ROMANOS 1

Pabloqa Roma Iglesiaman escribin

1Noqa Pablo, Jesucristoj kamachin kani, apóstol kanaypaj wajyasqa, Diospa evangelionta willanaypaj t'aqasqa.

2Diosqa unaymantapachaña nerqa evangeliota qonanta, cheqa Escrituraspi profetasninnejta. 3Chaytaqa, Churin Jesucristomanta willarqa; payqa aychaman jina Davidpa mirayninmanta karqa. 4Sut'inchasqa karqa Diospa Churin atiywan kasqanta, cheqan Espirituman jina, wañusqasmanta kausarimusqanrayku.

5Jesucristonejta jap'inchej khuyakuyta, kamachin kayta, tukuy llajtaspi, paypi creenankupaj kasunankupajtaj. 6Qankunapis paykuna ukhupi wajyasqas kankichej, Jesucristojta kanaykichejpaj. 7Kay cartata escribimuykichej Roma llajtapi tiyakojkunaman, Diospa munakusqasnin. Sumaj kausayman wajyasqas kankichej. Khuyakuy, sonqo tiyakuytaj qankunapaj kachun Dios Tatanchejmanta, Señor Jesucristomantawan.

Pablo riyta munan Romaman

8Ñaupajta graciasta qoni Diosniyman, Jesucristonejta tukuyniykichejmanta; imaraykuchus feniykichej uyarikushan mundontimpi. 9Dioslla yachan pitachus kasusqayta, Espiritupi Churinmanta evangeliota willaspa. Diosmanta mañakuyniypi mana sayk'uspa qankunamanta yuyarikunipuni. 10Jinallataj mañakushanipuni imaynallamantapis Diospa munaynin kajtin qankunata watukoj allinta jamunaypaj. 11Noqaqa rikuytapuni munaykichej, Espíritoj ima yanapaynillantapis qankunaman qonaypaj, astawan kallpachasqas kanaykichejpaj. 12Kayta nini purajmanta sonqochanakunanchejpaj, chay kikin feninchejrayku.

13Hermanos, munani yachanaykichejta, ashkha kutita qankunajman jamuyta munasqayta. Manataj aterqanichu, qankuna ukhupi, Espiritupi ima poqoyllatapis jap'inaypaj, gentiles ukhupi jina. 14Noqa evangeliota willanaymanta manu jina kani, griegosman, mana griegosmampis; yachayniyojkunaman, jinallataj mana yachayniyojkunamampis. 15Noqamantaqa wakichisqaña kani, usqhayta jamuspa evangeliota willanaypaj, qankuna Romapi tiyakojkunamampis.

Evangelioj atiynin

16Mana p'enqakunichu evangeliomanta, imaraykuchus evangelioqa Diospa atiynin tukuy creejkunata salvanampaj; ñaupajta judiosta, chaymantataj griegosta. 17Evangeliopeqa Diospa justician fenejta rikuchikun, fepajtaj; imaynachus escribisqa kasqanman jina: Cheqan runaqa fenejta kausanqa.

Runakunaqa juchayoj kanku

18Diospa phiñakuynenqa janaj pachamantapacha rikuchikun, Diosta mana yupaychajkunaj contrampi, mana cheqan kajta ruwajkunapaj ima. Paykunaqa mana cheqan kayninkuwan, cheqan kajta jark'ashanku. 19Imachus Diosmanta yachakun, chayta paykunapis rejsinku, imaraykuchus Dios kikin paykunaman rejsicherqa. 20Diospa mana rikukoj imasnenqa, sut'ita rikuchikunku, paypa ruwasqasninnejta, mundoj ruwakusqanmantapacha. Chaykunaqa kanku: Wiñay atiynin, Dios kasqan ima. Chayrayku mana ninkumanchu imatapis mana yachasqankutaqa. 21Ajinata Diosta rejsishaspa, mana Diosta jinachu yupaycharqanku, nitaj graciastapis qorqankuchu. Astawanqa qhasi mana kaj yuyayninkuwan jatunchakorqanku, wampu sonqonkupis astawan laqhayaykorqa. 22Yachaysapasman tukuspa wampuyarqanku. 23Diospa mana tukukoj jatun kayninta tukucherqanku ismoj runaj lantinman, p'isqosman, tawa chakiyoj uywasman, katarisman ima.

24Chayrayku Diosqa paykunata millay kausayman enqhaykorqa, sonqonkoj munayninman jina. Ajinamanta paykunapura ukhunkuta qhenchacharqanku. 25Diospa cheqa nisqanta llullakuyman tukucherqanku, ruwasqa kajkunata jatunchaspa, yupaychaspataj; kay pachata ruwajtataj mana yupaycharqankuchu. Payqa yupaychasqamin wiñaypa wiñaynintimpaj. Amén.

26Chayrayku Diosqa p'enqay munapayaykunaman jap'icherqa; imaraykuchus warmisninkupis, maychus ruwana kajta saqespa, cuerponkoj contranta ruwarqanku. 27Ajinallataj qharispis, warmista saqespa, millay yuyayninkupi q'oñirerqanku paykunapura. Qharipurataj p'enqay juchata ruwarqanku, ñak'arerqankutaj kikin ukhunkupi jasut'ita pantasqankuman jina.

28Paykuna Diosta qonqapusqankuraykutaj, Diosqa jap'icherqa sajra yuyaykunaman, mana allin kajta ruwanankupaj. 29Paykunaqa junt'asqas karqanku mana cheqan ruwaykunawan, [qhenchachakuywan,] sajra kaywan, munapayaywan, qhawaraywan, runa wañuchiywan, phiñanakuywan, ch'aukiyaywan, sajra yuyaykunawan ima. 30-31Kankutaj thutojkuna, tumpajkuna, Diosta chejnejkuna, qhasimanta k'amejkuna, jatunchakojkuna, sajra kajkunata rikhurichejkuna, tatasninkuta mana kasukojkuna, mana yuyayniyojkuna, parlasqankuta mana junt'ajkuna, mana munakuyniyojkuna, mana allinyakuyta munajkuna, mana khuyakuyniyojkunataj. 32Pikunachus Diospa juicionta yachashaspa, chaykunata ruwajkunaqa wañunanku tiyan. Chantá mana paykunallachu ruwanku, astawanqa chay juchasta ruwajkunawan kusikunku.

Currently Selected:

ROMANOS 1: QCHSB

Highlight

Copy

Compare