SAN MATEO 23

Fariseoswan leymanta yachachejkunawan

(Mr 12.38-40; Lc 11.37-54; 20.45-47)

1-2Chaymantaqa Jesús parlarqa runasman, yachachisqasninman ima, nispa: Fariseosqa leymanta yachachejkunawan, Moisespa yachachisqanta yachachinku. 3Imatachá nisunkichej, chayta kasuychej, ruwaychejtaj; amataj sajra ruwasqankuta ruwaychejchu. Paykunaqa parlallanku, manataj ruwankuchu. 4Llasa q'epista, mana oqhariy atinasta, runasman q'epirichinku; paykunataj mana dedollankuwampis chay q'epista kuyurichinkuchu. 5Paykunaqa tukuy imasta ruwanku, runaswan rikuchikunankupaj. Escriturasmanta pisi palabras escribisqata frentesninkuman, makisninkuman ima mayt'uykunku. Jatuchaj flecosniyoj p'achastataj churakunku. 6Jatun mikhuykuna pipis ñaupajpipuni tiyayta munanku; jinallatataj sinagogaspipis. 7Plazaspi runaswan napaykuchikuyta, maestro nichikuyta ima munanku.

8Qankunarí, ama maestro nichikunkichejchu, imaraykuchus ujlla Maestroykichejqa, chayqa Cristo. Qankunaqa, tukuyniykichej hermanos kankichej. 9Ama pitapis tatáy ninkichejchu kay pachapeqa; imaraykuchus ujlla Tataykichejqa, paytaj janaj pachapi kashan. 10Ama maestros nichikuychejchu, imaraykuchus Maestroykichejqa ujlla, chayqa Cristo. 11Qankunamanta kuraj kajqa, kamachiykichej kachun. 12Jatunchakojqa, k'umuykachachisqa kanqa; k'umuykukojtaj, jatunchasqa kanqa.

13Ay qankunamanta leymanta yachachejkuna, fariseos puraj uyas! Qankunaqa, janaj pacha reinota wisq'ankichej runakunamanta; manataj qankuna yaykunkichejchu, nitaj yaykuyta munajkunatapis saqenkichejchu yaykunankuta. [ 14Ay qankunamanta leymanta yachachejkuna, fariseos puraj uyas! Viudaspa wasisninkuta ch'inyachinkichej, ch'aukiyankichejtaj unay unayta rezaspa; chayrayku qankunaqa astawan ñak'arinkichej.]

15Ay qankunamanta leymanta yachachejkuna, fariseos puraj uyas! Qankunaqa mar qochanta, tukuy jallp'asnejta ima purinkichej, uj runallatapis t'aqaykichejman pusaykunaykichejpaj; payta jap'ispataj, infiernoj wawanman tukuchinkichej qankunamanta astawan, iskay kutikama.

16Ay qankunamanta, ciegos kashaspa pusaykachajkuna! Qankuna yachachinkichej: Pillapis templorayku jurajqa, mana juchayojchu; temploj qorinrayku jurajmá juchayojqa. 17Wampus, ciego runas! Mayqentaj aswan kurajrí: Temploj qorinchu, chayrí qorita llimphuchaj templochu? 18Chaymanta yachachillankichejtaj: Pillapis altar jawa jurajqa, mana juchayojchu; chantá pichá, altar patapi kashaj rikuchikurayku jurajmá juchayojqa, nispa. 19Wampus, ciego runas! Mayqentaj aswan allinri: Rikuchikuchu, chayrí rikuchikuta llimphuchaj altarchu? 20Pipis altar jawa jurajqa, altar patapi kajkunapajwan juran. 21Templorayku jurajpis, mana temploraykullachu juran; astawanqa, chaypi tiyakoj Diosrayku. 22Janaj pacharayku jurajpis, Diospa trononrayku juran, pichá chaypi tiyashan chayrayku ima.

23Ay qankunamanta, leymanta yachachejkuna, fariseos puraj uyas! Qankunaqa diezmota qonkichej mentamanta, anismanta, cominomanta ima. Leypi aswan allin kajtataj mana kasunkichejchu: Cheqan kajta, khuyakuyta, creeyta ima. Kaykunata ruwanaykichej karqa, ama chay ujkunata saqespa. 24Pusaykachajkuna, ciego runas, ch'uspita ch'umankichej, camellotataj oqoykunkichej.

25Ay qankunamanta, leymanta yachachejkuna, fariseos puraj uyas! Qankunaqa vasota, chuwatapis jawallanta mayllankichej; ukhuykichejrí suwanawan, millay kausaywan ima, junt'a kashan. 26Ciego fariseo, ñaupajta mayllay vasoj ukhunta, chuwaj ukhuntawan; ajinamanta jawampis llimphu kanampaj.

27Ay qankunamanta, leymanta yachachejkuna, fariseos puraj uyas! Qankunaqa yurajchasqas sepulturasman rijch'akunkichej. Chay sepulturasqa jawamanta k'achitus rikukunku. Ukhunkurí aya tullus, tukuy millay asnawan ima, junt'a kashanku. 28Ajinallatataj qankunapis, jawamantaqa cheqan kaj runasman rijch'akunkichej; ukhuykichejpirí, puraj uya kaywan, juchawan ima junt'a kashankichej.

29Ay qankunamanta, leymanta yachachejkuna, fariseos puraj uyas! Qankunaqa profetaspa sepulturasninta sayarichinkichej; ajinallatataj, cheqan kaj runaspa sepulturasnintapis k'achanchankichej. 30Ninkichejtaj: Sichus ñaupa tatasninchejpa p'unchaynimpi kausasunman karqa chayqa, profetasta wañuchiyta mana yanapasunmanchu karqa. 31Chay nisqaykichejwanqa qankunallataj willakunkichej, profetasta wañuchejkunaj wawasnin kasqaykichejta. 32Qankunapis tatasniykichejpa tupunta junt'achillaychejña!

33Sierpes, katarikunaj miraynin! Imaynatataj infiernopaj juchachasqa kanaykichejmanta ayqenkichejri? 34Chayrayku kachamusaj profetasta, yachayniyojkunata, escribejkunata ima. Qankunataj wakinta wañuchinkichej, wakinta chakatankichej, wakinta wañuchinkichej, wakintataj sinagogasniykichejpi jasut'inkichej, wakintarí llajtamanta llajta qhatiykachankichej. 35Mana juchayojkunaj yawarnin, kay jallp'a patapi jich'akusqan qankunaj pataykichejman jamonqa, cheqan kaj Abelpa yawarninmantapacha, Zacariaspa yawarninkama, pichus Berequiaspa wawan karqa. Paytaqa templopi, altar qayllapi wañucherqankichej. 36Cheqamanta niykichej, kay tukuy imasqa jamonqa kay tiempo runaspa patanman.

Jesús llakikun Jerusalenmanta

(Lc 13.34-35)

37Jerusalén, Jerusalén, profetasta wañuchej, qanman kachamusqastapis rumiswan ch'anqaj! Mashkha kutitachus wawasniykita tantayta munarqani, imaynatachus wallpa chillwisninta lijrasnin uraman tantaykun ajinata, qantaj mana munarqankichu. 38Qhawankichej, wasiykichejqa ch'usajpacha qhepakonqa. 39Chayrayku niykichej, kunanmantaqa manaña rikuwankichejchu: Yupaychasqa kachun, Señorpa sutimpi jamojqa!, ninaykichejkama.

Currently Selected:

SAN MATEO 23: QCHSB

Highlight

Copy

Compare