaypaj.
71P'unchaypis tutapis, Señorta yupaychaychej. Paypaj takipuychej wiñaypaj.
72K'anchaypi laqhapis, Señorta yupaychaychej. Paypaj takipuychej wiñaypaj.
73Lliuj lliujpis phuyuspis, Señorta yupaychaychej. Paypaj takipuychej wiñaypaj.
74Kay pacha, Señorta yupaychay. Paypaj takipuy wiñaypaj.
75Orqospis lomaspis, Señorta yupaychaychej. Paypaj takipuychej wiñaypaj.
76Tukuy ima jallp'api wiñajqa, Señorta yupaychaychej. Paypaj takipuychej wiñaypaj.
77Juturispis, Señorta yupaychaychej. Paypaj takipuychej wiñaypaj.
78Qochaspis mayuspis, Señorta yupaychaychej. Paypej takipuychej wiñaypaj.
79Challwaspis, tukuy yakupi kausakojkunapis, Señorta yupaychaychej. Paypaj takipuychej wiñaypaj.
80Tukuy p'isqospis, Señorta yupaychaychej. Paypaj takipuychej wiñaypaj.
81Tukuy uywaspis, tukuy monte animalkunapis, Señorta yupaychaychej. Paypaj takipuychej wiñaypaj.
82Runaspis, Señorta yupaychaychej. Paypaj takipuychej wiñaypaj.
83Israel ayllu, Señorta yupaychay. Paypaj takipuy wiñaypaj.
84Señorpa sacerdotesnin, Señorta yupaychaychej. Paypaj takipuychej wiñaypaj.
85Señorpa kamachisnin, Señorta yupaychaychej. Paypaj takipuychej wiñaypaj.
86Cheqan sonqoyoj runas, Señorta yupaychaychej. Paypaj takipuychej wiñaypaj.
87Santo runaspis, llamp'u sonqoyojkunapis, Señorta yupaychaychej. Paypaj takipuychej wiñaypaj.
88Ananías, Azarías, Misael, Señorta yupaychaychej. Paypaj takipuna wiñaypaj, imaraykuchus payqa sepulturaman yaykunanchejmanta jark'awarqanchej, wañuymanta librawanchej, enqhasqa hornomanta kacharichiwarqanchej, larwaj hornomanta salvawarqanchej.
89Señorta agradecekuychej sumaj sonqo kasqanrayku, munakuynintaj wiñaypaj kasqanrayku.
90Señorman k'umuykukojkuna, tukuyniykichej payta yupaychaychej. Paypaj takipuychej. Agradecekuychej, munakuynin wiñaypaj kasqanrayku.
Currently Selected:
DANIEL Gr 3: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.