APOCALIPSIS 4

Janaj pachapi yupaychanku

1Kay imaspa qhepanta, janaj pachapi rikorqani uj punku kichasqata. Ñaupaj vozta uyarisqayqa, trompetaj waqayninman rijch'akorqa, parlamuwaspataj niwarqa: Kayman wicharimuy, imaschus kay qhepata ruwasqas kananku tiyan, chaykunata rikuchisqayki.

2Chay kikimpachataj, noqa Espíritoj atiynimpi kasharqani, rikorqanitaj janaj pachapi uj trono churasqata. Chay trono patapitaj uj runa tiyasqa kasharqa. 3Chay runataj jaspe rumiman, cornalina rumimantaj rijch'akorqa. Tronoj muyuynimpitaj uj k'uychi, esmeralda rumiman rijch'akoj karqa. 4Chay tronoj muyuynimpitaj, iskay chunka tawayoj tiyanas karqanku. Chay tiyanas patapitaj iskay chunka tawayoj kuraj runasta rikorqani tiyasqasta, yuraj p'achawan p'achallisqasta, umasninkupi qori pillusniyojtataj. 5Tronomantataj llojsimusharqanku lliuj lliujkuna, qhon qhonkuna ima. Qanchis nina k'anchaykunataj, tronoj ñaupaqempi larwasharqanku. Chaykunaqa Diospa qanchis espiritusnin kanku. 6Tronoj ñaupaqempitaj vidriomanta mar qocha jina cristalman rijch'akoj karqa.

Trono chaupipitaj, muyuynimpi ima, tawa kausajkuna, ñaupajninkupi, qhepankupipis ñawiswan junt'asqas karqanku. 7Ñaupaj kaj kausajqa leonman rijch'akorqa. Iskay kaj animaltaj toroman rijch'akorqa. Kinsa kaj animaltaj runa uyayoj jina karqa. Tawa kaj animaltaj phawashaj ankaman rijch'akorqa. 8Chay tawantin animalesqa sapa ujninku sojta lijrasniyoj muyuyninkupi, tukuy ukhunkupitaj ñawiswan junt'asqas karqanku; manataj tuta p'unchay samajchu kanku, nispa: Santo, Santo, Santo, Señor Dios Tukuy Atiyniyoj, pichus karqa, kantaj, jamonqataj.

9Chay animalesqa yupaychankupuni, jatunchankutaj, graciasta qospa tronopi tiyasqa kajman, pichus wiñay wiñaypaj kausan, chayman. 10Chay iskay chunka tawayoj kuraj runas, tronopi tiyasqa kajpa ñaupaqempi qonqoriykukuspa, yupaychasharqanku wiñay wiñaypaj. Pillusninkutataj tronoj ñaupaqenman churaspa, nisharqanku: 11Allimpaj qhawasqa kanki, Señor Diosniyku, yupaychayta, jatun kayta, atiyta ima jap'inaykipaj. Qan tukuy imata wakicherqanki, munayniykiraykutaj kanku, ruwasqastaj karqanku.

Currently Selected:

APOCALIPSIS 4: QCHSB

Highlight

Copy

Compare