ROMANOS 2

Diospa juicionqa cheqan

1Chayrayku, ya runa, qanqa mana kutichikuyta atinkichu; pipis kay, wajkunata tumpaspaqa, qan kikillaykitaj juchachakushanki. Wajta tumpaspaqa qampis kikillantataj ruwashanki. 2Yachanchej Diospa juicionqa, cheqa kajman jina, juchata ruwajkunaj contrampi kasqanta. 3Ya runa, yuyankichu, chay jinata ruwajkunata tumpashaspa, qampis kikillantataj ruwashaspa, Diospa juicionmanta ayqenaykita? 4Chayrí, Diospa qhapaj khuyakuynintachu qhesachanki, paciencianta, jatun munakuyninta ima? Mana yachashajtillayki munakuynenqa qanta pusasunki Diosman kutirinaykipaj. 5Sinch'i, mana kasukoj sonqoyoj, Diosman mana kutirisqaykirayku qan kikiykipaj k'ajaj phiñakuyta tantashanki, k'ajaj phiñakuy p'unchaypaj; maypachachus Diospa cheqan kaj juicion rikuchisqa kanqa, chaypaj. 6Paytaj sapa ujman qoponqa ruwasqanman jina. 7Allinta ruwaspa sayajkunaman wiñay kausayta qonqa; pikunachus mask'anku janaj pacha k'anchayta, jatun kayta, mana jayk'aj wañuyta ima. 8Churanakojkunapaj, cheqan kajta mana kasojkunapaj, mana allin kajta ruwajkunapaj ima, phiñakuy, manchay chejninakuytaj kanqa. 9Jinallataj ñak'ariy, llakiytaj kanqa tukuy sajrata ruwajkunapaj; ñaupajta judiospaj, qhepantataj griegospaj. 10Allin kajta ruwajkunapajqa kanqa, jatun kay, allimpaj qhawasqa kay, sonqo tiyasqa kay ima; ñaupajta judiospajraj, chaymantataj griegospaj.

11Diosqa mana runaj rijch'aynillantachu qhawan, astawanqa tukuyta uj rejta qhawan. 12Tukuy mana leypi kashaspa juchallikojkunaqa, mana leyniyoj wañonqanku. Leypi kashaspa juchallikojkunatataj, kikin leyllataj juzganqa. 13Mana leyta uyarejkunaqa, Diospa ñaupaqempi cheqan runas kanqanku; astawanqa leypa nisqanta ruwajkunalla cheqan runaspaj rejsisqas kanqanku. 14Gentilesqa mana leyniyoj kaspa, paykuna kikinkumanta leypa kamachisqasninta ruwanku, mana leyniyoj kaspapis, paykunalla ley kanku, paykuna kikinkupaj. 15Paykunaqa rikuchinku escribisqa leypa ruwayninta sonqonkupi, kikin concienciankutaj paykunamanta willan, imatachus yuyasqankuta ch'ataykuspa, chayrí jark'akuspa. 16Juicio p'unchaypi, Dios juzganqa Jesucristonejta, runaspa pakaypi ruwasqasninkuta, evangelioman jina.

Judiospa leynin

17Qanqa, judío nisqa kanki, alabakunkitaj leypi allinta sayani, Dioswantaj kani, nispa. 18Diospa munayninta rejsinki, leynejta yachachisqa kanki, aswan allin kajtapis, walej kasqanta ninki. 19Ciegospa pusaykachajnin, laqhapi kajkunaj k'anchaynin kasqaykita yuyakunki. 20Yuyallankitaj, mana yachajkunaj yachachejnin kasqaykita; wawaspa yachachejnin, leypitaj yachaypa rijch'aynin, cheqa kajpatawan tiyapusunki. 21Qanqa wajkunaman yachachishaspa, manachu qan kikiykita yachachikunki? Wajkunaman mana suwana kasqanta willashaspa, qanrí, imaraykutaj suwashanki? 22Wajkunaman ninki mana qhenchachakuna kasqanta. Qanrí manachu qhenchachakushanki? Lantikunata chejnikunki, imaraykutaj chantá lantej imasninta suwankiri? 23Leymanta alabakunki, Diostataj mana allimpaj qhawanki, leyta mana allinta junt'aspa. 24Escribisqa kasqanman jina, juchaykichejrayku qankunanejta Diospaj sajrata rimanku.

25Leyta kasojtiyki, cheqamanta circuncisionqa yanapasunki. Mana leyta kasuspaqa, leyta p'akinki, circuncidasqa kasqaykitaj, manapis circuncidasqachu kawaj jina. 26Mana circuncidasqa kaj, leypa kamachisqanta waqaychanman chayqa, mana circuncidasqa kasqaykeqa, circuncidasqapis kawaj jina. 27Pichus cuerpompi mana circuncidasqa kajqa, leypa nisqanta waqaychan. Paytaj juchachasonqa, leypi escribisqa kajwan, circuncidasqa kasqayki leyta p'akisqaykimanta. 28Mana judiochu jawallamanta kajqa; nillataj circuncidasqachu, jawa aychallampi circuncidachikojqa. 29Manachayqa ukhunmanta circuncidasqa kajmá judioqa, jinallataj tukuy sonqomanta circuncidasqa kanan tiyan espiritupi, mana escribisqallapichu. Paypaj yupaychayqa mana runasmantachu jamun, astawanqa Diosmanta.

Currently Selected:

ROMANOS 2: QCHSB

Highlight

Copy

Compare