SAN MARCOS 12

Sajra runasmanta

(Mt 21.33-46; Lc 20.9-19)

1Chay qhepata Jesús, rijch'anachinaswan yachachiyta qallarerqa runasman kay jinamanta: Uj runa jallp'ampi uvasta plantarqa, perqawantaj muyuykucherqa. T'oqota allaspataj, uvas ch'irwanata ruwarqa; qhawanampajtaj torreta sayaricherqa, chantá chajrata arriendaspa karuman riporqa. 2Uvas pallana p'unchay chayamojtintaj, ujnin kamachinta kacharqa, chay llank'ajkunamanta, paypa kajta jap'imunankupaj. 3Llank'ajkunataj, kachata jap'iykuspa maqaykorqanku, ch'usajtataj kutiricherqanku. 4Chaymanta waj kamachintañataj kacharqa, paytataj rumiswan ch'anqaykorqanku; umanta jusk'uspa, k'amispataj kachaporqanku. 5Waj kamachitañataj kacharqa, paytataj wañucherqanku. Qhepantataj, aswan ashkha kamachistañataj kachallarqataj; paykunatapis, wakinta maqarqanku, wakintataj wañucherqanku.

6Tukuypa qhepantataj, may munasqa churintañataj kacharqa llank'ajkunaman: Churiytaqa respetanqanku, nispa. 7Llank'ajkunataj, paykuna ukhu ninakorqanku: Jallp'ayojpa churin kayqa, jamuychej, wañuchinachej, kay uvas chajrataj noqanchejpaj kanqa. 8Ajinamanta churitaqa wañucherqanku, uvas chajramantataj wijch'umorqanku.

9Imananqataj uvas chajrayoj? Payqa jamuspa, chay llank'ajkunata wañurachenqa, uvas chajrantataj wajkunaman qonqa.

10Manachu kayta Escriturapi leerqankichej? Wasi ruwajkunaj qhesachasqanku rumeqa, aswan sumaj rumiman paran. 11Señor ruwarqa kaytaqa, t'ukunaykichejpaj jina.

12Enemigosnintaj, Jesusta presochayta munarqanku, yuyaspa paykunaj contranta chay rijch'anachinawan nisqanta; runasta manchachikuspataj, saqerparispa riporqanku.

Impuesto qonamanta Jesusta tapunku

(Mt 22.15-22; Lc 20.20-26)

13Chaymanta, Jesusman kachamorqanku wakin fariseosta, herodianostawan, ima nisqanmantapis pantajtin ch'ataykunankupaj. 14Chaykunataj jamuspa taporqanku: Maestro, yachayku cheqa runa kasqaykita, manataj pitapis manchachikusqaykita; imaraykuchus mana runaj rijch'aynillantachu qhawanki; astawanqa Diospa cheqan ñanninta yachachinki; niwayku ari: Allinchu impuestota Cesarman qonaykoqa? Chayrí, manachu qosqayku?

15Jesustaj puraj uyas kasqankuta yachaspa, paykunaman nerqa: Imaraykutaj pantachiwayta munankichej? Denario qolqeta apamuychej qhawanaypaj.

16Denario qolqeta jaywarqanku, Jesustaj taporqa: Pejpa uyantaj, pejpa sutintaj kay qolqepi churasqa?

Paykunataj kuticherqanku: Cesarpata, nispa.

17Cesarpata kajtaqa Cesarman qopuychej; Diospata kajtataj Diosman, nispa.

Paykunataj t'ukorqanku Jesusmanta.

Wañusqas kausarimunankumanta

(Mt 22.23-33; Lc 20.27-40)

18-19Chantá saduceos Jesusman jamorqanku. Paykunaqa ninku wañuymanta kausarimuy mana kasqanta. Taporqankutaj nispa: Maestro, noqaykupaj Moisés escribisqata saqerqa: Sichus uj runaj wauqen wañunman, warmintataj mana wawayojta saqenman chayqa; wauqen casaranan tiyan chay viudawan, wañoj wauqempa miraynin ama chinkanampaj. 20Jinataj, qanchis wauqes karqanku, kuraj kaj casarakorqa, qhepanejmantaj wañuporqa, warmimpi wawata mana saqespa. 21Iskay kaj wauqe chay viudawan casarakorqa; paypis kikillantataj mana wawayoj wañuporqa. Ajinallatataj kinsa kaj wauqepis casarakullarqataj chay viudawan, paypis wañupullarqataj, mana wawayoj. 22Ajinamanta, chay warmiwan qanchisnintin casarakorqanku, tukuyninkutaj wañuporqanku mana wawata rejsispa chay warmipi; qhepantataj warmipis wañupullarqataj. 23Wañuymanta kausarimuna p'unchaypi, paykuna kausarimojtinku, mayqempa warmintaj kanqari? Qanchisnintin paywan casarakorqankoqa.

24Jesustaj paykunaman kuticherqa: Qankunaqa pantasqas kashankichej; mana Escriturasta, nitaj Diospa atiyninta rejsisqaykichejrayku. 25Wañojkuna kausarimojtinkoqa, qharipis, warmipis, manaña casaranqankuchu, nitaj casarachenqankuchu; janaj pachapi ángeles jinallaña kausakonqanku. 26Wañusqas kausarimunankumantaqa, manachu leerqankichej Moisespa escribisqampi, thansamanta Dios parlamusqanta?, nispa: Noqa Abrahampa Diosnin kani, Isaacpata, Jacobpata ima. 27Diosqa mana wañusqaspa Diosninchu, astawanqa kausajkunaj Diosnin. Chayrayku qankunaqa anchata pantankichej.

Jatun kaj kamachiy

(Mt 22.34-40)

28Leymanta yachachej runa qayllaykuspa uyarerqa, Jesús saduceosman allinta kutichisqanta. Paytaj taporqa: Tukuy kamachiykunamanta, mayqentaj ñaupaj kajri?

29Jesustaj kuticherqa: Tukuy kamachiykunamantaqa kaymin ñaupaj kajqa: Uyariy Israel; Señor Diosninchejqa, payllamin Señorqa. 30Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima. Kaymin kuraj kaj kamacheqa. 31Iskay kajtaj, kay jina: Runa masiykita munakunki qan kikiykita jina. Kay iskay kamachisqasmantaqa mana aswan kuraj kanñachu.

32Leymanta yachachej runataj nerqa: Maestro, allinta ninki, uj k'atalla Dios kasqanta; manataj waj kanchu. 33Diosta tukuy sonqo munakoyqa, tukuy yachaywan, tukuy almawan, tukuy kallpawan ima, runa masinchejtataj noqanchejta jina munakoyqa; aswan allin ruphachina rikuchikusmanta, uywa wañuchisqasta Diosman jaywanamanta ima nisqaqa.

34Jesustaj allinta kutichisqanmanta, leymanta yachachejman nerqa: Diospa reinonmanta mana karupichu kashanki, nispa. Manañataj pipis astawan tapoj churakorqachu.

Pejpa churintaj Cristori?

(Mt 22.41-46; Lc 20.41-44)

35Jesusqa yachachishaspa templopi nerqa: Imaraykutaj leymanta yachachejkuna ninku Cristo Davidpa churin kasqanta? 36Kikin Davidqa Santo Espiritunejta nerqa: Señorqa nerqa Señorniyta: Pañaypi tiyakuy; chejnisojkunata chakisniyki uraman churanaykama. 37Kikin Davidpis payta Señor nerqa. Imaynamantataj chantá Cristoqa Davidpa churin kanmanri?

Ashkha runataj tukuy sonqo payta uyarisharqa.

Jesús ch'atan leymanta yachachejkunata

(Mt 23.1-36; Lc 11.37-54; 20.45-47)

38Yachachishaspataj paykunaman Jesús nerqa: Allinta qhawakuychej leymanta yachachejkunamanta. Paykunaqa, puriykachayta munanku qhoysu p'achasniyoj, chanta qhatuna cheqaspi tukuy runaswan napaykuchikuyta munaspa. 39Paykunaqa sinagogaspi, ñaupajpipuni tiyakuyta munanku, qhochuku wasispipis allin kaj tiyanasta mask'anku. 40Viudaspa wasisninkutapis ch'inyachinku; Diosmantataj unay unayta mañakunku. Chaykunaqa astawan juchachasqas kanqanku.

Viudaj ofrendan

(Lc 21.1-4)

41Jesús tiyakusharqa qolqe churana qayllapi, qhawasharqataj imaynatachus ofrendata churasqankuta. Qhapajkunaqa, ashkha qolqeta churasharqanku. 42Chayllaman uj viuda jamorqa. Paytaj iskay phatasninta churaykorqa; chaykunaqa phisullawan ninakun. 43Jesustaj yachachisqasninta wajyaspa nerqa: Cheqamanta niykichej, kay wajcha viudaqa, astawan kurajta churan, tukuy runasmanta nisqaqa. 44Qhapajkunaqa, kapuyninkumanta puchojllataña churanku; payrí, wajcha kayninwan tukuy mikhunampaj kapusqanta churaykun.

Currently Selected:

SAN MARCOS 12: QCHSB

Highlight

Copy

Compare